Press "Enter" to skip to content

Sha Assam phah thwet ka Meghalaya ïa ki suba nong pynïap nongtrei ka FCI

Shillong, Jymmang 01 : Ka sorkar Meghalaya lyngba ka tnad Kampohïing jong ka Jylla ka la pan jingïarap na ka Assam ban ïoh thwet bad kem syndon ïa ki saw ngut ki briew kiba suba donkti halor ka jingnïap jong uwei u nongap pahara jong ka FCI ha Khanapara ha kine ki khyndiat sngi.
“Kitei ki sawngut ki suba ki dei ki nongshong shnong jong ka Assam, kumta ngi la phah pynmih ïa ki dur jong ki ha ki kot khubor jong ka Assam khnang ba yn lap dien bad ïoh kem noh ïa ki,” ong u Myntri ka tnad Kampohïing ka Jylla, James K Sangma haba kren bad ki lad pathai khubor hadien ka jingkynduh bad ki nongïalam jong ka Joint Action Committee, Mawlai.
U Myntri u ong ruh ba da kaba pynbna lyngba ki lad pathai khubor jong ka Assam, khlem artatien kin sa tip beit bad lap dien ïa ka leit ka wan jong ki. Ha kajuh ka por u ong ruh ba ïa kitei ki sawngut la thwet jur da ki pulit jong ka Meghalaya haba ïadei bad katei ka jingïap jong utei u nongap pahara ka FCI, ba la tip kyrteng kum u Dismarlin Lyngdoh.
Haba ïadei pat bad ka jingshah thang ki trok kit khaw jong ka FCI ha Mawlai, na ka liang u Myntri u la ong ba ka jingtohkit mynta ka dang ïaid shakhmat kumta na ka liang ka tnad kam pat lah satia ban kynnoh mano ba donkti ha katei ka kam. “Ka jingtohkit ka dang ïaid shakhmat ban lap ïa ka jingshisha, kumta dei tad ynda la dep ka jingtohkit ba yn sa tip ïa ka jingshisha baroh,” u la ong.
Lah ban kdew hangne ba ka jingshah thang jong kitei ki trok kit khaw ka FCI ka la jia hadien khyndiat sngi ka jingïap jong utei u nongap pahara ha FCI, Khanapara.
Katkum ka jingïathuh jong ki pulit, kitei ki saw ngut ki suba kiba la phet rieh noh hadien katei ka jingjïa ki kynthup ïa u Sadhan Jamatia, Sunaram Boro, Suresh Boro bad u Noba Baruah kiba dei na Assam katba ïa ki Trok ba ki ñiah pat la ïoh ban bat da ki Pulit ka Ri Bhoi ba ka jingtohkit halor kane ka jingjïa ka dang ïaid shaphrang.
Na ka liang ka JAC Mawlai, hapoh ka jingïalam jong u Donbok Kharlyngdoh kum u Chairman u la ïathuh ba ha katei ka jingkynduh ïa u Myntri Kampohïing ki la kyntu ba ka sorkar kan shimkhia halor katei ka jingjia shah pynïap jong utei u nongap pahara ka FCI namar ka por ka la ïaid la shi taïew khlem pat ïoh kem ïano ïano ruh.