Press "Enter" to skip to content

Sha ka Sorkar Pdeng yn kren u MR halor ka kynrum kynram ha NEIGRIHMS

Shillong, Jymmang 02 : U Myntri Rangbah ka Jylla, Conrad K Sangma ha ka sngi Palei u la ong ba un sa kren bad u Secretary ka tnad ka Koit ka Khiah halor ka kynrum kynram kaba mih na ka daw ka jingïakynad hapdeng ki bor pynïaid bad katto katne ki Doktor, khamtam na ka Cardiology Department,kaba lah ban ktah ruh ïa ka ïap ka im ki paidbah.
Haba kren bad ki lad pathai khubor u Myntri Rangbah u la ong ba haduh mynta hi um pat tip satia halor kitei ki kynrum kynram kiba mih ha katei ka jaka ai jingsumar kaba heh tam ha ka thaiñ shatei lam-mihngi jong ka Ri kaba don ha Shillong.
Lah ban kdew hangne ba ka la mih ka jingkynnoh ba u Head of Department (HoD) jong ka Cardiology, u Dr. Animesh Mishra, naduh ka sngi ba ar, u la sangeh treikam bad ban sumar ïa ki briew ba pang klongsnam na ka daw ba ki bor pynïaid ki la bat ïa uwei u briew ba ju wan die ïa ki tiar sumar lyngba ka jingai jingbit jong u. Kane ka jingsangeh treikam une u Doktor, ka la ktah ïa kiba bun ki paidbah ba wan shim dawai bad phah sumar ha katei ka Department.
“Ïa kane ka ishu ngam pat ïoh jingtip ei ei, hynrei ngan sa wad bad ngan sa kren sha Delhi ban ïoh pynbeit noh kham kloi lada don kino kino ki jingeh. Ngan sa kren ruh mardor bad u Secretary ka tnad ka Koit ka Khiah jong ka sorkar India,” ong u Myntri Rangbah da kaba kubur ba ka koit ka khiah jong ki paidbah kadei ka ishu kaba hakhmat eh jong u ïa kaba na ka por sha ka por u ju shimkhia ban ïa kren bad ka sorkar pdeng.
Ha ka khubor ba la phah da u Public Relations Officer (PRO) ka NEIGRIHMS, la ong ba u HoD jong ka Cardiology um shym la treh ban ïatreilang bad ki bor pynïaid ka Hospital ha kaba sumar ïa ki nongpang klongsnam kiba wan na ki longïing baduk kaba long katkum ka jingbthah ka Ministry of Health and Family Welfare jong ka sorkar pdeng, kata ha kaba thied ïa ki tiar sumar (stents/pacemakers) bad ki dawai ban thied ïa kine ki tiar bad ki dawai na ka Amrit Pharmacy, kaba la buh ha ka dor kaba kham duna bad lada jia ba kine ki tiar ne dawai kim don ha Pharmacy, ka Amrit kan pynïoh ïa ki hapoh 48 kynta.
Shuh shuh ka kyrwoh na u PRO, ka kynnoh ruh ba ha ka 30 tarik u bnai baladep, u Director ka NEIGRIHMS, katba u dang ïaid peit kam hapoh Hospital, u la lap ïa kine ki briew kiba la rah saw tylli ki pla kiba don kine ki tiar sumar bad ki dawai ban leit sha Cath Lab. Haba u la ïohi kumne, la phah bat ha ki bor pahara ka Hospital bad hadien kane la phah ïa ki sha u Chief Security Officer and Chief Vigilance Officers ka NEIGRIHMS kiba la shimkhia bha ïa kane ka rukom die dawai beaiñ, wat hapdeng ka jingbthah ka sorkar pdeng.
Namar kane ka jingleh ki bor pynïaid, la kynnoh ba u HoD Cardiology, haba u la sngewthuh ba ula ngat ha ki kam beaiñ, u la thaw jingklumar da kaba sangeh ban peit bad sumar ïa ki nongpang bad kynshoit ruh ïa ki nongpang ban ïeng ïaleh pyrshah ïa ki bor pynïaid ka Hospital.
Na ka liang u Director haba ai ka jingmaham ïa u HoD ba um shim ka jingkitkhlieh ïa kino kino ki jingjia ha ka Department, u kyntu ïa ki paidbah ba kin ïatreilang na ka bynta ka jingïaid beit ka Hospital khamtam eh ha ka Cardiology Department.