Press "Enter" to skip to content

Wat pynlong ishu ïa ka ILP, ngin ïa kren beit ïa ki lad jingïada: Conrad

Wat pynlong ishu politik, ther kylla ka CoMSO
Shillong: U Myntri Rangbah, u Conrad Sangma, u la ong ba ym dei ban pynlong ishu ïa ka Inner Line Permit (LIP) hynrei dei ban ïakren beit ïa ki lad jingïada ïa ka jingwan kyrthep ki briew ba nabar.
“Ka sorkar ka don la ki thong ban ïada ïa la ki jong ki briew, hynrei ym dei pat ban pynlong ishu ïa ka ILP, kaba dei tang kawei na ki atiar”, la ong u Myntri Rangbah.
U Conrad u la ong ïa kane haba la kylli la ka sorkar ka dang ïeng skhem ne em kumba ka la ong naduh ba sdang ba ym lah ban pyntreikam ïa ka ILP.
Ha kane ka jingïakren bad ki nongthoh khubor, u Myntri Rangbah, u la ong ba ka ILP ne ka Meghalaya Resident Safety and Security Act, 2016 kidei tang ki atiar ban ïada ïa ka jingwan ki briew ba nabar, hynrei ym dei pat ban pynjngut ïa ka jingthmu ban ïada ïa ki trai ri trai muluk. U la kyntu ruh ïa ki Sengbhalang ba nym pynlong shuh ki jingïakhih, namar ba ka sorkar ka la shimkhia ïa kane ka kam.
Lah ban kdew hangne ba ka Confederation of Meghalaya Social Organisation (CoMSO) ka thmu ban pynlong da ka jingdeng lama ïong ha ka 23 tarik mynta u bnai ban dawa pyntreikam ïa ka ILP ha ka jylla.
Ther kylla ka CoMSO: Halor kane ka jingong u Myntri Rangbah, ka CoMSO, ka la ther kylla ïa u, da kaba ong ba ka inner line permit system ka dei ka atiar kaban ïada ïa ka jaidbynriew na ka jingïoh rungkyrthlep bad ïoh shong shnong shyrta jong ki bar jylla bad bar ri ha ka jylla ba pyntreikam ïa ka.
Ha ka kyrwoh ba la phah da u Chairman, u Bah Robert June Kharjahrin, la ong ba ILP, ka dei ka atiar kaban iada ia ki trai muluk Riewlum na ka jingshah tyllep noh ha ki heh paid na bar jylla bad barri. Kane ka kynhun ki Sengbhalang ka ong ba u myntri ka Home affair haba u jubab ia ka jingkylli ha Parliament u la ong ba Ka jingthmu jong ka ILP system ka long ban ïada ia ka jingioh rung bad buhai shnong ki bar jylla ha ka jylla ba treikam ka ILP khnang ban iada ia ki trai Ri ha kata ka jylla.
“Ka jingdawa Jong ka confederation of meghalaya social organization ( CoMSO) ia ka ILP system ha ka jylla meghalaya kam dei ka kam ba ngi shu leh khlem nongrim”, la ong u Bah Kharjahrin, da kaba bynrap ba ka ILP kam dei tang ka mat dawa ne ka ishu hynrei ka dei ka atiar ban ïada iïa ka jaidbynriew .
U la ong ruh ba ha Meghalaya ka jingdawa ban pyntreikam ia ka ILP system kam dei kaba shu sdang na madan madiah hynrei la rai bad ai jingmut da ka High level committee on influx kaba la khieh da u Bah Bindo M Lanong (Dy Chief Minister) ha kaba ki  Minister, MLA, MDC, officer, ki retired IAS , ki sengbhalang, ki proh jabieng bad ki lawyer naduh u Advocate General ka Meghalaya ki la don Lang bad ki la ia Mir jingmut bha.
Nalor kata lai tylli ki jylla ha north east India ( mizoram, arunachal Pradesh bad nagaland ) ki la pyntreikam ia ILP . Ka Sikkim ka pyntreikam ia ka RAP bad ka PAP kaba ia syriem bad ka ILP. Ha Andaman & Nicobar Island ruh Kum Kane ka permit ka Don. Ki Ri ka pyrthei kylleng ki pyntreikam ia Kum Kane ka kyndon ban pyrkhing ia ka jingrung bad buhai ki briew nabar ha ki jaka ba shong ki riewlum khang ban iada ia ki riewlum. Nalor katta ka Manipur Legislative assembly la lai sien lai wat ka la shna Ain ban pyntreikam ia ka ILP system ha Manipur , dang ha u snem 2018 ka BJP & NPP government ha Manipur ka dang mynjur ban pyntreikam ia ka ILP. Ha Nagaland dangshen ka sorkar ka la buh da ka special committee kaba kyrpang ban pyrkhat ban pyntreikam noh ia ka ILP ha Dimapur ka nongbah kaba khlem Shem la pyntreikam baroh shi katta.
Kumta, ngi dawa na u myntri rangbah ka jylla u Conrad Sangma ba um dei ban pynkylla political issue ia ka ILP hynrei un pyntreikam noh wut wut ia ka khnang ba Kan long ka atiar kaban iada ia ka jaidbynriew Hynniewtrep bad Garo ha meghalaya.