Press "Enter" to skip to content

Ïalehkai ki Doktor NEIGRIHMS bad ka ïap ka im ki paidbah ba phah sumar

Kynnoh ki bor pynïaid ba die beaiñ ïa ki dawai

Shillong: Ka kynrum kynram ha ka hospital NEIGRIHMS, ki la nang ïai heh katba nang mih ki sngi, na ka daw ka jingïakynad hapdeng ki bor pynïaid bad katto katne ki Doktor, khamtam na ka Cardiology Department,kaba lah ban ktah ruh ïa ka ïap ka im ki paidbah.
U Head of Department (HoD) jong ka Cardiology, u Dr. Animesh Mishra, naduh ka sngi ba ar, u la sangeh treikam bad ban sumar ïa ki briew ba pang klongsnam na ka daw ba ki bor pynïaid ki la bat ïa uwei u briew ba ju wan die ïa ki tiar sumar lyngba ka jingai jingbit jong u. Kane ka jingsangeh treikam une u Doktor, ka la ktah ïa kiba bun ki paidbah ba wan shim dawai bad phah sumar ha katei ka Department.
Ha ka khubor ba la phah da u Public Relations Officer (PRO) ka NEIGRIHMS, la ong ba u HoD jong ka Cardiology um shym la treh ban ïatreilang bad ki bor pynïaid ka Hospital ha kaba sumar ïa ki nongpang klongsnam kiba wan na ki longïing baduk kaba long katkum ka jingbthah ka Ministry of Health and Family Welfare jong ka sorkar pdeng, kata ha kaba thied ïa ki tiar sumar (stents/pacemakers) bad ki dawai ban thied ïa kine ki tiar bad ki dawai na ka Amrit Pharmacy, kaba la buh ha ka dor kaba kham duna bad lada jia ba kine ki tiar ne dawai kim don ha Pharmacy, ka Amrit kan pynïoh ïa ki hapoh 48 kynta.
Kane ka kyrwoh ka ong ruh ba ki la don artylli ki shithi ujor na ka ophis jong u Prime Minister (PMO) sha ka Ministry of Health and Family Welfare ïa kaba la phah ruh sha NEIGRIHMS halor ka jinghap thied ki nongpang ha ka dor kaba rem ïa ki tiar sumar bad ki dawai na ki briew ba shu wan tyrwa ha ka Hospital.
Hadien kane, u Director, u la thaw ïa ka Komiti, ha kaba la bthah ïa baroh ki Department ba kin phah ïa ka jingdonkam ki tiar ki tar sumar bad ki dawai, khnang ban ïoh bthah ïa ki paidbah ban thied ïa ki na Amrit Pharmacy kaba la die ha ka dor kaba kham duna. Hynrei namar ka jingbym ïatreilang u HoD ka Cardiology, ïa ka list ki dawai bad ki tiar sumar ym shym la lah ban pynkhreh. Dang shen ki bor pynïaid ka NEIGRIHMS, ki la pynbna ïa ka jingbthah na kaMinistry of Health and Family Welfare jong ka sorkar pdeng kaba la bthah ïa ki nongpang ban thied ïa ki dawai ba rem na ka Amrit Pharmacy, kaba la buh ha katei ka Hospital hi namar ka dor ka kham duna. Shuh shuh ka Joint Secretary jong ka Health and Family Welfare, ka Gayatri Mishra, ka la phah ïa ka shithi na ka Parliamentary Committee kaba ong ba ki Hospital kum ka NEIGRIHMS, kidei ban peit ba ki nongpang kim dei ban thied ïa kine ki dawai bad ki tiar sumar ha ka dor kaba rem bad lada ki bor pynïaid kim lah ban teh lakam ïa kane, ka mut ma ki ruh ki ïadon bynta ha kane ka jingpynïaid ïew beaiñ ïa ki dawai rem dor.
U PRO, u la ong ruh ba wat hadien arsnem ba la pan ïa ka jingïatreilang na u HoD ka Cardiology, hynrei kim shym la treh ban ïatreilang, pynban kane ka Department ka la bthah ïa ki nongpang ban thied ïa kine ki tiar bad ki dawai na ka dukan Sanjo Medical, kaba die ha ka dor kaba rem. Kane ka dukan ka dukan ryngkat ka jingïatreilang bad u HoD Cardiology ka ju phah ki briew jong ka mynstep ban leit die ha ki nongpang ha Cath Lab ha ka dor kaba rem.
Shuh shuh ka kyrwoh na u PRO, ka kynnoh ruh ba ha ka 30 tarik u bnai baladep, u Director ka NEIGRIHMS, katba u dang ïaid peit kam hapoh Hospital, u la lap ïa kine ki briew kiba la rah saw tylli ki pla kiba don kine ki tiar sumar bad ki dawai ban leit sha Cath Lab. Haba u la ïohi kumne,  la phah bat ha ki bor pahara ka Hospital bad hadien kane la phah ïa ki sha u Chief Security Officer and Chief Vigilance Officers ka NEIGRIHMS kiba la shimkhia bha ïa kane ka rukom die dawai beaiñ, wat hapdeng ka jingbthah ka sorkar pdeng.
Namar kane ka jinhleh ki bor pynïaid, u HoD Cardiology, haba u la sngewthuh ba ula ngat ha ki kam beaiñ, u la thaw jingklumar da kaba sangeh ban peit bad sumar ïa ki nongpang bad kynshoit ruh ïa ki nongpang ban ïeng ïaleh pyrshah ïa ki bor pynïaid ka Hospital.
Na ka liang u Director haba ai ka jingmaham ïa u HoD ba um shim ka jingkitkhlieh ïa kino kino ki jingjia ha ka Department, u kyntu ïa ki paidbah ba kin ïatreilang na ka bynta ka jingïaid beit ka Hospital khamtam eh ha ka Cardiology Department.