Press "Enter" to skip to content

Ym pat pyllait ka Assam ïa u rang bah ba shah kem na Huhuapara

Nongstoiñ, Ïaïong 19: Ki pulit Assam kiba la kem bad rah ia u Purno A Marak ha ka sngi ba ar jong ka taiew na shnong Huhuapara, kim pat pyllait satia ia u haduh mynta. La suba jur ruh ba u don mynta ha along bad shah rah shaduh iingbishar ha Guwahati.
Katba na ka liang ki paidbah jong ka shnong Huhuapara, haduh mynta ki dang don ha ka jingbym shngaiñ ha ka shong ka sah namar ka jingbym pat sngew thikna ïoh lehse ki pulit Assam ki lah ban wan pyndik biang ïa ki ha kano kano ka por.
Haba pyrshang ban ïakren bad ki katto katne ki rangbah shnong lyngba ka telephone, ki la ïathuh ba ubah Porno A Marak uwei na ki saw ngut ki rangbah kiba la shah kem ha ka janmiet sngi ba ar na katei ka shnong, um pat lait satia na along ki pulit Assam. Ki la ïathuh ba na ka liang ka shnong bad kiba ha ïing ha sem kin sa phah ïa ki katto katne ngut ki rangbah ha kine ki sngi ban wan ban leit sha Guwahati ban bah jamin, khnang ba un lait noh na ka kti ki pulit.
Kitei ki rangbah ki la ong ruh ba na ka liang jong ki, ki sngew dei ban dawa jur ïa ka sorkar ba kan plie noh kloi katba lah ïa ka Police Out Post ha katei ka jaka, khnang ba ki paidbah kin ym shah pyndik palat ha ki pulit Assam. Ki la ong ruh ba u Myntri Rangbah barim ka jylla haba u wan ban ïalap election ha Malangkona, u la ong ban buh noh da ka ktem pulit ba pura ha Malangkona. Hynrei haduh mynta katei ka jingkular jong u kam shym la urlong satia. Ki la bynrap ruh ba ka jingkylla phetwir jong ki paidbah katei ka shnong ha u snem ba la dep, na ka jingshah khynra ha ki pulit Assam, ka dei na ka daw jong ka jingbym don ïa ka ktem pulit jong ka Meghalaya ha katei ka jaka. Ki la ong ruh ba ha ka jingshisha ha ki snem kiba kham mynshwa ka la don ka Police Out Post ha Malangkona. Hynrei lyngngoh ba ym ju iohi pulit shuh satia kiba don ha katei ka jaka lane la pynkynriah noh sha kiwei ki jaka ruh ym don jingtip thikna ne kaba shai.
Kitei ki rangbah ki la ong ba ka sorkar Meghalaya ka la dei ban leh ei ei ïa ki riew shim kabu kiba bam ar maloi ha katei ka thain. Namar ka jingdon jong ki ka dei ka daw bah daw san kaba la pynlong ïa ka sorkar Assam ba kan ïaleh ban klun beaiñ ïa kiba bun ki jaka ki puta kiba dei hok kiba hap hapoh u pud u sam jong ka Meghalaya.