Press "Enter" to skip to content

Lap ka KHADC ba bun jyrwit jyrwat ka Notification Building Bye-Law ka Sorkar

Shillong, Jymmang 01: Ka Khasi Hills Autonomous District Council (KHADC) kala pynpaw ïa ka jingeh ban thaw ïala ka jong ka Building Bye-Laws ban ai jingbit shna ïing hapoh ki jaka Sixth Schedule namar ka jingshem ba bun ki jyrwit jyrwat ha ka jingpyn bna (Notification) bala pynmih da ka Sorkar Meghalaya Democratic Alliance (MDA).
“Ngi la pule bniah ïa ka Notification jong ka Sorkar ba pynmih ha ka 1 tarik Rymphang 2019. Ngi lap ba ki don bun bha ki jyrwit jyrwat” ong u Bah Paul Lyngdoh, Executive Member i/cTown Committee haba ïakren bad ki lad pathai khubor hynne ka sngi balang.
Haba pyntip ba ka Executive Committee jong ka United Democratic Alliance (UDA) ba long hynne ka sngi kala ïakren sani ïa kane ka kam, u Bah Paul u ong “Kawei na ki jingwit jyrwat ka long ba ka Bye-Laws 2011 ka kren beit thik tang ïa ki Municipal Area bad ki Scheme Area khlem da kren eiei ïa ki jaka ba hap hapoh ki ADC”.
“Namar kata ngim lah ban ïaid shakhmat na ka bynta ban thaw ïa la ki jong ki Bye-Laws ha ka nongrim jong ka Notification ba pyn mih da ka Sorkar ha ka 1 tarik Rymphang 2019” ong une Myntri barim ka Sorkar Jylla ba khmih ïa ka tnad pynroi sor.
Kat kum ka jingong jong u, ka Executive Committee kala poi ïakren ïa kane ka mat halor ka jingïoh pdiang ïa shibun ki jingud jingnam jong ki Bank ba ki Bank kim pyllait satia ïa ki ram namar ka jingpan ïa ki No Objection Certificate (NOC) la ka long na ka Meghalaya Urban Development Authority (MUDA) ne na ka KHADC.
U Bah Paul u ong, “Kat kum ka Notification ba 1arik Rymphang 2019, ka MUDA kala kdew shai ba ïa ki jaka ba hap hapoh ki ADC, ka bor ban ai jingbit ïa ka jingshna ïing (Building Permission) kin dei ki ADC”.
Halor kane, u Bah Paul u pyntip ba ka Executive Committee (EC) kala rai ba ki Tnad ba dei khmih ïa kane ka kam naduh ka Town Commitee, ka Law, Land, Elaka bad baroh ki Executive Member (EM) kin sa shong jingïalang ha ka taiew ban wan ban buh jingthoh ïa ki jingsngew bad ïa ki nongrim ba ka Council ka ieng na ka bynta ban leit ïakren bad ka Sorkar Jylla. “Ngin pynsngew ïa ka Sorkar Jylla ba kan ym pynlong ïa ka Notification ba 1 tarik Rymphang 2011, kum ka nongrim na ka bynta ban ïakren halor ka jingphiah ïa ka bor ban pyntreikam ïa ka Building Bye-Laws hynrei ban don pat da kawei ka nongrim,” ong u Bah Paul Lyngdoh.