Press "Enter" to skip to content

Yn mudui ki seng sha ka Sorkar ba shah thombor u Secy. ka Hima Nongspung

Kylla dpei ki Dulir bad ki kot ki sla badonkam

Nongpoh, Jymmang, 08: Ka jingshah thombor jong u Bah Michael Wajri, u ba dei u Secretary ka Hima Nongspung hynnin ka sngi ka la long kaba ishyrkhei ha kaba ki runar ki la dusmon tyngeh da kaba leit pynpra phom ïa ka iing ka sem, ki tiar ki tar, da kaba lynthem da ki maw, ban pynpra ïa ki kynroh, ki païa jong ka iing, pyntyllun bad pynpra ïa ka Ambulance jong ka Hima Nongspung kaba don ha katei ka iing jong u Bah Michael Warjri.
Ki runar ki la pom dusmon ruh wat ki jingthung jingtep naduh ki dieng kwai, ka kait bad kiwei kiwei ki jingthung jingtetp bad kaba sngewlyngngoh pat ha katei ka jingleit hiar thma ka long ba ki runar ki la thang beit tang ki kot ki sla ba donkam jong ka Hima bad ki kor computer jong u Bah Michael Warjri kaba don shibun ki jingdonkam bad ki dulir haduh ba kin da kylla dpei, kaba lah buh u dak jingkylli u ba heh ba ka lah ban don eiei sha lyndet jong katei ka jingshah thombor kaba dei ruh ka daw bah ba ki kwah ban pynjah klep ïa ki sakhi satar lyngba ki kot ki sla ne ki dulir halor ka jingpyrshah jong u ïa ki kam pynroi ba pyntrei da ka sorkar Assam.
Kum ban shu pynkynmaw ba katei ka jingjia ka la jia hynnin ka sngi haka por shiteng sngi ha kaba ki paidbah naka shnong New Balakhawa, Ranibari bad Birnongsai ki la leit ban thombor bad hiar thma beit ïa ka iing u Bah Michael Warjri Secretary ka Hima Nongspung haka shnong Balakhawa kaba don ha khappud ka Assam bad Meghalaya bad ktah kti ruh ïa u haduh ba un da mynsaw ha katei ka jingjia nalor ba ki dusmon da kaba lynthem maw bad pynpra ïa ka iing ka sem kaba dei tang naka daw ba u tei u rangbah u la ai da ka mukotduma pyrshah ïa ka sorkar Assam kaba la wan ban shna surok jubor sha u pud u sam ka jylla Meghalaya.
U nongthoh khubor u Mawphor u la hiar ruh sha ka shnong New Balakhawa mynta ka sngi ban sakhi halor katei ka jingjia ha kaba la iohi ba ka jingshah thombor haki runar hynnin ka sngi ïa ka iing u Bah Michael Warjri ka la long kaba ishyrkhei ha kaba ki runar ki la pynpait pynpra ïa ki kynroh ka iing, ki tiar ki tar, pom dusmon ïa ki jingthung jingtep haduh ba katei ka iing bad ki tiar ki tar ki la jot hi phom naduh khyrdop iing utei u rangbah, ki sem syiar, ki sem sniang bad wat ka paiñkhana.
Katkum ka jingtip bala ioh lum katei ka jingjia ka la jia tang na ka daw ba u Bah Michael Warjri u la pyrshah ban iaid ki kali na katei ka surok PMGSY kaba la shna da ka sorkar Assam bad ruh ba ka High Court ka Meghalaya bad Assam ka la dep ai ka Stay Order ban sangeh ka jingtrei hadien ba la ujor da u Bah Michael kum u Secretary ka Hima Nongspung.
