Press "Enter" to skip to content

Bitar ki paidbah ka WKH ba pynlip lait sha ba palat u pud

Nongstoiñ, Jymmang 2: Ka thaiñ West Khasi Hills naduh ba la pdiang snem thymmai 2019, ka la mad ïa ka jingduh nong kaba khraw lada dei ha ka kam khaïi ha ki iew ki hat bad ha kiwei kiwei ki kam ki jam kum ka jingshon dur Smart Card MHIS (IV) bad wat ha ki tnad trekam jong ka Sorkar na ka bynta ki jing donkam ba man la ka sngi. Ka daw ka dei ka jingpynlip lait kaba la palat pud jong ka tnad MeECL.
Haba ïa nujor katkum ka prokram load shedding jong katei ki tnad ka long kaba noh shilliang haduh katta. Ha ka thup jong ki shnong bapher bapher kaba kynthup ïa ka West Khasi Hills, ka jingpynlip lait ka long ha ka por mynsngi 9.00 AM haduh 12.00 PM bad ha ka por miet pat 7.00 PM haduh 8.00 PM.
Ha kum kine ki por ki nongkhaïi, ki tnad Sorkar bad ki nongtrei jong ki Smart Card MHIS (IV) ki dang bunkam bha ban trei ïa ki kam na ka bynta ki jingdonkam ki Paidbah. Hynrei tang na ka daw ka jinglip lait da ki bun bun kynta, baroh ki kam ki jam la hap
pynsangeh noh bad bun na ki nongshong Shnong lada dei ha sor ne ha ki nongkyndong na kane ka thaiñ, ki mad shibun ki jingduhnong kiba khraw.
Halor kane, ka West Khasi Student Union bad ka Western Youth Federation, ki pynrem jur ïa ka Sorkar jylla lyngba ka tnad sam Bording MPDCL kaba la pyntreikam ïa ka jingpynlip khah khah (load sheding) da ki bun bun kynta ha ka shi sngi ha baroh kawei ka thaiñ West Khasi Hills.
Ki ar seng ki pynrem jur ïa ki Company ba dei peit ha ki laiñ Network ba kim lah ban ai jingshakri pura ïa ki paidbah ka thaiñ West Khasi Hills, ha ka rukom pyntreikam bha ki bor signal lane network lada dei ha ki Mobile lane ha ki Computer Network. Bunsien kitei ki Company ki shim kabu haka por ba lip ka lait ha kaba ki nud ruh ban pynduh wat ïa ki signal lane ki Network. Imat ba ki bynnud ban pyntreikam da ki Generator ha ki jaka ba don ki Tower Signal ha ka por ba lip ka lait.
Ki ar seng ki pynpaw ruh ba ka jingbym lah ban pynbiang ïa ki network da ki Company bapher bapher bad ka jinglip lait da ki bun kynta ka ktah jur ïa ki nongtrei jong ka MHIS (IV) bad khamtam ïa ki Ki ar Seng ki pynpaw ka jingsngewkhia ïa ka jingbym lah ka Sorkar ban pyntreikam da ka Static Registration centre haman ki Block bad ha ki jaka bym don network, na ka bynta ban pyndep kham sted ïa ka jingpynrung kyrteng bad shon dur na ka bynta ka MHIS (IV). Ha ka jingshisha ka dei ruh ban pynjlan ïa ka por haduh ban da dep ïa ka jingpynrung kyrteng ha baroh kawei ka thaiñ.
Ki ar seng ki dawa jur na ka sorkar Jylla khamtam na u Minister ba dei peit ïa ka tnad sam bording Bah James Sangma bad bah A.L Hek ba dei peit ïa ka tnad ka koit ka khiah ka jylla, kumjuh ïa ki Company pyntreikam ïa ki network Mobile lane Computer ba ki dei ban sngewthuh ïa ki jingeh kiba ki paidbah ka thaiñ West Khasi Hills ki ïakynduh.
Ki lai dawa na ka Sorkar Jylla ba ka dei ban pynjynsur ïa ka prokram load sheeding lane pynlip lait bun bun kynta, khamtam haka por ba ki paidbah ka thaiñ ki dang bunkam ha ka trei bad ka khaïi ka pateng. Ki ar seng kin sa buddien ïa kine ki jingdawa bad lada ka sorkar kam lah ban pynbeit ïa kane ka kam, ki ar seng kin sa jied da kiwei ki lynti kiba kham tyngeh na ka bynta ka jingmyntoi u paidbah.