Press "Enter" to skip to content

Sdang biang ka drama ba itynnat ha District Council

Bah Philip Marweiñ

Kumba ka la jia ïa ka song pisa Special Plan Assistance (SPA) kaba T.133 klur, ha kane ka kynti ruh ka song pisa Special Plan Assistance kaba T.52 klur ka long ka dawbah jong ka drama huri hura ha Khasi Hills Autonomous District Council. Kane ka drama ka long ba 6 ngut ki MDC na ka liang synshar United Democratic Alliance (UDA) ki la mih noh hadien ba ki la ai ka shithi hiar shuki. La bunsien kine ki MDC ki la ai jingmut ïa u Chief Executive Member (CEM) u Bah Teiñwell Dkhar ba u dei ban ïasam ïa kane ka song pisa mar katjuh hapdeng ki MDC. Wat ki MDC na ka Liang Pyrshah, ka Congress ruh, ka la dawa ïa u CEM ban leh kumta, hynrei um man sngap satia.
Katkum ka jingtip ba la ïoh ki MDC kiba don ha ka liang synshar ki ïoh mar mar T.80 lakh uwei uwei, katba ïa kiba don ha ka liang pyrshah (Congress) mar mar T.50 lakh. Kane ka mut ba na ka T.52 klur u CEM u la sam tang T.20.20 klur. Un leh kumno ïa ka peisa kaba dang sah ka ba long T.31.80 klur?. Katkum ka jingïathuh jong ki MDC kiba la mih na ka UDA ki la ïai ai jingmut ïa u CEM ba un khot ïa ka jingïalang jong ka UDA bad ban pynshai bha halor kane ka peisa kaba T.52 klur, un leh kumno, un pyndonkam kumno bad un ïasam kumno? Hynrei ki la kynnoh ba u la shu sngap mynthi bad um shym la leh ïa kata kaba ki ai jingmut ha u. Kane ka la buh ïa ki MDC ha ka umdum bad kumta ka sa mih kane ka drama. Hadien kane u CEM u la khot ïa ka jingïalang jong ka UDA ha ka 1 tarik u Jymmang hynrei kine ki MDC kiba la mih noh na ka UDA bad sa kumba lai ngut kiwei pat ruh kim shym la poi sha kane ka jingkhot ïakren jong u CEM. La ïoh jingtip ba u la khot biang ïa ka jingïalang jong ka UDA ha ka 2 tarik ban ïakren bad ban ïapynbeit ne ïashai halor kane ka kynrum kynram kaba mih na ka songT.52 klur.
Ha ka jingshisha kan don jingeh aiu ban ïasam ïa kane ka song peisa kaba T.52 klur namar kam da dei kaba bun. Hynrei kumba lah ban sngewthuh u CEM u la mang ruh ïa ka peisa ban pynlut sa ha ki katto katne ki skhim bad ki project jong ka KHADC kiba la sahkut khongreng naduh ki por ba long CEM u Bah P.N Syiem bad ka jingthmu ban pynngam ïa ka peisa halor kine ruh ka long kaba bun, bad ym dap peisa shuh ban dang ïasam shuh shuh sha ki skhim MDC. Ka don shibun ka jyrwit jyrwat hangne. Ha ka jingshisha ïa kane ka T.52 klur la dei ban sam kham bun sha ki MDC na ka bynta ki skhim jong ki bad lada dang tam sa peit kumno ban leh na ka bynta kita ki projek kiba la shu sah khongreng naduh mynshuwa ba la sdang da kiwei ki CEM barim. Ka jingleh jong ki CEM barim lane jong ka E.C bamynshuwa ym dei ban pynbah lyngkor ha u CEM bad ka E.C bamynta. Ym dei ban shim ïa kino kino ki skhim lane ki project khlem don lypa ka peisa ha kti bad ïa kita dei ban pyndep mardor, ym ban pynkit ïa ka lyngkor ha ki CEM bad E.C ki ban wan hadien. Imat ïa ka tngit bad ka synrum barim jong ka 133 klur la pynbit thit bad kane ka 52 klur kaba mynta. Bad sa kawei pat, balei ka EC kaba mynta hapoh ka jingïalam jong u CEM ka sngap bad shah ïalam ha kita ki Businessmen lane ki Contractor jong ka KHADC kumba la kynnoh da ki MDC kiba la phoi.
Kane ka kam kaba la sah ha ka umdum mynta ha KHADC ka dawa kyrkieh ïa ka jingpynbeit bad ym dei ban ïaleh kyllain ïa 52 klur tyngka. Shisha ka donkam ïa ka jinglehkhuid lehsuba (transparency) halor rukom ïasam ïa ka peisa hapdeng ki MDC bad ba kam dei ban don ka jingleh shiliang ïano ïano ruh. Ki paidbah ruh ki kwah ban ïohi ïa ka jingkhuid jingsuba, ym ban shu ïa bamsap ne ban leh kyllain jalbi tang ban pynïohnong ne pynhun ïano ïano shimet. U Bah Teiñwell Dkhar, un jin da ïoh burom na ki paidbah babun jin da u lah ban pynkhuid noh ïa ka kynrum kynram kaba don mynta ha ka Council da kaba ïasam mirbïang ïa ka peisa hapdeng ki MDC, kiba don ha ka liang synshar bad kiba don ha ka liang pyrshah.