Press "Enter" to skip to content

6 snem kynthih bat ka St. Anthony HSS ïa ka kyrdan banyngkong ha ka HSSLC (Science)

HSSLC (Commerce): Banyngkong eh u samla pule ka BSS College

Shillong, Jymmang, 8: Ka St. Anthony’s Higher Secondary School, Shillong bad ka BBS College, Shillong ki la long ki ar tylli ki shlem pule kiba la ioh knieh ïa ka kyrdan banyngkong eh ha ka eksamin Higher Secondary School Leaving Certificate (HSSLC) jong ka Science bad ka Commerce Streams ïa kaba la pynbna mynta ka sngi balang da ka Meghalaya Board of School Education (MBOSE).
Ka Debjanee Bhattacharjee, ka samla pule jong ka St Anthony’s Higher Secondary School, Shillong ka la ioh ban knieh ïa ka kyrdan banyngkong eh ha ka Top 10 jong ka HSSLC (science) da kaba ioh 464 marks, katba u Bhanudaya Upadhaya, u samla pule jong ka BBS College, Shillong u la ioh knieh ïa ka kyrdan banyngkong ha ka HSSLC (commerce) da kaba ioh khur 448 marks.
Kumba ka paw na kane ka result HSSLC (science) ba la pynbna mynta ka sngi, ka St Anthony’s Higher Secondary School, Shillong ka la knieh lut ïa baroh ki kyrdan ha ka Top 10. Mynta u snem, baroh phra tylli ki kyrdan kiba shakhmat la ioh da ki kynthei.
Kane ka skul haduh mynta hi ka dang ïai bteng ban bat beit ïa ka kyrdan kaba nyngkong ha ka HSSLC (Science) mynta la hynriew snem kynthih.
Kiwei kiwei ki skul kiba la poi ha ka Top 10 ki kynthup ïa ka North Liberty HS School, Jowai, ka Seven Set Annexe HS School, Shillong, ka Don Bosco HS School, Tura, ka KJP Synod Mihngi HS School, Jowai bad ka St Edmund’s HS School, Shillong.
U Vice Principal ka St Anthony’s Higher Secondary School, u Father Henry Warbah ha ka jingïakren bad u nongthoh u la shim ba kane ka jingïai bteng jong ka skul ban ioh kheit ïa une u soh jong ka jingjop ka dei ka jingtrei shitom jong ki khynnah skul bad ha kajuh ka por u la ai khublei kyrpang eh ïa ki ba kin nang lah ban wanrah ïa ka nam ka burom sha ka skul manla u snem.
U la ong ba kane ka skul ka ai jinghikai ym tang ha ka pule ka puthi hynrei ka saiñdur ruh ïa ka jingim jong ki khynnah skul lyngba ka jinghikai ha ka jingim jong ka mynsiem, ka imlang ka sahlang kaba pynheh pynsan ïa ki khynnah.
“Ngi kwah ruh ban pynpaw ka jingsngewnguh sha ki nonghikai, ki kmie ki kpa bad ïa ki khynnah skul namar dei ka jingminot, ka jingaiti lut bad ka jingtrei shitom ka jong ngi ba ngi la ioh ban poi sha une u mawjam jong ka jingjop,” ong u Fr. Warbah.
Ha ka Commerce Stream, ka skul St Anthony Higher Secondary School ka la ioh knieh haduh hynriew tylli ki kyrdan ha ka Top 10 da kaba ioh khur ïa ka kyrdan kaba ar, kaba lai, kaba san, kaba hynriew, kaba phra bad kaba shiphew.
Kiwei pat ki skul kiba poi ha ka Top 10 ki kynthup ïa ka St Edmund’s HS School, Shillong, ka Shillong College Higher Secondary Education, Shillong, ka Seven Set Annexe Higher Secondary School, Shillong bad ka St. Mary’s Higher Secondary School, Shillong.
Haba bishar ïa ka jingpas jong ki khynnah skul ha ka HSSLC (Science) ka long 71.07 percent katba ha ka HSSLC (Commerce) ka long 79.24 percent.
Katba haba bishar ïa ka jingpas jong ki khynnah ha ki District bapher bapher ka Jylla, ka Ri Bhoi District ka dei kaba pas bun eh, kata, 91.67 percent ha ka Science Stream bud sa ka East Khasi Hills District kaba poi 80.80 percent katba ka North Garo Hills District ka dei ka district kaba duna tam kiba pass, kata, tang 45.59 per cent.
Ha ka Commerce Stream, ka East Jaiñtia Hills District ka dei kaba bun eh ki khynnah kiba pas haduh 95 percent, bud sa ka East Garo Hills kaba long 94.74 percent katba ka West Garo Hills ka dei kaba duna tam eh kiba pas, kata, tang 46.12 percent.