Press "Enter" to skip to content

Suba jur ka sorkar Srilanka ba pyn bthei bom ka Seng lehnoh Muslim

Colombo: Wat lada ym pat shym la don mano mano haduh mynta ba kam ïa ka jingpynbthei bom ba shyrkhei ha Srilanka kaba la jia ha Sngi U Blei, hynrei ki bor sorkar jong ka ri Srilanka, ki suba jur ba dei ka National Thowheeth Jama’ath (NTJ), ka Seng lehnoh Muslim kaba na Srilanka hi. Hynrei ha kajuh ka por ki bor sorkar ki suba ka don ruh ka jingïatreilang bad ki bor kiba nabar ri.
Halor kane ka jingjia kaba la wanrah ïa ka jingïao kumba 290 ngut, da ka jingkiew biang ka jingïap mynta ka sngi, ki ri na kylleng ka pyrthei ki la pynrem jur ïa kane ka kam bymman, kaba la pynïap ïa ki myniem ba lui lui.
Napdeng ki briew kiba nabar ri kiba la ïap ha kane ka jingjia, ki kynthup ruh ïa lai ngut ki nong India, ïa kaba la pynthikna ruh da ka myntri kam kar ri jong ka ri India, ka Sushma Swaraj.
Kane ka jingjia, ka pynkynmaw biang ruh ïa ki 37 tylli ki snem ba ngiew ïa ka Srilanka, lyngba ka jingïakhih ki lehnoh Liberation of Tigers Tamil Elam (LTTE) ha kaba ka la ïakhun ban dawa laitluid ïa ki jaidbynriew Tamil kiba don ha Srilanka. Kane ka thma ki LTTE ka la kut mynta dang kumba shipheew snem. Hynrei hadien kane ka la mih ka thma pohïing kaba ju jia khah khah hapdeng ki jaidbynriew kiba dei na ka kynhun niam Buddhist bad kynhun niam Muslim.