Press "Enter" to skip to content

Khih ka shuki Chairman SPB na ka jingkynad ki MDC ka UDA

Shillong, Jymmang 08: Ka jingkynad hapdeng ki MDC jong ka United Democratic Alliance ka la pynkhihwin lang wat ïa ka shuki Chairman jong ka Meghalaya State Planning Board ba la bat da u MLA bad MDC shimet na Nongkrem, Bah Lambor Malngiang.
Ki khubor ba la ïohlum ki ïathuh ba katei ka jingpynkhih ïa ka shuki Chairman State Planning Board kadei namar ba u Bah Lambor u bat kum u Chairman jong ka People’s Democratic Alliance (PDA), kaba dei ka kynhun jong ki 10 ngut ki MDC ba kynthup ïa 7 ngut na ka National People’s Party (NPP), 2ngut ki MDC shimet bad MDC ka People’s Democratic Front (PDF).
La ïoh jingtip ruh ba katei ka sienjam ka dei hadien ba hynriew ngut ki MDC ba don ha ka thup jong ka UDA ba kynthup ïa ki lai ngut ki Executive Member kynthup u Bah Lambor kum u Chairman ki la weng noh ïa ka jingkyrshan na ka United Democratic Alliance (UDA), kaba la pynlong ïa ka EC ban hiar ka jingbun paid na ka 19 sha ka 13 ngut.
Hynrei, la ong pat ba kitei ki jingïakren baroh ki la kut noh hadien ba ka la don ka jingïakren ïasuk bad sngewthuh jingmut kaba long ha ka miet sngi Ba-ar ha iingsah u Myntri Rangbah ka Jylla, Conrad K Sangma.
Ym tang katta, ha katei ka jingialang, la rai ruh ba kito kiba la weng noh ka jingkyrshan na ka UDA kynthup ïa kito kiba la resaiñ kum ki Executive Member ba kin ïoh biang ïa ka shuki ba ki bat baroh shi katta kum ki EM lane kum ki Chairman jong ki committee bapher bapher.
Haba ïoh pat ban ïa kren bad u Bah Lambor Malngiang, utei u MLA/MDC u la pynpaw ba um bna ei ei halor kitei kiei kiei baroh. U la ong ruh ba kan ym don satïa kiba kum kitei ki jingthmu pyrshah ïa ka shuki kaba u bat.
Da kaba pynpaw ba katei ka phang kam shym la mih satia ha ka jingïakren ha katei ka jingïalang, u Bah Lambor u la ïathuh ba ka mat kaba kham kongsan ka long tang kumno ban wanrah biang ïa ka jingïatrei lang hapdeng ki MDC jong ka UDA khnang ba ka Executive Committee kan ïoh ban bteng ïa ka jingsynshar haduh kaba kut ki san snem.
U la ïathuh ruh ba ha katei ka jingïalang, la ïakren ruh da kaba shai ba nangtei shakhmat ka jingïatreikam kan long da ka jingïasngewthuh jingmut lang da baroh ki MDC kiba don ha ka kynhun. Nalorkata, u ong ruh ba la rai ruh ba lada don kiei kiei ki jingjia bym sngewthuh jingmut na ka liang ka Coordination Committee kan shim ia ka jingkitkhlieh ban pynbeit.