Press "Enter" to skip to content

Ka rai pynkiew dor ïa ka Laisen Khaii bad ban “Digitise” dei ki rai pynïohnong: KHNAM

Shillong, Jymmang, 2: “Ki ar tylli ki rai jong ka Khasi Hills Autonomous District Council (KHADC) ban kyntiew noh ïa ka dor jong ka bai laisen khaii bad ban “digitise” ïa ka rukom ai ïa ki Licence sha ki bar jylla ki dei ki rai ban pynïohnong hynrei kim dei ki rai ban ïada lane ban pyrkhing ïa ka jingïoh lad jong ki bar jylla ban knieh ïa ka lad kamai jong ngi ki trai jylla,” ong u President ka KHNAM-State Youth Wing, u Bah Thomas Passah.
“Lyngba ka RTI kaba la ïoh na ka KHADC ha ka 2 tarik, Jymmang, 2019 la ïoh jingtip ba naduh u snem 2017 haduh 2019 ka KHADC ka la ai ïa ki Licence bathymmai sha ki 410 spah ngut ki bar jylla ha East Khasi Hills District bad 164 ha Ri-Bhoi District. Ïa ki kot ki sla jong kine baroh ka seng ka dang pule bniah ban tip hato ïa ki laisen la ai hadien ba peit bniah bad bud ryntih ïa baroh ki kyndon ba la kdew ha ka Section 3A jong ka
“The United Khasi-Jaintia Hills District (Trading By Non-tribals) Regulation, 1954,” u la bynrap.
U la ong shuh shuh, “kiba bun ki bar jylla ki ba khaii ha ka jylla ki hap ban siew bai sha na ka bynta ban ïoh ïa ki Trading Licence jong ki bad kim ym salia ban siew ïa ka bai Trading Licence kaba kham heh tang ban ïoh lad ban ïai khaii. Kaba kham suk ïa kine ki dukan ka long ban pynkiew ïa ka dor ki mar ki mata, namar haduh mynta ha ka jylla ka jong ngi ngim pat lah ban tehlakam lane ban ‘regulate’ ïa ki dor jong ki mar ki mata.”
“Ki don ki bynta ha sor Shillong khamtam eh ha iew duh bad kiwei kiwei ki jaka ha kaba ngi la ïohi ba ka jingbun jong ki bar jylla ki ba khaii ka long kaba sha palat. Ka sub-section (e) jong ka Section 3 B jong ka “The United Khasi-Jaiñtia Hills District (Trading By Non-tribals) Regulation, 1954” ka la batai shai kdar ba ka Executive Committee kadei ban buh lane kdew lyngba ki Rule ba haduh katno tylli ki Trading Licence dei ban ai da ka KHADC,” ong une u nongïalam ka KHNAM bad bynrap, “hynrei ka jubab jong ka RTI kaba ngi la ïoh halor kane ka bynta ka batai ba ka EC jong ka KHADC kam shim la buh lane kdew katno tylli ki Licence dei ban ai.”
“La lap ruh ba shaw ban ai ïa ki Trading Licence ka Trade Department jong ka KHADC kam shym la peit bniah ïa ki Sub-section (b), (c) & (d) jong ka Section 3A “Conditions for granting or refusing a license” jong ka Trading By Non-tribals Regulation, 1954,” la kynthoh une u nongïalam ka KHNAM.
“Kam don jingmyntoi shuh ban leit khynra ïa ki dukan jong ki bar jylla bad ban khang ïa ki tang shi kynta ar kynta lada ka KHADC kam shimkhia lyngba ki ain ki kyndon. Ngi sheptieng ïoh ka don ka khaii kaba sha lyndet jong kine ki bar jylla bad ki riew khwan myntoi,” u la ong.
“Hadien ba ngi la ïoh ïa kine ki RTI na ka liang ka seng ngin hap ban leh ïa ka ‘ground survey’ bad ka seng ka bthah ïa baroh ki bar jylla kiba ïoh ïa ka Trading License ba ki dei ban wah ïa ka kopi jong ka laisen habar dukan haba paw khnang,” u la ong.