Press "Enter" to skip to content

Kynmaw burom ki riewngeit Khristan ïa ka sngi ïap u Trai Jisu

Shillong, Ïaïong, 19: Ryngkat lang bad ki Khristan ha satlak ka pyrthei baroh kawei mynta ka sngi thohdieng ki Khristan ha kane ka Jylla Meghalaya, ki la kynmaw burom da ki jingleh riewblei ïa ka sngi ïap jong u Trai Jisu Khrist halor ka Diengphna bad ïa kane ka sngi la tip ruh kum ka sngi Thohdieng Bakhuid ne ka Good Friday.
Mynta ka sngi, la sakhi ïa ka jingshlei ki iingmane jong ki Khristan ha kylleng ka Jylla ban ïashim bynta ha ka jingknia Mass Bakhuid bad ha ki jingïaseng jinglehniam bapher bapher.
Ki Khristan Catholic ha kiba bun ki shnong bad ki jaka ki la sdang ïa kane ka sngi da ki jingshah jing-it bad kyndiah shwa ban leit ïashim bynta ha ka jingïaid Lynti Diengphna ba la pynbeit da ki bor pynïaid Balang ha ki Balang Shnong bad ha ki Parish bapher bapher jong ka Jyllaniambah Shillong.
Ha nongbah Shillong la sakhi ïa kane ka jinglehniam ha Calvary jong ka Cathedra Parish ha kaba ki paidriewngeit ki la ïashim bynta ha Lynti Diengphna ban kynmaw ïa ki jingïaid lynti jong u Jisu uba bah ruh ïa ka Diengphna haduh ban da poi sha Kalbari bad ban shah ïap halor ka Diengphna.
Ha Nongpoh, la pynmynta ïa ka jinglehniam da u Fr. Bernard Pala, Parish Priest ka Nongpoh Parish.
U Fr. Bernard haba ïasam ïa ka Ktien u Blei sha ki paidriewngiew, u la pynkynmaw shaphang ka jingshah shitom u Jisu haduh ba un da shah ïap halor ka Diengphna ha u Lum Kalbari da kaba pynshong nongrim katkum ka ktien jong u Blei ba la pule ha kane ka sngi.
La leh burom ruh ïa ka Diengphna ban pynkynmaw halor ka jingshah sah narphna u Jisu ha kaba da ki hajar ki paid riewngeit ki la shim bynta ban doh ieid ïa ka Diengphna da ka jingngeit ba u Jisu u la wan ban ïap halor ka Diengphna ban pynim ei ïa ki nongpop jong ka pyrthei.
La pynkut ruh ïa kane ka lehniam leh rukom da ka jingïabam ïasip ïa u Kpu bad ka Waiñ ban pynkymmaw ruh ba u Kpu u dei ka Met jong u Jisu bad ka Waiñ ka long ka Snam u Jisu.
Kum u nongsharai mynsiem jong ka Parish Nongpoh, u Fr. Bernard Pala u la khot bad wer ïa ki paidriewngeit ban im sngi katkum ka Ktien u Blei manla sngi.
“Kane ka sngi Thohdieng Bakhuid ka dei ka jingpynkymaw shaphang ka jingïap ka jong u Jisu ba kum ki Khun Kristan ki dei ban sngewthuh ba ka jingpynim ei ka wan da kaba u la ïap halor ka Diengphna,” ong u Fr. Pala bad bynrap ruh kane ka por ka dei ka por jong ka jingsiewspah ïa ka jingim ban phai dien na ka basniew sha kaba bha.
Ha ka jinglehniam Good Friday jong ka Balang Presbyterian Mawlangwir, u T.Bn. O. Shylla ha ka jingïaseng por 10:30 mynstep u la pynkynmaw ba kum ka Balang ka la ïoh ban rakhe ïa ka Good Friday kaba bun ki la tip bha shaphang kane ka sngi ba kyrpang bad ïa ka jingmut jong ka sngi bad kumno kane ka sngi ba kyrpang ka la sdang bad ha ka jingkren jong u, ula shim na ka Shithi U Paul u Apostol sha ki Nong Rom 5:6 – 8 kaba ong, “namar U Khrist mynba ngi dang long kiba tlot bor, hamar kaba biang ka ïa ula ïap ïapli ïa ki bym riew blei.
Namar ym ju don eh u ban ïap ïapli ïa uba hok: hynrei lehse don u ban da nud wad ban ïap ïapli ïa uba bha sbun. Hynrei U Blei U pyni shynna ïa la ka jong ka jingieit sha ngi, ha kaba haba ngi dang long kiba pop, U Khrist Ula ïap ïapli ïa ngi”. Ha kane ka bynta ula ong ba don ar tylli ki daw ba U Khrist U pynpaw ïa ka jingieit kata (i) “Namar ma ngi ngi duna ka jingsngewthuh shaphang U Blei” bad (ii) U Blei U wat ban pynpaw ïa ka jingieit ba khraw sha ngi kumba U Blei Ula phah ïa la U khun ba la kha marwei sha kane ka pyrthei ban pynim ïa ngi ki nongpop kiba la jot la rem bad kiba la duh lehnoh ei ïa ka burom jong U Blei”.
Ha ka jingkren jong u Rev. N.F. Shangpliang ha ka por 1:30 nohphai sngi ula ong ba kane ka Good Friday ka dei ka sngi babha na ka bynta jong kiba ngeit bad kiba sngewthuh ba ki long ki nongpop bad kiba shem ïa ka jingkmen namar ka dei ka sngi jingsiew spah jong U Trai jong ngi U Jisu Khrist halor ka diengphna.