Press "Enter" to skip to content

Dawa ka kurim u Bah Dismarlin ban kem ïa saw ngut ki nongniah trok na Assam

Shillong, Jymmang, 2: Ka Kong Fatima Nonglang, ka kurim jong u Bah Dismarlin Lyngdoh Lyngkhoi ka la dawa ïa ki bor Pulit ban kem noh mardor ïa ki saw ngut ki nongniah trok kit khaw na Assam kiba donkti ban shoh pynmynsaw ïa u kurim jong ka kat haduh ba un da khladnoh na ka sla pythei.
“Nga dawa ba ki Pulit ki dei ban kem noh mardor ïa kiba donkti ban leh jubor ïa u kpa ki khun,” ong ka Kong Fatima kaba bah ruh ïa i khun ba dang lai bnai ha ka jingïakren bad ki lad pathai khubor mynta ka sngi palei.
Ki saw ngut ki nongniah trok kiba donkti ban shoh pynmynsaw ïa u Bah Dismarlin ha ka miet 24 tarik u bnai baladep kiba dang phetrieh haduh mynta ki long u Sadhan Jamatia, u Sunaram Boro, u Suresh Boro bad u Noba Baruah. Kine ki saw ngut ki dei na ka Jylla Assam.
U Bah Dismarlin uba trei kum u Home Guard bad ap pahara ha kudam jong ka FCI, 10 Mer, Ribhoi District u la khladnoh ha ka 25 tarik, u bnai baladep ha H. Gordon Robert Hospital, Shillong hadien ka jingshitom kaba jur.
Ki nongïalam ka Khasi Students Union (KSU) bad ka Federation of Khasi Jaiñtia Garo People’s (FKJGP) Mawlai Circle kiba la synran lang ïa ka Kong Fatima, ki la ong, “ngi ieh ha ka jingstad jong ka tnat Pulit ban kem ïa kiba donkti ha kane ka kam runar.”
Ki nongïalam jong kine ar seng ba kynthup ïa u General Secretary ka KSU u Samla Rapborlang Nongrum bad u President ka FKJGP u Samla Khrawkupar Nongsiej ki la dawa ba dei ban sospon mardor ïa u Depot Manager ka FCI, Khanapara bad ïa uwei u pulit Home Guard uba pahara ha ka kudam FCI ha ka miet 24 tarik u bnai baladep.
“Ngi dawa ïa ki bor ba dei peit ban sospon mardor ïa u Depot Manager bad ïa uwei u Pulit Home Guard uba dei ban pahara ha ka kudam jong ka FCI, Khanapara ha ka miet 24 tarik, u bnai baladep namar ka jingbym ïarap ïa u Bah Dismarlin hadien ba la shah shoh bad ka jingbym pyntip sha ki bor ka aiñ halor kane ka jingjia bad ka jingbym pynkit sha hospital hadien ba u la mynsaw,” ong u General Secretary ka KSU u Samla Rapborlang Nongrum.
“Hynrei dei u Bah Dismarlin hi uba la pyntip sha ing haduh ka step jong ka sngi kaba bud halor kane ka jingjia bad ka jingmynsaw na ka jingshah shoh ha ki saw ngut ki nongniah trok na Assam,” u la ong.
Ha kajuh ka por, u la ïathuh ba ka KSU bad ka FKJGP dang shen ki la leit ïakynduh ïa u General Manager ka Food Corporation of India (FCI) Shillong ban dawa thungkam noh mar mar ïa iwei na ki khun jong u Bah Dismarlin khnang ba kin dup lah ban kyrshan ïa ka iing ka sem.
“U General Manager ka FCI, u la ïathuh ba un dang hap ban phah da ka jingthoh sha ka ophis treikam jong ka FCI kaba don ha New Delhi ba kan pynkha ïa kawei ka Post na ka bynta ban thungkam ïa iwei na ki khun jong u Bah Dismarlin,” ong u Samla Rapborlang.
Katkum ka jingïathuh jong ka Kong Fatima, i khun kynthei ba nyngkong i dei iba dang pule BA-II Semester, baar ba dang pule Class-XII, balai ba dang pule Class-X, basaw ba dang pule Class-VII nalor iwei pat i khun rit iba dang lai bnai.
“Kane ka jingdawa jong ngi na ki bor ka FCI ka dei namarba i Kong Fatima i la ong ban hap pynpep skul noh ïa ki khun namar ka jingbym lah ban pyndap ïa ka iing ka sem hadien ka jingduh jong ki khun ïa u kpa ha kane ka jingjia,” bynrap u President ka FKJGP u Samla Khrawkupar Nongsiej.
U ïathuh ba ki ar seng ki la leit ïakynduh ruh ïa u Commandant jong ka tnat Home Guard and Civil Defence ban pynrungkam ïa ka khun kynthei ne u khun shynrang jong u Bah Dismarlin.
Kine ki ar seng ki la dawa ruh ïa ka FCI ban siew ïa ka bailutksan bad ïa kiwei kiwei ki lad jingïarap sha ka longiing longsem jong u Bah Dismarlin. Ki la ong ruh ba kin sa leit ïakynduh ïa u Director General ka tnat Home Guard and Civil Defence ban pyllait noh ïa ka tulop kaba u dei ban ïoh.