Press "Enter" to skip to content

Kem ka CBI ïa u runar ba suhbuit ban tuh palat 60 lak na ka BSNL

Shillong, Jymmang 08: Ka Central Bureau of Investigation (CBI) ka lakem ïa uwei u runar na Bihar, uba la shah thwet halor ka jing donkti kum u Nongsuhbuit ban sei tuh ïa ka pisa ba palat T. 60 lak na ka Account jong ka kompani BSNL ha u snem 2012.
Une u runar u kyrteng u Raj Narayan Rai bad ka Ïingkashari Magistrate ka laailad haduh 8 sngi ïa ka CBI ba kan set ban pyn long ïa ka jingtohkit kaba bniah.
U Raj Narayan Rai u dei uba shah thwet ha ka case jong u snem 2012 ha kaba ula pyndonkam ïa ka cheque ba shu soi tuh ha ka kyrteng jong u Account Officer (Cash) ka BSNL, ban sei tuh ïa ka pisa ba T. 60.86 lak, ong ka khubor ba iajan bad ka CBI.
Ïa kane ka pisa la pynthep ha ki khyndai tylli ki Bank Account ha ki khydai tylli ki Nationalised Bank ba don ha West Bengal, New Delhi bad Andhra Pradesh, ïa kiba la plie ruh da ki kot ki sla ba shu leh thok.
Nalor une, ka CBI ka lafile ruh ïa ka chargesheet pyrshah ïa u Sanjeev Kumar Rai na Samastipur, Bihar bad hadien pat ïa uwei u Bidyut Sarkar na Kolkata, kiba donkti lang ha kane ka jingsei tuh ïa ka pisa jong ka BSNL.
Ka CBI ka lapynlong ruh ïa ka jingthwet ban ïohkem sa ïa ki 4 lane 5 ngut ki dkhot jong kane ka kynhun kiba la pyndonkam da ka kyrteng thok ha ki bank account.
Da ka jingïohkem ïa u Narayan, ka CBI ka khmih lynti ba kan sa ïohksai ïa shibun kiei kiei khamtam lei ïa kiwei pat ki runar kiba donkti lang ha kane ka kam.