Press "Enter" to skip to content

Byrngem ki nongshong ïew die lang ban tur paidbah sha Ophis u Syiem Mylliem

Dawa ban pynsangeh shna dukan ha Iew die lang

Shillong, Jymmang, 8: Ki nongshong iew kiba ju im kamai jakpoh manla ka sngi na ka khaii ka pateng na ka iew die lang kaba don ha Iew Mawlong mynta ka sngi balang ki la byrngem ban tur sha ka ophis u Syiem ka Hima Mylliem ban dawa ba dei ban pynsangeh noh mardor ïa ka jingshna dukan kaba dang ïaid shaid shaid halor ka slep dewbilat kaba la tei ha ka Iew die lang.
Ka kynhun ki nongthoh khubor kaba la hiar jurip ban tohkit ïa ka jingeh kaba ki nongshong iew ki la mad bad kaba kin sa mad ruh shuh shuh nangne shakhmat, la lap ba ka jingkhapngiah ka la nang jur shuh shuh ban ïa kaba long mynshwa bad la shem ruh ba la pynieng ïa ki païa ban pynkha kumba hapoh 25-30 tylli eiei ki dukan halor ka slep dewbilat.
Naduh ba la tei ïa kane ka slep dewbilat, ki nongshong iew ki la hap ban ïa phngain lang bad ki phew tylli ki kali kiba pynieng hapoh ka khrum.
Dang shen ki nongshong iew jong ka Iewduh, Shillong kiba don hapoh ka shatri jong Ka Iewduh Khasi-Pnar Association (KIKPA), Shillong ki la phah da ka jingthoh sha ka ophis u Syiem ka Hima Mylliem ban pynsangeh nohmardor ïa ka jingshna dukan halor ka jaka die lang Sohsaw kaba don ha Iew Mawlong.
Ha kane ka jingthoh ba ka KIKPA ka la phah sha u Acting Syiem ka Hima Mylliem ka la kyrpad ïa ka Ophis u Syiem ban pynlong ïa ka bynta kaba shalor kum ka jaka shong ki nongrep kiba wanrah ïa ki jhur bad ki sohsaw khnang ba kin ioh die halor kane ka slep dewbilat bad kyrpad ruh ban ym shna dukan ne pynmih dukan namarba kane ka iew ka dei kad khaii kaba la khapngiah lypa da ki nongshong iew bad ki nongleit siew leit tda.
Ki nongshong iew ha ka jingïakren bad ki lad pathai khubor ki ïathuh ba ki sheptieng ban shong die jingdie hapoh ka khrum jong kane ka slep dewbilat.
“Ngi sheptieng ban shong die jingdie hapoh kane ka khrum namar ha ka por ba la tih ïa ka thliew, ïa ki nar rot la shu bteng na ki nar rot kiba rim. Dei na kata ka daw ba ngi sheptieng ioh jia eiei ïa ngi,” ong kine ki nongshong iew.
Haba kylli, ki la ong ruh ba kin sa leit tur paidbah sha ka Ophis u Syiem ka Hima Mylliem ban dawa pynsangeh noh mardor ïa ka jingshna dukan halor ka slep dewbilat.
“Ha u snem ba ladep, mynba u Paiem Ricky Nelson Syiem u dang long u Acting Syiem ka Hima Mylliem u la kular ban ai jaka ïa ngi ban pynlong iew die lang halor ka slep dewbilat ban shu tap da ka tnum khnang ban ïada na ka sngi, u slap bad ka lyer, hynrei mynta u snem ba la shimti da u Pa’iem Ainam Manik Syiem ngi iohi pynban ba la pynieng pynban da ki païa ban shna dukan,” la ong shuh shuh ki nongshong iew.
U Executive Member ka KHADC uba dei peit ka tnat Building, u Bah Titosstarwel Chyne, dang ha ka lah sngi u Blei u la btah ïa u Acting Syiem ka Hima Mylliem, u Paiem Ainam Manik Syiem ban sangeh shwa shipor ïa ka jingtei ïa ki dukan ha katei ka jaka die lang sohsaw, katba ka KHADC kam pat aiti pura (Hand Over) sha ka Hima ha kaba ïadei bad ka jingshna ïa katei ka Iew ha katei ka jaka.
“Katba ka KHADC kam pat aiti lut pura sha ka Hima halor katei ka Iew, ka Hima kan ym lah ban shna eiei bad nalor ba ka jingtrei ïa katei ka Iew ym pat dep lut bad shen ngan sa leit peit leit khmih hi dalade ïa katei ka iew ban peit haduh katno ka kam ka la long kaba biang,” ong u Bah Chyne.