Press "Enter" to skip to content

Ka laisen khaii na ki District Council

Ka Trading License bad ka Labour License jong ki Autonomous District Council (ADC) ki long kum u shabi ban teh lakam ïa ka khaii ka pateng laitluid jong ki briew nabar jylla kiba wan buhai shnong ha kane ka jylla Meghalaya. Ka Khasi Hills Autonomous District Council ka la thaw da ka aiñ ïa kaba la tip kum ka ‘The United Khasi-Jaiñtia Hills District Council District (Trading by Non-Tribals) Regulation, 1954.” Katkum kane ka aiñ ka District Council ki tehlakam nadong shadong ïa ka jingleh mon ban khaii laitluid ha kane ka jylla. Ka jingdon jong kane ka aiñ ka la long lypa kawei na ki kyndon ba teh pyrkhing ïa ki briew kiba nabar ka jylla ban bud pyrkhing ïa ki kyndon ba la pynjari da ka District Council namarba ïa ka District Council la pynkupbor da ka riti synshar jong ka ri India.
Hynrei watla ka District Council ka don ïa kane ka aiñ pynban, ki briew kiba nabar ka jylla, katba ki snem ki dang ïai tyllun ki dak ki shin ki paw ba ki briew kiba nabar ka jylla kim salia ban ïaid lait wat ïa ka District Council. Kumba ka paw, ka kyndon jong ka District Council kam long kaba skhem, namar ki briew nabar ka jylla ki shlan wat ban leh ïa ka khaii ka pateng khlem da ïoh wat ïa ka License na ka District Council. Ym tang katta, la lap ruh ba ki briew kiba wan nabar jylla, kim burom wat ïa ki Dorbar Shnong bad ïa ki bor pynïaid shnong, namar la lap ba ki seng ïa ka khaii ka pateng khlem ka jingïoh jingbit (No Objection Certificate) na ka Dorbar Shnong. Kane ka pynpaw shai ba ki briew kiba nabar ki shlur wat ban kheiñ dewthala wat ïa ka itktiar jong ki Dorbar Shnong.
Haba bishar ka jingshlur jong ki briew kiba nabar jylla ban seng ïa ka khaii ka pateng ha kane ka nongbah Shillong bad ha ki jaka sor jong ki District bapher bapher ka jylla ka dei namar ka jingbym peitngor, ka jingbym buddien bad ka jingshim sting jong ka District Council ban pynlong ïa ka jingkhynra ïa ki dukan bad ki jaka khaii jong ki briew kiba nabar ka jylla kiba wan ban kamai jakpoh ha kane ka jylla.
Ki Sengbhalang ki ju pynlong ïa ka jingkhynra laisen khaii manla ka por bad ki ju lap ha manla ki khep ba ki pynlong ïa ka jingkhynra ïa ka jingjyllei ki briew kiba nabar jylla ban khaii laitluid bad khaii sahuh da kaba ïaid lait ïa ka aiñ jong ka District Council. Khlem ïakren ïa ka ‘laisen kren briew’ hynrei tang na ki dukan jong ki bar jylla ba ki sengbhalang ki ju leit khynra na ka por sha ka por ha kylleng ka nongbah Shillong, la shem ba ki leh bym suitniew wat ban leit pynthymmai (renew) ïa ka laisen. Ka jingbym shim laisen khaii bad ka jingleh mutlop jong ki nongkhaii bar jylla ban leit pynthymmai ïa ka laisen ka la pynduhnong haduh katta katta ïa ka District Council. Ka District Council ka la dei ban wanrah da kiwei pat ki rukom treikam bad ki aiñ kiba kham pyrkhing shuh shuh ban tehlakam ïa ka jinglehmon ki briew kiba nabar ka jylla.
Ka tnat Enforcement jong ka District Council ka la dei ban pynjur ïa ka jingkhynra ïa ka Trading License bad ïa ka Labour License na ka sngi sha ka sngi khnang ba ki briew kiba nabar jylla kin ym ïoh leh mon namar kumba ka long mynta hi, la jan baroh ki jaitkam ba ki bar jylla ki trei ne ki khih ki beng, ki trai ri trai muluk ruh ki lah da kaba suk ban leh. Kam don nongrim satia ban ong ba u trai ri trai muluk um nang ban khaii, ban die dukan namar kiba bun ki trai ri trai muluk kiba lah ban leh ïa kine ki kam kiba suk. Namarkata, kam shong nia hi ruh ïa ki Dorbar Shnong ba kin ai NoC ïa ki brierw kiba nabar jylla ban plie dukan kwai, die juti, dukan die jingbam, shalan mar bad kiwei kiwei ki jaitkam barit baria. Ha kane ka juk kyrduh kam, la jan baroh ki briew kiba la nang la stad ki la phai khmat sha ka kam lajong da kaba ieng ha la ki jong ki kjat.
Ka shong eh ha ka Executive Committee jong ki Autonomous District Council ban bishar ïa ka jinglait rynghang bad ka jingsynjor jong ka tnat Trade and Enforcement bad kumjuh ruh ka tnat Labour, namarba kine ki ar tylli ki tnat ki long ruh kum u klongsnam ba ïada ïa ka jaidbynriew na kino kino ki jingshah klun ba jar jar ha ka khaii ka pateng ha kiwei pat ki jaitbynriew kiba wan nabar ka jylla.