Press "Enter" to skip to content

Lum u Myntri ïa ka HLM ban bishar halor ka jingshah lyngshop ‘erïong ki longïing

Shillong, Ïaiong 19 : U Myntri ka tnad Revenue and Disaster Management, u ma Kyrmen Shylla u la lum ïa ka High Level Meeting (HLM) ha ka Sngi Palei ban bishar bad lum jingkhein halor ka jingduh bad jingjulor na ka jingshah lyngshop kiba bun ki long iing, ki shnong ki thaw ha ka eriong, phria bad slap ha kine ki khyndiat sngi ba la dep ha kane ka jylla Meghalaya.
Ha kane ka jingïalang ba la pynïaid da u myntri la ïadon lang u Chief Secretary, ki Commissioner of Division ba dei peit ïa ka Garo, Khasi bad Jaintia Hills Division bad kiwei kiwei ki ophisar jong ki tnad sorkar bapher bapher.
Kane ka jingjur jong ka eriong, slap bad phrïa ka la jia naduh ka 14 tarik ter ter haduh ka 17 bad kaba dang ïai bteng ruh haduh kine ki sngi ha ki katto katne ki jaka. Ha katei ka jingïalang u Addl. Chief Secretary ba dei peit ïa ka tnad Revenue and Disaster Management u la ai jingkhein malu mala halor ka jingjulor bad ka jingduh ki iing ki sem, ki skul, ki iing mane, ki post electrict bad ter ter na kane ka jingshah lyngshop ha ki bor mariang.
Nalor kane u myntri u la pan kaiphod ruh naman la ki District kata na ki Deputy Commissioner lyngba ka Video Conferencing.Kat kum ba la ïoh jingkhein malu mala ki don haduh 700 tylli ki shnong kiba la shah pynjulor, 10,554 tylli ki long iing, 100 tylli ki skul, katto katne ki iing mane, ki iing dorbar bad kiwei kiwei.
La bthah ruh ban ai jingïarap kyrkieh sha ki lanot khamtam ban ai ïa ki tarpal ba kin ïoh sop ïa ki iing jongki ban lait na u slap. Ki don tang lai ngut ki ba mynsaw ha ka jingshah lyngshop ha ki bor mariang bad halor kane la ai jingsumar ruh ïa ki ha ki hospital sorkar. Ka jingshah lyngshop ka la jia ha ri lum Garo, Khasi, Jaintia bad Ri Bhoi District.
La bthah ruh ïa ka tnad MePDCL da kane ka jingïalang ba kan peit bad ïarap ban pynbiang bor ding ïa kito ki shnong kiba la duh ne thut ka bor ding elektrik na kane ka jingshah pynjulor ha ka bor mariang. La bthah ruh ïa ki DC jong baroh ki district ba kin bthah ïa ki ophisar jongki ba kin long kiba la pynkhreh lypa khnang ba kin ïoh ban ai jingïarap kyrkieh ha kano kano ka por ba jïa kino kino ki jingjia ba sngewsih na ki bor mariang. Ha kajuh ka por la bthah ruh ïa ki DC ba kin ai jingkhein ba bniah halor kine ki jingjia khnang ba ka sorkar kan ïoh ban mang bad pynkhreh ïa ki jingai jingïarap ïa kito ki lanot na kane ka jingjia.