Press "Enter" to skip to content

Dheng kali bun kynta ha surokbah ba shlei um ka shnong Mynkre

Khliehriat, Jymmang, 01: Ka jingther jong u lapbah uba jur ha ka shnong Mynkre, East Jaiñtia Hills District naduh hynnin ka sngi baar uba dang ïai bteng haduh mynta ka sngi balang, u la pynsyrtok ïa ki paidbah nongleit nongwan kiba ïaid lyngba na ka surokbah National Highway jong ka shnong Mynkre, East Jaiñtia Hills ki la ïakynduh mawsiang na ka jingdheng kali kaba bun bun kynta namar ka jingshlei um kane ka surokbah.
Bun tylli ki kali rit bad ki kali heh ki la sahkut ha kane ka jingdheng kali namar ka jingshlei um jong kane ka surok.
Ka jingshlei jong kane ka um ka la ktah ruh ïa ki dukan kiba don ha rud surok bad ïa ki iing briew kiba lad ïa ka jingshlei um. Kane ka jingdheng kali ka la jia naduh ka por 8:00 baje mynstep haduh ka por kumba 3:00 baje nohphai sngi.
La ong ruh ba ha kane ka jing shlei um ka surok, kam shym la don kano kano ka jingwan jngoh ne jurip na ka liang ki bor pynïaid ka kompani kaba shna ïa ka surok ban pyntuid ïa ka um kaba la shlei ha shilynter ka surokbah.
Hynrei la don tang ar ngut ki Pulit bad u samla Wanshwa Suting uba na ka shnong Mynkre kiba la ïaleh shitom katba lah ban pynïaid beit ïa ka um sha ki nala tuid um.