Press "Enter" to skip to content

Ar kol thep u Bynraplang, liem noh ka Young Bros da 4 – 0 kol ha ka Photjaud Riwar FC

Mawkywrat, Ïaïong 21: U Bynraplang Thongni u khynnah ïalehkai jong ka Photjaud Riwar Football Club ha ka lympung ïalehkai jong ka Semi Final ki khynnah synrang kaba dei jong ka South West Khasi Hills Zone/Block & District Under-12 Chief Minister Open Football Tournament 2019 ba la pynïaid da ka office jong u DSO, South West Khasi Hills District ula ïoh ban thep ar tylli ki kol ha kaba la pynlong ïa ka kynhun ban poi sha ka final ha ka jingïakhun pyrshah bad ka Young Bros Football Club da kaba la ïoh ban khur 4 – 0 kol hapoh madan MDSA, Mawkyrwat.
Haba phai ha ka jingïalehkai ha kaba ka Photjaud Riwar Football Club ka la poi sha ka Final ka dei hadien ba ka la ïoh ban thep haduh 4 tylli ki kol pyrshah ïa ka Young Bros Football Club ha kaba u Vickystar Khardewsaw ula ïoh ban thep ïa ka kol kaba nyngkong ha ka minit kaba 8, u Denboklang Lyngkhoi ha ka minit kaba 29 bad u Bynraplang Thongni ha ka minit kaba 23 bad 34.
Katba ha ka jingïalehkai hapdeng ka Mawlangwir Sports Club bad ka Young Bros Football Club, ïa ka nam jingjop la rah da ka Mawlangwir SC ha kaba ka la ïoh ban thep 1 – 0 kol lyngba u Emonbhalang Wanniang ha ka minit kaba 47 bad pynlong ba kane ka kynhun kan poi syndon sha ka final ha kaba kan sa ïakhun pyrshah bad ka Photjaud Riwar FC ha ka 22/04/2019 por 1:30 janmiet.
Na ka liang ki kynthei pat ka Mawlangwir Sports Club bad ka Mawten Sports Club kin sa ïakhun final ha ka 22/04/2019 por 12 baje shiteng sngi ha ka juh hi ka madan.