Press "Enter" to skip to content

Pynkhih biang ka SPA ïa ka bor synshar ha KHADC

Ha ka Executive Committee jong ka KHADC ha u snem 2017-’18, la mih ka jingïahuri hura kaba jur hapdeng ki MDC, namar ka skhim Special Plan Assistant (SPA) kaba 133 klur tyngka ba la ai da ka sorkar pdeng sha ki Autonomous District Council, ha kaba ka KHADC ka la ïoh ïa katei ka pisa.
Mynta ruh ka Executive Committee ba la ïalam da u Bah Teiñwell Dkhar ka la sdang ban khih biang, namar ka jingïasam ïa ka 34 klur tyngka kaba dei hi kajuh ka skhim ba la ai da ka sorkar pdeng ha ka por ba long CEM u Bah Pynshngaiñ N. Syiem. Ki MDC kiba don ha kane ka aïom ba mynta kiba dang shah jied dang kumba shi bnai mynta,ki la pynpaw ka jingbym sngewhun ïa ka rai jong ka Executive Committee ba la ïalam da ka UDP ha kaba ïadei bad ka jingsam ïa ka pisa ba 34 klur hapdeng ki 29 ngut ki MDC. Ka EC kumba la pynpaw khubor, ka la ïa sam mar 50 lak tyngka sha ki 29 ngut ki MDC, kaba baroh ka long 14.50 lak tyngka, na ka 34 klur tyngka. Ki MDC ki la pynpaw ka jingsngewbynñiaw ba na ka 34 klur, la ïasam tang mar 50 lak tyngka bad ka pisa kaba bun hi ka sah bad ka Executive Committee, kata haduh 19.50 klur tyngka.
Lada peit na kane ka rukom sam ka EC sha ki 29 ngut ki MDC, ka dei hok hi ba kin pynpaw ka jingsngew bynñiaw namar ba ka pisa kaba bun kam shym la leit sha ki, hynrei ka leit pynban sha ka pla tyngka jong ka Council na ka bynta ki jingdonkam jong ka. Dang kumba arsnem mynshuwa ka KHADC, kala buh bun ka pisa na ka bynta ki jingdonkam ka District Council ne ki asset jong ka Council. Haduh mynta kiba bun kine ki jingtei ne ki jingshna ki dang ïaid shaphrang bad ym pat dep. Nalorkata, ka KHADC ka la ïoh ban ban tei ïa kiba bun ki jingdonkam jong ka. Ha katei ka por ruh, ki MDC ki la ujor ba kim shym la ïoh marbiang bad dei kane kaba la pynlong ka jingïashrut kaba jur hapdeng ki para MDC bad ka la mh ruh ka jingïatied miej hapdeng katto katne ki MDC bad u CEM Bah PN Syiem.
Kane ka EC jong u Bah Teiñwell ruh ka la la leh kumjuh da kaba ai khyndiat sha ki MDC bad buh bun ka pisa shalade. Ha ka jingshisha ki MDC kum ki nongmihkhmat paidbah ki donkam khambun ka skhim namar ba ki mihkhmat ïa ki shnnong ki thaw bad ïa ki paidbah. Ki MDC kum ki nongmhkhmat paidbah ki donkam khambun ka skhim ban ïa ka Council kaban tei ïa kita ki iing ki sem bad ki jingdonkam jong ka. Hooid, ym lah ban len ba ka Council ruh ka donkam ïa kane ka pisa na ka bynta ka jingtei ïa ki ïing ki sem ne ki ophis bad kiwei kiwei pat ki jingtei. Hynrei balei pat ba ka pisa kan tam ïa kaei kaba u paidbah u donkam. Ki MDC kidei ki nongmihkhmat jong u paidbah bad kin hap ban peit shuwa ïa ka jingdonkam jong u paidbah. Ka Council ka lah ban shim khyndiat khynsoit na kane ka 34 klur tyngka bad kaba bun dei ban ai sha u paidbah.
Ka jingbakla jong kane ka Special Plan Assistant, ka long lehse ba ka guideline na ka bynta ban pyndokam ïa kane ka pisa kam shai bha, katno yn pyndonkam na ka bynta ki asset jong ka Council bad katno pyndonkam na ka bynta ka jingdonkam ki paidbah lyngba ki MDC. Kane ka wanrah ka jingsuba bad ka jingpynkharoi ïa ka jingsuba sniew, namar ki ban pyndonkam ïa kane ka 19.50 klur tyngka kidei hi ki dkhot jong ka Executive Committee kata ki 12 ngut ki MDC kiba don ha ka bor.
Lehse shuwa ban ïasam ne ban pynïabynta ïa kane ka 34 klur tyngka, kadei ban da don ka jingbatai kaba shai ne ka jingpyni lypa ïa ki projek ki ban pyntreikam, la ka long na ka liang ka Council ne na ka liang ki MDC ruh kumjuh, khnang ba kan wanrah ka jingïahun lang na baroh ki liang. Hynrei lym kumta kan jia biang kumba ka jia ha ka por jong u Bah PN Syiem, uba long u Chairman jong ka Council mynta. Kan paw ruh ka jinglehraiñ hakhmat u paidbah ba ki MDC ki ïakneh dohkyndang ïa ka pisa kaba la ai da ka sorkar pdeng.