U nongthoh khubor u Mawphor u la dang ioh shuh shuh ka sakhi haba la ioh ban ïa kren bad ka khun jong u Bah Michael Wajri mynta ka sngi ha Nongpoh hadien ba ka la wan ban kynduh ïa ka Deputy Commissioner halor katei ka jingjia, ba ka Kong Bandalin Rani ka la iathuh ba ka daw tynrai hi ka jingshah thombor ha ki paidbah, ka dei namar ba u kpa jong ka u pyrshah ïa ka skhim PMGSY ban shna ïa ka surok rong bad ka jingkieng ban pyniasoh sha Meghalaya da ka sorkar Assam sha ka jaka ba la hap ha ka jylla Meghalaya bad ba u kpa jong ka ruh u la jop hadien ba u la ujor da ka mokotduma ha ka ingkashahri ka Meghalaya High Court bad Guwahati High ba ka ingkashari ka la ai ruh ïa ka ‘stay order’ ban pynsangeh ïa katei ka jingpyntrei ïa katei ka skhim katba ym pat lah ban pynbeit ïa ki kynrum ba la mih ka jingpyrshah halor kane ka jingpyntrei ia ka skhim PMGSY da ka sorkar Assam.
Ka la ong ruh kumba long haduh mynta ka kham kheinkor ïa u kpa uba don mynta ha ka along jong ki Pulit Assam ha Azra ha kaba nalor ba u la mynsaw na ka jingthombor ki paidbah, hynrei ki Pulit ka Assam kim shym la pynlait haduh mynta ba ki la pyrshang pynban ban pyngngat ha ka Ammunition Act da kaba kynnoh ba u pyndonkam ïa ki tiar siat (Suloi) ba wat ïa ka License ruh la thang dusmon da ki paidbah ha katei ka jingwan hiar thma ïa ka ing ka sem jong ka.
Ka la iathuh ruh ba shuwa ba kine ki jingjia ba sngewsih kin jia ka la dep ruh wat ban ujor ha u OC ka Patharkmah Police Outpost ba ki hap ban peitngor, hynrei ki pulit ki shim sting bad dei haduh ba la jia kane ka jingjia kaba la ktah shisha shi katdei eh ïa ka hok longbriew manbriew ba ki paidbah khlem da don shuh ka mynsiem briew ki la wan ban hiar thma kaba la long ka jingduh kaba khraw ïa ka ïing ka sem khamtam u kpa jong ka ha ka jinglong tymmen kaba ha ka rta kaba 76 snem khlem da l eh ïa ka kam sniew u la shah shoh shah bom bad shah kem pynban ha ki Pulit ka Assam kaba dei hi tang na ka daw ka jingujor jong u sha ka ingkashari ban pyrshah halor ki kam pynroi ba la wan rah da ka Assam ha ki jaka ba la hap ha Meghalaya.
Ka la kren bynniaw ruh ba wat ki Pulit ki don hynnin ka sngi bad ki ithuh ruh im im peit peit ïa ki briew kiba don kti ha katei ka kam bad haduh mynta kim shym la kem ne pynshitom katkum ki kyndon ka aiñ halor kitei ki kam sniew ba ki la leh bad la shah kem pynban da u kpa jong ka uba khlem leh sniew ei ei. Ka la ong ruh ba ka ithuh ruh ki briew kiba donkti ban pynshit ïa ki paidbah ban wan hiar thma ïa ka ing ka sem jong ka kiba dei hi ki nongialam shnong bad na ka liang jong ka mynta ka sngi ka la ujor ruh da ka ejehar ha Nongpoh Police Station ban dawa kem ïa kito kiba don kti ha katei ka kam beain, ka la ong.
Ka la iathuh ruh ba kine ki jingjia ki jia ka dei hi ka jingkhein sting ka sorkar Meghalaya ha kat kane ka jingjia ba sngewsih kum ka ing ka sem ka kynduh, hynrei ym shym la don satia kiba shim khia ban iarap ne ban ia kren sha ka sorkar Assam bad khamtam ban pynlait ïa u kpa jong ka na ka kti ki Pulit Assam kiba la kem bad rah ïa u kpa jong ka sha Assam.
