Press "Enter" to skip to content

Leit jurip u CM ïa ka jaka ban pynïeng ïa ka Entry-Exit Point ha Mendipathar

Shillong, Jymmang 08: U Myntri Rangbah ka Jylla Conrad Kongkal Sangma, hynne ka sngi ula leit jurip ïa ka jaka ban pynieng ïa ka kyrdop Entry-Exit Point cum-Facilitation Centre ha Mendipathar Railway Station, North Garo Hills.
Ïa u Myntri Rangbah ka Jylla la synran da u Myntri kam ialehkai Bah Banteidor Lyngdoh, ki Ophisar ka Tnad Transport, Tourism bad ki bor District ka North Garo Hills.
“Ka jingpynbeit ban shimti noh ïa ka jaka bad ban pynieng ïa ka Facilitation Centre ka ladep ïaid mynta. Ngi la dep bthah kat kaba donkam ïa ka Tnad PWD Building ba kan sdang tei ïa ka khyrdop. Ïa kane ka jingtei yn pyndep noh hapoh ka hynriew bnai” ong u Myntri Rangbah ka Jylla.
U Mytri kam ialehkai ula ong “Ka dei ka jingkular jong ka Sorkar MDA ïa ki paidbah bad hapoh ka jingïalam u Myntri Rangbah, ka Sorkar kan pynthikna ba ka jingpyndep ïa ka khyrdop Entry-Exit Point kan long na ka bynta ka bha ka miat jong ka Jylla”.
Ha kane ka jingjurip, u Myntri Rangbah ula shimkhia kyrpang ruh ban sngewthuh ba kumno ka jingpynïasoh ïa ka lynti rel ka laai jingmyntoi ïa ki paidbah ka Ri-lum Garo, khamtam ki paid Nongrep kiba la pyndonkam ïa ka rel ban khaii ïa ki jhur ki jhep sha Guwahati”.
Ki Heh Sorkar ki laai ka jingbatai ïa u Myntri Rangbah ba dei namar ka jingduna ka jinglut jingsep, ki nongrep bad ki nongkhaii ki lapyndonkam bha ïa ka lynti rel ban pynkit ïa ki mar ki mata jong ki. Ki ong ba kane ka lapynhiar dor ruh wat ïa ka dor ka mur jong kiba bun ki mar hapoh ka District.