Press "Enter" to skip to content

Ïoh kyrdan ba phra u khun ki nongbylla dewïong ba kyrshan ka skul North Liberty

Jowai, Jymmang 08: Ki khynnah skul na Rilum Jaiñtia ha kane ka kynti ruh ki lalah ban buh jaka ïalade ha ka kyrdan First Ten Position ha ka resol Higher Secondary School Leaving Certificate (HSSLC) kaba la pynbna da ka Meghalaya Board of School Education (MBOSE) ha ka science bad commerce streams ha ka sngi Balang.
Ka North Liberty HSS, Jowai ka lawan ha ka kyrdan ba lai bad ba phra ba kynthup ïa u Berennice Anerict Tang, uba sah Dongmihsngi Ladthadlaboh, Jowai bad Kamphereiei Pala uba na shnong Moolamylliang, East Jaiñtia Hills District.
U Khroo Meda Dkhar u khynnah skul jong ka KJP Synod Mihngi Hr Sec School, Jowai uba shong ba sah ha Chilliangraij ula wan ha ka kyrdan kaba hynriew.
Baroh lai ngut ki khynnah kine ki khynnah kiba la wanrah ka nam ka burom jong ka Rilum Jaiñtia ki angnud ban pule ha ka lain doktor.
Ka khubor kaba sngewtynnad kalong ba u Kamphereiei uba wan ka ïing ka sem jong u ka im na ka kam bylla tih dewïong, hynrei ka jingduk ka jingkyrduh ka ïing ka sem hadien ka jingkhang tih dewïong ha ka Jylla kam shym la khanglad ïa u ban poi ha kane ka kyrdan.
“Ka daw ba nga poi haduh kane ka kyrdan ka dei ka jingdon ryngkat U Blei ha ka jingim jong nga manla ka sngi nalor ka jingkyrshan ka skul North Liberty HSS ïa nga khamtam u Principal ka skul u Richard B Uriah u ba kyrshan ïa nga ba ngan bteng ïa ka jingpule khlem da hap ban siew eiei ban leit skul ha kane ka skul ar snem,” la ong Kamphereiei bad ai khublei ïa baroh ki nonghikai, ki nongtrei ka skul kiba ai mynsiem ïa ki khynnah skul ban durïap ha ka pule ka puthi.
U Kamphereiei Pala udei u khun jong ka Kong Kratis Pala bad u ma Emle Pachiang na ka shnong Moolamylliang, East Jaintia Hills District.
“Lada ngi minot ha ka pule ka puthi, ka jingduk ka jingkyrduh kam lah ban khanglad ba ngin poi sha ka thong bad ka donkam ïa ngi ban sumar syndong tang ka akor ka burom ha ka jingim kum ha kine ki sngi ba jur bha ka jingtynjuh kum ha ka jingialuh samla ha ka rta kaba dangrit bad ka jingpyndonkam bakla ïa ka technology ne ka internet,” la ong u Kamphereiei bad ula ong ba kum ki khynnah skul ngi dei ban nang ban pyndonkam ïa ka technology ha ka kam pule puthi namar ba ka bunsien ka khring ïa ngi sha ki kam pynbyrngia.
U Babu Richard B Uriah Principal North Liberty HSS ula pynpaw ka jingsngewkmen kaba khraw namar tang ha ka sien kaba nyngkong ba ka skul ka phah ïa ki khynnah ban ïakhun ïa kane ka exam na Science Stream haduh arngut ki khynnah ki wanrah nam rah burom ïa ka skul kumjuh ki kmie ki pa. Ki don 30 ngut kiba ïakhun ïa ka eksamin na kane ka skul baroh ki pass bha bad 29 ngut ki ïoh First Division bad uwei 2nd Division.