Press "Enter" to skip to content

Thawlad ka Sorkar Jylla ban seng ïa ka Veterinary College

La plie ïa ka ‘Nucleus Pig farm’ ha Kyrdem Kulai

Nongpoh, Jymmang, 01: Ka Sorkar Jylla mynta ka dang wad ïa ki lad ki lynti ban seng ïa ka Veterinary College (Science) ha Meghalaya khnang ban pynsuk ïa ki samla pule ha kaba kim donkam shuh ban leit pule pyntbit shabar ka jylla.
U Symbud Myntri Rangbah ka Jylla, u Bah Prestone Tynsong, u la pynpaw ïa kane ha ka jingplie paidbah ïa ka ‘Nucleus Pig farm’ mynta ka sngi balang ha Regional Pig Breeding Farm kaba don ha Kyrdemkulai, Ri Bhoi District
“Shen ka Sorkar kan sa thaw ïa ki lad ki lynti ban seng noh ïa ka Veterinary College (Science) ha ka jylla. Da ka jingdon jong kane ka College ki samla kim donkam shuh ban leit shabar ka jylla ban pyntbit bad lada ngi la ïoh ki samla kiba la tbit kan long ruh ka jingmyntoi ha ka liang ka seng kam seng jam lyngba ka kam ri jingri,” ong u Symbud Myntri Rangbah.
Haba kren ruh halor kane ka pham ri sniang katkum ka juk mynta, u la ong ba kane ka pharm kan kyntiew ïa ka ïoh ka kot bad kan long ruh ka lad ïohkam ïohjam jong ki nongri jingtip.
Ïa kane ka jaka ri sniang thymmai katkum ka juk mynta, la pruiddak da ka tnad Animal Husbandry & Veterinary.
Ki doktor Veterinary ki la pynaw ba kane ka Nucleus Pig Farm’ ka dei kawei na ka rukom ri sniang kaba dei katkum ka juk ba mynta bad kaba pynïohnong bha ïa ki nongrep.
Ha kane ka sngi, la ïadonlang u MLA ka Umsning Constituency, u Bah Jason Sawkmie Mawlong kum u symbud kongsan, ki nongri jingri bad ki nongrep, ki ophisar ba kynthup ïa u Additional Chief Secretary, u KN Kumar, u Dr. C. Shilla, Director ka AH&V Department, u Dr. K.B Sahkhar, Deputy Director ka AH&V Department bad kiwei kiwei ki ophisar.
U Bah Prestone Tynsong haba kren kum u Kongsan, u la ai jingïaroh ïa ki ophisar na ka tnad Animal Husbandry & Veterinary kiba la shimkhia ban pynurlong ïa kane ka thong jong ka Sorkar ban dang kyntiew ïa ka kam ri sniang ha ka jylla.
U la ïathuh ruh ba ka Sorkar ha ki snem ba la leit noh ka la pyntreikam ruh kum ka Milk Mission, ka Jackfruit Mission kaba dei halor ka kam rep ka kam riang bad mynta pat ka Sorkar ka la dang phaikhmat ruh sha ka kam ri jingri namarba ka sorkar ka lap ba ka kam ri jingri ka dei kawei na ka kam kaba ai jingmyntoi shibun ïa ki nongshong shnong ha ki shnong nongkyndong.
U la ong ruh ba ka Sorkar ka la pyntreikam ruh wat ïa ka Piggery Mission kaba kynthup lang bad kane ka Nucleus Pig Farm, ba ka thong ba hakhmat ka Sorkar ka long ban kyntiew ym tang ïa ka ïoh ka kot ki nongrep hynrei kan dei ruh kawei na ka lad ïohkam ïohjam ki samla, kiba ym donkam donjam, lyngba ka kam ri jingri.
“Kane ka rukom ri sniang ka dei ruh ka rukom ri jingri kaba dei katkum ka juk ba mynta ha kaba ka thong ka Sorkar kan dang kyntiew ïa ka ri sniang ym tang ban pyndap ïa ka jingdonkam ki paidbah ba bam doh sniang, hynrei ba ka jylla kam donkam shuh ban shaniah na shabar khnang ban kyntiew ïa ka ïoh ka kot ki paidbah da ka jinglah ban pyndonkam ïa ka rukom ri jingri katkum ka juk saian ba mynta,” u la ong.
Kiwei kiwei kiba la ai jingkren ha kane ka sngi ki kynthup ïa u MLA ka Umsning, u Bah Jason Sawkmie Mawlong, u Additional Chief Secretary, u KN Kumar bad kiwei kiwei ki ophisar ha kaba ki la kyrpad ïa ki paidbah ban ïatreilang na ka bynta ban pynurlong ïa ka thong jong ka Sorkar lyngba ka kam ri jingri ka ban kyntiew ïa ka ïoh ka koit ki paidbah ha ka jylla.