Press "Enter" to skip to content

Ba kheiñ sting ka Sorkar ban pynshai ïa ka DBT, duh ki lanot ïa ki song jingïarap

Shillong, Ïaiong 25: Watla ka Jylla ka ju mad manla u snem ïa ka jinglynshop jong ki bor ka mariang kum ka eriong ne u phria ba pynjulor ïa ki jingthung jingtep bad ïa ki Ïing ki sem hynrei namar ka jingkheiñ sting jong ka Sorkar ïa ka Direct Benefit Transfer (DBT), bun ki song jingiarap kim ju poi satia sha ki lanot.
Ka jingkheiñ sting jong ka Sorkar Jylla ka long halor ka jingtlot ban ai jingpynshai sha u paidbah shaphang ka DBT kaba la pyntreikam da ka Sorkar Pdeng.Kat kum ki kyndon jong ka DBT, la khang pyrshah ban ai da ka pisa sha ki nongïoh skhim hynrei la ong ba ki nongïohskhim ki dei ban don ïa ki Bank Account ban ïoh pynthep ïa ka pisa beit beit sha ka Account jong ki.
Na ka jinglynshop jong u phria tang ha Mawshynrut C&RD Block ba jia ha u snem 2018, na ki 1149 tylli ki Longïing ba dei ban ïoh ïa ki song jingiarap, haduh 346 tylli ki Longïing kila sah ha ka umdum balei ba kim shym la ïoh satia ïa ka jingiarap kat haduh mynta mynne.
Kawei na kine ki Longïing ba shah ieh ka dei ka Ïing jong u Bah Crispin Iawphniaw uba la 83 snem ka rta, uba dei na ka Shnong Riangdo kaba hap hapoh ka Mawshynrut C&RD Block bad kane ka jingbym ïoh jong u ïa ka song jingiarap ka pyni shai kdar ïa ka jingtlot ka rukom treikam jong ka Sorkar Jylla.
U Mawphor uba la hiar sha Riangdo ban ïakynduh ïa une u Rangbah bad i Kurim ba 73 snem Kong Celina Marbaiang, kiba la tynrong hala ka jong ka tyrpeng ban ri ïa ki 4 ngut ki Khun Ksiew ba sah khun swet. Hynrei, ïasangsot ba kine ki shi kurim haduh mynta ki dang sah ha ka Ïingtin ba la pei thliew na ka jinglynshop jong u phria ha u bnai Lber 2018.
“Ngam lah ban shemphang balei ba ngam ïoh ïa ki tin CGI. Kaei kaba nga tip ka long ba ki don katto katne ki briew kiba la wan jngoh ïa ka Ïing jong ngi bad nga la ïoh tang 4 kilo u khaw bad 2 kilo u phan hadien ka jinghap phria” ong u Bah Crispin uba ïathuh ba kane ka Ïing bala sop da ka tarpolin rong blue, ba ki ïashong ïasah ka dei ka ïing jong ka Khun kaba la khlad noh bad ieh shadien ïa ki 4 ngut ki Khun.
Arngut na kine ki Khun ksiew kila lah ban kyrshan dalade ryngkat ka jingiarap jong ki paralok ban ïoh leit skul, hynrei u Bah Crispin bad i Kurim ki ïashong bad ri ïa i Khun Kynthei ba khatduh khlem kano kano ka jingkhuslai ïa ka Ïing ba pei thliew.
U Block Development Officer ka Mawshynrut Bah Tulbicent S Diengngan haba kylli shaphang ka song jngiarap ba dei ban ïoh da u Bah Crispin, ula ong ba ka Ophis kam shym la peit shiliang khmat haba ai song jingiarap sha ki lanot ba shah lynshop ha ki bor ka mariang. U ong “Ngi pynthikna ba baroh ki briew ba shah ktah na ka jinglynshop ka eriong ne phria, kin ïoh ïa ka jingiarap kat kum ka jingdon pisa”.
Haba kdew ba ïa ka song jingiarap kaba dei da ka pisa la ju pynthep beit beit sha ki Bank Account jong ki Lanot, u Bah Diengnga u ong ba ïa ki tinCGI la ai sha ki Ïing kiba la jubor ka jingjulor. U ong ba kat kum ka jinglum jingkheiñ jong ka Ophis ha utei u snem, ka Ophis kala tyrwa ban iarap song pisa haduh T. 4800 sha u Bah Crispin.
Na ka Ophis u Deputy Commissioner ka West Khasi Hills, la ïoh ïa ki kot ki sla kibakdew ba nalor u Bah Crispin, ki dang don ruh sa kumba 346 ngut ki Longïing ki bym pat ïoh pdiang satia ïa ka song jingiarap hadien ba lynshop u phria ha u snem 2018.
Kat kum ka jingïathuh ki Ophisar, “u Bah Crispin u khlem lah satia ban ai ïa ka Bank Account number bad ula dei ban ïoh ïa ka song pisa ba T.3200 kum ka jingiarap. Hynrei ïa ka tin CGI, kat kum ka kaiphod ba leit lum jingkheiñ, la kheiñ ba ka ïing jong u ka julor malu mala”. Hynrei ka Ophis kala ai jingkular ba kan sa khmih bniah ïa ki jingduna bad ban pynthikna ba ki lanot ki dei ban ïoh ïa ka hok jong ki.
Kat kum ka jingong jong ki “Nalor ka jingsam pynkhuid ïa ki song jingiarap sha ki longïing ba shah ktah na ka jinglynshop ka eriong mynta u snem, ngi hap ruh ban dang pynkhuid ïa ki song jingiarap ba dang sahteng. Ka jingeh hangne a long ba bun ki briew ha Nongkyndong kim don satia ïa ki Bank Account bad lada ki don ruh, ki don ki khep ba ki bakla ban ai ïa ki number” bad bynrap “Kane ka dei ka jingeh ïa ngi”.
Kat kum ka kaiphod, 1489 ngut ki Longïing hapoh Mawshynrut Block kiba shah ktah na u phria ba lynshop ïa ka West Khasi Hills ha ka 30 tarik Lber 2018 hynrei napdeng kine, 125 tylli ki Longïing kila ïoh ïa ki tin CGI bad 1143 kila ïoh ïa ka song pisa na ka T. 47.64 lak bala ai da ka State Revenue and Disaster Management.