Press "Enter" to skip to content

Ïasaid tyngeh ka sorkar ban ïoh tih dewïong da ki aiñ ka jylla

Shillong: Ka sorkar jylla lyngba ki nongsaid aiñ jong ka, ka la ïasaid tyngeh ha Supreme Court ban pyllait noh ïa ka jingkhang tih dewïong da ka NGT bad ban hah ban tih dewïong da ki aiñ ka jylla ne ki polisi ba la thaw da ka jylla.
U Advocate General ka sorkar jylla, u Amit Kumar, u la ïathuh ba ka jingbishar ka SC ka la ïaid la jan man la ka sngi halor ka jingkyrpad ka sorkar jylla ïa ka jingkhang tih dewïong ka NGT, nangta ïa ka jingphah siew 100 klur tyngka bad kiwei kiwei. Ka jingbishar ka la long ha ka 23 bad 24 tarik u bnai baladep, nangta ka la bteng biang ha ka 1 bad 2 tarik mynta u bnai. Na ka liang ki nongsaid aiñ ka sorkar jylla, ki la ïathuh bad kdew shuwa ïa ka rukom bat khyndew ha jylla Meghalaya bad pyni ruh ba ka sorkar ka kwah ban tih dewïong lyngba ki aiñ kiba biang, khamtam kiba la
thaw da ka sorkar jylla. Ki la pynpaw ruh ba ka Mines and Minerals Development and Regulation Act, ka treikam tang ha kito kiba shim wai, hynrei lada u trai u tih dewïong ha jaka la jong, kam lah ban long ba un ai wai dalade ïalade.
Ha kane ka jingbishar, ka Supreme Court ka la kylli bniah halor ki aiñ bad kiwei de ki polisi ba la pyntreikam ha ka jylla ha kaba ïadei bad ka jingtih dewïong ha ka jylla. Na ka liang u nongïasaid ka sorkar Meghalaya,u Colin Gonsalves u la bteng ka jingïasaid haduh ka por 4 baje janmiet, hynrei namar na ka jingïasaid kam pat kut, la buh ban bteng biang ha ka sngi thohdieng. Hadien kane kan don biang ka jingïasaid na ka bynta kiwei pat ki kam, kum ka jingshalan ïa u dewïong bad na ka liang ka Supreme Court kan nym pat pynbna eiei (reserve) ïa ka rai.
Na ka liang u Amit Kumar, u la ong ba lada ka Supreme Court, ka bthah ba ka MMDR Act lane kane ka aiñ kam long, ka jingtih dewïong kan sdang biang lyngba ki aiñ ne polisi ka sorkar jylla bad kane kan sa shai bha hadien baladep bishar da ka Supreme Court. U Kumar u la ai burom ïa ka sorkar jylla halor kane, namar ba ka la shimkhia ban ïakhun tyngeh ïa kane ka kam lyngba ka lynti jong ka aiñ.