Press "Enter" to skip to content

Hap thaw histori u Dr. Jemino lada dei ban jop ïa ka elekshon MP

Shillong, Iaiong 19 :U Dr. Jemino Mawthoh, kyrtong ïamonlang jong ka liang Meghalaya Democratic Alliance (MDA) lada dei ba un jop ïa kane ka elekshon Lok Sabha na Shillong Parliamentary Consti-tuency, un hap ban thaw ïa ka history, kaba ka Shillong Seat kam pat ju thaw.
Kane ka long ba namar ba ym pat ju don ki kyrtong kiba rem ïa ka elekshon MLA ki ban jop ynda la ïakhun ïa ka elekshon MP. Naduh ka snem 1993, haba u Bah DD Lapang, u la ïakhun ïa ka elekshon MP, hadien ba u la rem ha ka elekshon MLA na Nongpoh, um shym la jop satia, u la shah pynl.iem ha u (L) Prof. GG Swell. Hadien kane, u Dr. S. Loniak Marbañiang haba u la ïakhun ïa ka elelshon MP kum ku kyrtong ka Regional Parties Alliance (RPA) hadien ba u la rem ha ka elekshon MLA na Nongspung, u la shah rem ha u kyrtong ka Congress, u Bah PR Kyndiah. U Bah John Kharshiing hadien ba u la shah rem ha ka elekshon MLA na Nongkrem, haba u la ïakhun MP na Shillong na ka Seng UDP, um shym la jop satia, hynrei u la shah pynliem ha u kyrtong ka Congress, u Bah Vincent H. Pala.
Hynrei na ka liang ki nongïalam ka MDA, ki pynpaw ba mynta ka kynti kin thaw history ha kaba u Dr. Mawthoh un ioh ïa ka jingjop, namar kadei ka sien kaba nyngkong ba u kyrtong na ki Seng Riewlum un mih haba ka sorkar ha ka jylla ruh kadei ka sorkar Seng Riewlum. Ka daw kaba ki ai ka long ba mynta ka snem 2019, ki Seng Riewlum ryngkat ka NPP ki la ïatreilang bad lada khein na ka jingdon ki MLA bad ki MDC na Ri Khasi Jaiñtia ha kaba ka Shillong Parliamentary Constituency ka long ki la tam bun ngut ban ïa ki MLA bad MDC ka Seng Congress, kaba pynieng da u Bah Vincent Pala, uba la jop la arsien lynter kum u MP.
Ha kawei pat ka Liang ka Congress, ka don ka jingsngew skhem ban jop ïa kane ka elekshon, namar ba ka don ïa ki nongïalam, ki dkhot bad ki nongtrei ha man la ki Constituency bad kadei ka Seng
kaba ju trei baroh san snem lynter. Ki don ruh kiba la pynpaw ba wat ha ka elekshon kaba khatduh, kata ha u 2014, u Bah Pala, um shym la ïoh jingkyrshanlut na baroh ki MLA ka Congress, namar ba ka don ka jingïaleh pyrshah napoh napoh, hynrei u Bah Pala, u la jop. “Mynta lei lei ba ka Seng ka ïatylli bha mlon, ym don jingeh ba ngin jop”, la ong uwei u nongialam ka Congress.
Nangta shuh shuh ki la ïathuh ba don ki MLA bad MDC jong ka NPP, kiba la trei napoh napoh ban pynjop ïa u Bah Pala. Hynrei ïa kane ka khubor la kyntait da u Conrad K. Sangma, uba long u nongïalam ba hakhlieh eh jong ka seng National Peoples Party (NPP) kaba kyrshan lang ïa u Dr. Jemino Mawthoh.