Press "Enter" to skip to content

Mad jingeh ki nongtrei sorkar ba la shongthait ba thurmur treikam ki Ophis

Nongstoiñ, Jymmang 1: Ka jingbym bud ryntih ïa ki aiñ ki kyndon ba la buh katkum ka Service Rules ïa ki Nongtrei kam sorkar, ka la wanrah jingeh ynda la dei ka por shongthait ban ïoh kloi ïa ki pension jong ki, ne ki lok ki khun jong kiba ïap ha ki por ba dang trei, kaba ju ong ka ‘Family Pension’.
Kum kine ki jingeh la ju kham jia la jan ha man ki Office ka West Khasi Hills District bad la ïoh jingtip ruh halor kane na ki Head Department (Directorate Offices) bad Accountant General (AG).
Khyndiat eh na ki Department ha West Khasi Hills, kiba ju lah ban pyndep hok ïa ki Pension, Family Pension katkum ba la buh da ka rule, kata tang hapoh ar ne lai bnai. Kum kane ka rules ka la don ruh ha ka Ruling jong ka Supreme Court ha ka Special leave Petition (Civil), No. 9425 of 1984, kaba la kdew shai kdar ba lada slem palat ar bnai yn hap ban  siew ruh ïa ka sut ïa ki Nongïoh pension. Hynrei ïa kane ym don ba patiaw satia bad barabor la ju shim por haduh saw san snem.
Ki daw jong ki jingpynslem baroh ki long namar ki jingbym biang ki kot ki sla kum ki Service Books, ACP, LPC, IPS. La hap ban kynnoh ba dei namar ki jingbym leh kit khia ban pynbiang lypa katkum ba la bthah ha ki rules ba la buh khnang na ka bynta jong ki. Hynrei kiba kham jia eh ki long ba ki ju khohreh sa tang ynda la dei ka por. Ïa ki jingpynslem namar kine ki daw, la mih ruh ka jingshah kynnoh khongpong na ki heh Department, ïa kiba dei ïoh Pension, ba dei ki jingpynslem hi ïa ki kot ki sla kiba donkam ban pynpoi ha ki Office. Hynrei ki jingshisha baroh ym shym la dei kumta.
U nongïoh pension barabor um tip ei ei shaphang ki kot ki sha la biang ne bym bïang, namar la shaniah ha ki Nongtrei Establishment kiba dei leh na ka bynta ki jingdonkam ha ka Pension. Ha kaba ïadei bad ki Family pension haba ïap ha ki por ba dang trei, la dei ban sngewthuh ba kiba ha ïing kiba ju shet ja ha ïing kin tip aiu ïa ki jingdonkam, hynrei dei ban hikai ïa ki khlem khñium ei ei ïa ki jingbym tip jong ki. Ki jingleh sting ban pynslem ban ïoh ïa ki hok jong ki, ka poi sha ka jingduh ja, duh phah skul ki khun, klumar jingmut ha ïing ha sem.
Dang ha u snem 2018-2019, ar ngut ki Nongtrei sorkar kiba bym kwah ban pynpaw ïa ki kyrteng bad office jong ki, kiba trei hi ha ki post Regular, Sanctioned post (Pensionary Establishment), la len noh ïa ka hok jong ki ban ïoh pynsion. Ynda haba bishar bniah ïa ki daw pat, ki long tang namar ba ka Office kam shym la leh ei ei ha ki por ba sdang eh ka service jong ki ban leh kumba la kwah da ka rules thung kam ne promotion.
Kum kine ki jingjia lah ban ong ba ki long tang ka jingsdang hapoh kane ka District, namar bun bah ki kynrum ki kynram ha ki Nongtrei office kiba dang sah kut khlem pynbeit katkum ki rules ba la buh. Kiba khambun eh ki dei kiba trei Casual, Regular Casual workers, Work charge, Adhoc, Khalasis, kiba khlem pynbiang ïa ki kot ki sla haduh mynta.
Ka jingïakynduh jingeh na ka por sha ka por ïa ki Nongtrei sorkar, la mih ruh ki jingkynnoh ba bym lah pyndep kam namar ba dei na ki daw jong ki jingbym wan trei tikna ki District Officer, UDs/Accounts ha ki office ba ki trei. Khamtam eh ha ki sngi nyngkong bad sngi thohdieng, ba ki dei ma ki, ki ban ïalam ïa kiwei pat ki nongtrei. Ki jingbym poi hok katkum ki por trei, bad ki jingbym don kino kino ki jingduhnong ïa ki ha ki liang jingsiew, ka la pynlong noh ka jingmlien ïa ki.