Press "Enter" to skip to content

Ai jingkyrshan biang lai ngut ki MDC ïa ka UDA ha KHADC

Shillong, Jymmang, 02: Lai ngut ki MDC napdeng ki hynriew ngut ki MDC ba don hapoh ka kynhun Peoples Democratic Alliance (PDA) kiba la weng noh ïa ka jingkyrshan, ki leit ban ai jingkyrshan biang ïa ka United Democratic Alliance (UDA) ba la lam khmat da u Chief Executive Member (CEM) ka Khasi Hills Autonomous District Council (KHADC) u Bah Teiñwell Dkhar.
Katkum ka thymmei khubor ba la ïohlum mynta ka miet sngi palei, la ïathuh ba lai ngut ki dkhot ka PDA ba kynthup ïa ka MDC jong ka PDF ka Kong
Magdalene Mawlong bad ki arngut ki MDC ka NPP kiba kynthup ïa u Bah Gigur Myrthong bad u Bah Victor Ranee hynne ka sngi ki la leit ban ai jingkyrshan biang ïa ka UDA. Kum ban shu pynkynmaw, ha ka sngi Balang mynta ka taïew ka la don ka jingïalang jong ka UDA ha nongbah Shillong ha kaba la khot ruh ïa ki dkhot ka PDA kiba la weng jingkyrshan ban ïakren pynbeit halor kane ka jingweng jingkyrshan jong ki hynrei namarba la slem palat ka por kim shym la poi shuh sha katei ka jingïalang.
Kitei ki 6 ngut ki MDC ba la weng jingkyrshan na ka UDA ki kynthup ïa u Bah Latiplang Kharkongor, Bah Gigur Myrthong, Bah Mitchel Wankhar, Bah Victor Ranee, Kong Magdalene Mawlong bad Bah Lambor Malngiang.
Ka thymmei khubor ba la ïohlum ka ïathuh ba dei tang u Bah Mitchel Wankhar, u Bah Lambor Malngiang bad u Bah Latiplang Kharkongor ki bym pat kynran dien na ka rai ba ki la shim ban weng noh ïa ka jingai jingkyrshan ïa ka Executive Committee (EC) ha KHADC.