Press "Enter" to skip to content

Rai ka KHADC ban leh ‘Digital’ ïa ka jingai Trading Licence sha ki bar jylla

Shillong, Jymmang 01: Ka Khasi Hills Autonomous District Council (KHADC) hynne ka sngi kala rai ban leh ‘Digital’ noh ïa ka jingai Trading Licence bad ban pyndonkan noh ruh da ki ‘Sticker Licence’ ban tehlakam ïa ka jinglait tuh ka khajna bad ka jingkhaii be-aiñ jong ki Nongkhaii Bar Jylla.
Ka KHADC kala shim ïa kane ka rai ha ka jingïalang jong ka Executive Committee (EC) ka United Democratic Alliance (UDA) ba long hynne ka sngi Balang. Kane ka jingïalang kala rai mynjur ruh ïa ka jingtyrwa jong ka Tnad Trade ban pynkiew noh ïa ka jing siew jong ka bai Trading Licence ka ban treikam naduh ka 1 tarik Ïaiong 2019.
Haba ïakren bad ki lad pathai khubor hadien ka jingïalang, u Bah Paul Lyngdoh Executive Member (EM) I/c Trade, ula ong “Ka Executive Committee kala mynjur ïa ka jingtyrwa ban leh ‘Digital’ noh ïa ka rukom pyntreikam ïaka Trading Licence bad ban ai noh ruh da ki Sticker ïa ki Nongkhaii ba kin buh ha ki dukan jong ki”.
“Ki Nongkhaii kin hap ba wan sha Ophis ban thep application na ka bynta ka trading Licence bad ban aiti lang ruh ïa baroh ki kot ki sla ba donkam. Hadien kane, ka Ophis kan sa pynrung ïa kine ki application ha ki kor Computer bad kan sa pyntyllun shakhmat ïa ka kam bad shisien ba ngi rai ban ai ïa ka Licence ngin sa ai ruh ïa ki Sticker ba kin tah ha ki dukan jong ki” ong u Bah Paul Lyngdoh.
Kat kum ka jingong une u EM, da kaba leh ‘Digital, ka jingmyntoi ïa ki Nongkhaii ka long ba kan pynsuk ïa ka rukom applai Licence bad ban pynaram ruh ïa ki ban lait na ka jingwan arsien lai sien sha Ophis tang na ka bynta kawei ka kam. U ong “Kane kan pynthikna ruh ïa ka jingrai sted halor ki application bad kan tehlakam ïa ka jinglaittuh ki khajna jong ka Council”.
Haba pyntip ba ki Nongkhaii kin sa lah ruh ban leh Online (lyngba ki kor Internet) haba siew ïa ka bai licence, u Bah Paul u ong, “Ka Tnad kan dang pykhreh mynta ha kaban pynbit pynbiang na ka bynta ban leh ‘Digital’ ïa kane ka kam”.
Ha kajuh ka por, u Bah Paul Lyngdoh u pyntip ba ka Executive Committee kala mynjur ruh ïa ka jingtyrwa ban ithuh noh sa kumba 31 tylli ki kam khaii ban pynhap lang ïa ki hapoh ka KHAD (Trading by Non Tribals) Regulation Act 1954 ki bym pat pyn hap satia baroh shikatta.
Kat kum ka jingong jong u, kine ki 31 tylli ki kam khaii ki kynthup ïa ka Chemical Based Industrial Manufacturing Unit, Captive Power Plant Industrial Unit, Mineral in Export an Import da ki kompani ba heh ka Ri bad bar Ri lem bad kiwei kiwei.
Haba pyntip ba ka Executive Committee kala mynjur ruh ïa ka jingtywa ban kyntiew noh ïa ka jingsiew jong ka bai Trading Licence kaba shong kat kum ki jait kam khaii, u Bah Paul ula ong “Kumba nga la kular hapoh ka Ïingdorbar halor ka jingdonkam ban pynbha bad pynkhlaiñ ïa ka Tnad Trade, ka jingpynkiew ïa ka jingsiew jong ka bai Licence ka dei kawei ka mat bala shu ieh. Ka jingpynkiew ïa ka jingsiew ba khatduh eh ka dei ha u 2005 kaba long 14 snem mynshuwa”.
U Bah Paul u pyntip ba ha kane ka jingpynkiew ïa ka bai Licence, ka Council kala mynjur ba na ka bynta ki karkhana ne ki kompani, ka jingsiew na ka bynta ka Trading Licence kan kiew haduh 150% haduh 200 % eiei.
“Namar ka jingbym pynthymmai ïa ka jingsiew ha ki 14 snem, kala ktah shibun ïa ka jingtreikam jong ka Tnad..Kawei kaba ktah jur eh ka dei ka jingtlot ha ka jingïoh lum khajna kaba la pyntlot ruh ïa ka jingtreikam jong ka Aiñ” ula ong bad bynrap “Ngi lap ba da ka jingtlot ban pyntreikam ïa ka Trading Licence Act, mar shiteng na ki Nongkhaii kim ju applai licence ne pynthymmai ïa ki Licence da kaba pyndonkam ïa kajuh ka Licence bala pynthymmai saw ne san snem mynshuwa”.
U Bah Paul u ong, ban pynthikna ba ka tnad kan lah ban pyntreikam bha ïa ka Aiñ jong ka, la donkam ban pynkhlaiñ ïa ka Enforcement Wing bad ban leh ïa kane, ka long kaba donkam ban pyrkhat thymmai ïa kiei kiei baroh.
“Namar kane, ngi la wanrah ïa kine ki jingtyrwa” ula ong haba ïathuh ba da ka jingpynkiew ïa ka bai Licence, ka Tnad ka khmih lynti banïoh lum khajna ym duna ïa ka T 2 klur shisnem na ka Trading Licence. U ong ba ha u snem bala lah, ka Tnad ka ïoh lum khajna tang T. 1 klur.