Press "Enter" to skip to content

Shah jied ka Yolinda kum ka coach kynhun ïalehkai basketball ka East Zone ban ïakhun ha ka RF Jr NBA ha Delhi

Yn mih khmat ka Wanrikynti, Ibanakisaka bad u Yaman

Shillong, Ïaiong 19: Ka Yolinda Hynñiewta, ba dei kawei na ki baskeball coach ka tnat Sports ka sorkar jylla ka la shah jied ban long kum ka coach ïa ka kynhun jong ki thei ïalehkai basketball jong ka East Zone ban ïakhun ha ka wat ïalehkai ba khatduh jong ka RF. Junior National Basketball Asso-ciation, kaban long ha Delhi naduh ka 25 tarik mynta u bnai.
Nalor kaYolinda ka khubor ba sngewtynnad ka long ba la don pat sa lai ngut ki nongïalehkai ba kynthup ar ngut ki khynnah kynthei bad uwei u shynrang kiba la shah jied ban ïadon bynta land bad kane ka kynhun kaban ïakhun ha kane ka lympung ïalehkai basketball.
Haba ïakren bad u Mawphor, na ka liang kaYolinda ka ïathuh ba ka jingshah jied ka jong ka lem bad kine ki lai ngut ki khynnah ka dei hadien ba ki la leit sha ka jingpyrshang kaba la long ha Kolkata.
“Ka RF. Jr NBA ka la wan ba kan pynlong ïa ka lympung ïalehkai ka jong ka hangne ha nongbah Shi-llong ha ka 27 tarik u bnai Lber ba la dep, dei na kane ka lympung ïalehkai ba ki bor pynïaid ki la jied ïa hynñiew ngut ki khynnah ban ïashim bynta sha ka jingpyrshang (try out) kaba la pynlong ïa ka ha Kolkata kaba la long ha ki lai sngi, kata ha ka 11, 12 bad ka 13 tarik mynta u bnai Ïaïong”, la pynpaw ka Yolinda.
Ki kyrteng jong ki khynnah ka jylla kiba la shah jied ban mihkhmat ïa ka East Zone sha kane ka lympung ïakhun ban long pat ha Delhi ki kynthup ïa Wanrikynti Kurbah ba la mihkhmat ïa ka kynhun jong ka Ene Ballers Academy Mawngap bad Ibanakisaka Basaiawmoit ba la mihkhmat ïa ka Touchline bad u Yaman Rana ka skul St Anthony’s.
“Ka long ka burom kaba khraw ym tang ïa nga hynrei ïa baroh lang kiba ïa don bynta bad ka jingïalehkai basketball ba ki bor ba dei khmih kane ka lympung ïalehkai ba ki la ibit ïa nga bad ïa kine ki lai ngut ki khynnah ban don bynta bad ka kynhun jong ka East Zone kaban ïakhun ha kane ka lympung, kaba long shisha ka kabu ksiar ïa ngi lang baroh ban pynpaw ha khmat ka ri ba haduh katno ki khynnah ka jylla ne na kane ka thaiñ ki don ha ki ïa kata ka sap ha ka liang ka basketball”, la pynpaw ka Yolinda.