Press "Enter" to skip to content

Yn jurip ka KHADC ïa ka skul hikai shna dawai kynbat ha Lum Sohpetbneng

Duh jait 35 jait ki dawai kynbat na ka thang khlaw
Shillong, Ïaïong, 16: Ka Khasi Hills Autonomous District Council (KHADC) ka la buh thong ban pyndep noh ïa ka jingtei ïa ka Khasi Traditional Medicine Institute kaba don ha u Lum Sohpetbneng ha u snem 2020. Ban pynurlong ïa kane ka thong, ki Executive Member jong ka Council kin sa leit jngoh ïa kane ka Institute ha ka 22 tarik mynta u bnai.
U Executive Member ba dei peit ïa ka tnat Traditional Medicine, u Bah Titosstarwell Chyne ha ka jingïakren bad ki lad pathai khubor mynta ka sngi baar u la ong, “ka Council ka la mang pisa ban tei ïa kane ka projek ha ka jinglut kaba T. 5,77,92,000 klur ïa kaba la mang pisa da ka Sorkar Pdeng.”
Ka KHADC ka la wanrah da ka aiñ Khasi Hills Autonomous District (Protection and Promotion of Khasi Traditional Medicine) Act, 2011 ban pynneh pynsah ïa ki kynbat dawai, ban ithuh ïa ki nongsumar dawai kynbat ha rilum Khasi bad ban pynneh pynsah ïa ki khlaw ki btap.
“Haduh mynta ki dang don tang 30 ngut ki nongsumar dawai kynbat kiba la wan shakhmat ban rejistar ïalade ha ka KHADC,” ong u Bah Titos.
U la ïathuh ruh hadien ba ka Executive Committee kaba thymmai ka la shimti ïa u lakam synshar ha KHADC, mynta ka sngi ka la lum biang ïa ka jingïalang jong ka Khasi Traditional Medicine Commission (KTMC) ban pynthymmai ïa ki dkhot hadien ba la pynkha ïa kane ka Commission naduh u snem 2012.
“Katkum ki rekod ba ka jingïalang jong ka Khasi Traditional Medicine Commission (KTMC) ka la shong khatduh ha ka 7 tarik, Nailar, 2017, kam shym la don shuh kano kano ka jingïakynduh lang bad mynta ngi la rai ban aiti biang sha ka Martin Luther Christian University (MLCU) na ka bynta ban pyndep shwa ïa ka Concept Paper ne ka Detail Project Report (DPR) bathymmai,” u la ong.
“Khnang ban tip haduh katno ka jingpyntrei ïa ka Institute ka la ïaid, ha ka 22 tarik mynta u bnai ngin sa leit peit bad ngi kwah ban pyndep noh mardor khnang ba ngin dup lah ban pyntreikam ïa ka jingthmu jong ka Commission kumba la buh thong da ka Council,” u la bynrap.
Haba kylli u la ong, ‘ngi la rai ruh ban pynkynmaw ïa ka Sub-Committee ba la thung da ka Commission ban pynkhreh ïa ki kyndon na ka bynta ban ai noh ïa ka rejistreshon ïa ki nongsumar dawai kynbat kiba haduh mynta ngim pat lah satia ban rejistar ïa ki,” bad bynrap, “ha ka jingïalang ka ban sa wan, ngin sa pan ïa ka kaiphod na ka Sub-Committee khnang ban pynstet ïa ka jingrejistar ïa ki nongsumar dawai kynbat.”
Katkum ka jingïathuh jong une u EM ka tnat Traditional Medicine, ka jingpyntrei ïa kane ka Institute ka la dep kumba 70 haduh 80 percent eiei. Kane ka Khasi Traditional Medicine Institute kan kynthup ïa ka Adminstrative Block, ka kamra klas ai jinghikai ïa kiba kwah tip shaphang ka jingai sumar da ki dawai kynbat, ka jingsumar Therapy bad ka Library.
“Ngi sngewthuh ba na ka Plan kaba la dep kam pat biang satia bad ki dang bun kiwei kiwei pat ki building ba dang dei ban shna hapoh kane ka Institute,” ong u Bah Titos.
U Bah Dras Rani, u nongsumar dawai kynbat na ka shnong Mawryngkneng uba ju sumar briew naduh u snem 1981, ula pynpaw ba haduh mynta ki nongsumar dawai kynbat ki dang ieng ha la ki jong ki kjat.
Haba kren bynñiaw ïa ka jingduhjait ki dawai kynbat u la ong, “ka jingeh ka long ba ki dawai naduh ki por ba mynshwa barim bajah ki la sdang duhjait ha kiba bun ki jaka bad bun na ki nongkyndong kim sngewthuh ïa ka jingkordor jong ki khlaw ki btatp, ki thang ïa ki khlaw bad ki kynbat ki ing lut khoit.”
Haba kylli u la ong, “ki dawai kynbat ba la duhjait mynta ki don haduh 35 tylli. Ngan shu ai nuksa kum kynbat dawai sumar bampong (cancer) ngi shitom bha ban ïoh, ki kynbat dawai khniang kiba mih kum ki thied dieng, ki dawai kynbat ba sumar ïa ki kynthei bym pun khun kiba mih tang ha u bnai Risaw uba mih kum u Tit mynta kim mih shuh, ki kynbat dawai ba sumar ïa kiba don maw kiba mih ha ki dieng heh. Kine ki kynbat dawai ngi la shitom ban ïoh namar ka jingthang dusmon ïa ki khlaw ki btap.’