Press "Enter" to skip to content

ïa pyni bor bad kulmar ha ka Ilekshon MP kaba ar ha ki 11 tyli ki jylla

New Delhi, Ïaiong 19 : Ka elekshon jied MP ha ka kylla kaba ar ne Phase – II ha ki 95 tylli ki parliamentary seat jong ki 11 tylli ki jylla kaba long ha kane ka sngi Palei ka la sakhi ïa ka jingpynibor bad ki jingkulmar kylleng kylleng watla don pat ki jaka kum ka Manipur bad Puducherry kiba ka jingpoi ki nongthep vote ka la kot sha ka 80 persen.
Ka tnad Elekshon jong ka Ri ka ong ruh ba lada kheiñ kyllum, ka jingpoi ki nongthep vote ha kane ka kylla, ka la kot sha ka 67.84 persen. Ki jylla kiba don ha kane ka Phase – II ki kynthup ïa 38 seat ha Tamil Nadu, 14 ha Karnataka, 10 ha Maharashtra, 8 -Uttar Pradesh, 5 ha Assam, Bihar bad Odisha, 3 Chhattisgarh bad West Bengal, ar ha Jammu bad Kashmir bad kawei ha Manipur bad Puducherry.
Ha kane ka kynti ki la don haduh 15.7 klur ngut ki nongthep vote ban jied ïa ki 95 ngut ki MP ba thymmai na ki 1,606 ngut ki kyrtong kiba mih ban aireng.
La ong ruh ba ki constituency kaba duna palat eh ki nongthep vote kadei ha Jammu bad Kashmir kaba la poi tang kumba 43.4 persen. Lah ban kdew hangne ba ka Udhampur bad Srinagar kidei ki ar tylli ki seat ha Jammu bad Kashmir kaba dang shu dep mynta ïa ka elekshon MP. Ha kajuh ka por pat, ka Puducherry ka paw kum ka jaka kaba bun eh ki nongthep vote namar ka kynjoh haduh kumba 78 persen.
Kiwei pat ki jylla kynthup naduh ka West Bengal, Assam, Manipur, Chhattisgarh, Puducherry bad Tamil Nadu ki la kynjoh sha ka 70 persen ka jingpoi ki nongthep vote.
Ha kane ka kynti kaba mynta la pynlong ruh ïa ka elekshon MLA ha ki 35 tylli ki Assembly constituency jong ka Odisha bad ha kajuh ka por la pynlong artad ïa ka elekshon shiteng samoi ha ki 18 tylli ki constituency jong ka Tamil Nadu.
Lait noh na ki katto katne ki jingjia pyni bor hapdeng ki nongkawang maw bad ki bor pahara, ka jingthep vote ka la long kaba ïaid beit ha Srinagar Lok Sabha seat ha kane ka sngi Palei katba ha Udhampur pat ka jingwan ki nongthep vote ka long kaba pynhun.
Ka la don ruh ka jingpyni bor hapdeng ki bor pahara bad ki nongkawang maw kiba pyrshang ban pynthut ïa ka jingthep vote ha Batmaloo kaba ha Srinagar, Pandach kiba hap ha ka Ganderbal District bad ha ki saw tylli kiwei pat ki jaka kiba hap ha Badgam district jong ka Srinagar seat. Ha katei ka jingjïa uwei u riew paidbah bad saw ngut ki pulit kynthup ïa ar ngut ki ophisar ki la mynsaw. La katta kitei ki bor pahara kim shym la ailad satia ba katei ka jingkulmar kan pynthut ïa ka jingthep vote ha Srinagar.
Ki la don ruh ki jingkynnoh ba ka don ka jingpynthut jong ki kor EVM ha ki katto katne ki jylla ïa kiba la lah ban pynbeit noh pat.
Haba phai sha West Bengal, la ong ba ka jingpoi ki nongthep vote ka la kynjoh sha ka 76 persen ha ki lai tylli ki seat kiba hap ha ki bynta ba shatei jong ka West Bengal, kata ruh hapdeng ki jingkulmar kiba mih na ka daw ka jingshah hiar thma u MP ka CPI – M u Mohammad Salim uba dei ruh u kyrtong, ha Raniganj bad ong ruh ba ka la don ruh ka jingpynjulor ïa ka EVM ha kawei pat ka jaka thep vote ïa kaba ka tnad ka la shimkhia mardor.
Ha Kanker, ka constituency kaba hap ha ka jylla Chhattisgarh, uwei u nonghikai u ba dei ban pynïaid ïa ka elekshon u la khlad noh na ka jingpang klongsnam. Katba ha kawei pat ka jingjia, ka jingthmu jong ka kynhun kieng atiar Maoist ka la pulom noh ban pynthut ïa ka jingthep vote ha Mohla kaba hap ha Rajnandgaon seat da kaba thmu ban pynbthei ïa u bom kti. Ha katei ka jingjia, uwei u shipai ITBP u la mynsaw.
Ka kylla kaba lai ban jied ïa ki MP ba thymmai jong ka Ri kan long ha ka 23tarik mynta u bnai, bud pat ha ka 29tarik, 06tarik u Jymmang, 12 bad 19 tarik u Jymmang katba ka jingñiew ïa ki vote pat kan long ha ka 23tarik u Jymmang hi.