Shuh shuh ka la kyrpad ruh ïa ka sorkar Meghalaya ba ka dei ban shim khia ia kane ka kam ban ia kren mardor sha ka sorkar Assam na ka byntaban pynlait noh mardor ïa u kpa jong ka, uba la noh ka rta bad uba dang donkam ka jingsumar na ki Doctor halor ka jingmynsaw kaba u la shah ktah na ka daw ka jingshah thombor ha ki paidbah.
U Nongthoh khubor u la leit ruh ban kynduh ïa ka Deputy Commissioner ha ka ophis treikam jong ka ha Nongpoh, ha kaba ka kong R.M Kurbah ka la iathuh ba na ka liang ka bor District ruh ki la shim khia halor kane ka jingjia bad tang mar ïa ïoh jingtip ka la phah ïa ki Magistrate bad ki Pulit ban leit tohkit naduh hynnin ka sngi bad haduh mynta ka sngi bad dei tad haduh ba ka ioh pdiang ïa ki kaiphot na ki Magistrate kan sap hah sha ka sorkar ban leh kaktum ki lynti jong ka ain halor katei ka jingshah thombor u Secretary ka Hima Nongspung.
Halor katei ka jingshah thombor u Bah Michael Warjri, na ka liang ki 2 seng ba kynthup ïa ka Federation of Khasi Jaintia and Garo People (FKJGP) hapoh ka jingïalam u Samla Kitbok Nongphlang Chief Organzing Secretary ka sengkmie bad u Bah Luistar Lyngdoh Secretary ka FKJGP, NKHD , Bah Lumlang Mawnai Vice president bad ka Hynniewtrep Youth Front (HNYF) Northern Region hapoh ka jingïalam u Bah Markus Marten President mynta ka sngi ki la hiar sha katei ka shnong naka bynta ban lap ïa ka jingshisha baroh hynrei kaba sngewlyngngoh ka long ba ha katei ka jaka ym don briew eiei wat ki nongshong shnong ki khlem wan mih lait noh tang ki pulit kiba ap pahara ïa ka iing bala shah pynpra jong u Bah Michael Warjri.
Katkum ka jingtip bala iohlum bad kaba la pynsngewlyngngoh la ïathuh ruh ba wat ki Myntri jong ka Hima Nongspung naduh u Syiem kim pat shym la wan khmih ne wan peit halor katei ka jingjia kaba u Secretary ka Hima u la shah thombor haki paidbhur haduh ba un da mynsaw.
Haba kren sha ki nongthoh khubor, u Bah Kitboklang Nongphlang Chief Organizing Secretary ka FKJGP Sengkmie bad u Bah Markus Marten ki la ong ba ka daw ka jingwan jong ka seng sha ka shnong New Balakhawa ka long ban lap ïa ka jingshisha halor ka khubor kaba la poi sha ki nongïalam ka seng ba u Secretary ka Hima Nongspung u Bah Michael Warjri u la shah thombor bad ther tyngeh ruh ïa ka sorkar jylla ba la katta snem ka jylla Meghalaya ka la ioh ïa ka jylla ba pura hynrei khlem u pud u sam kaba la wanrah shibun ki jingjia ba sngewsih, ki kynrum kynram tang namar ka jingkajia pud.
Ki la la ong ba kum ka seng ki dap da ka jingsngewkhia kaba jur ba ka sokar Meghalaya ka shu sngap mynthi bad shong kli kti halor u pud u sam bad kaba kham pynsngew lyngngoh shuh shuh ka long ba wat ïa ki kam pynroi hap ban wanrah da ka sorkar Assam haki thaiñ khappud.
Na ka liang ka seng kin sa leit ruh ban ïakynduh ïa u Myntri ka kam pohiing jylla ban pynshai halor kine ki jingjia bad ki kynrum ki kynram halor u pud u sam bad hakajuh ka por ka jingshah kem naka por shaka por ki briew naka jylla haki pulit Assam haba don kano kano ka jingkajia pud ba kum kine kim dei shuh ban dang jia nangne shakhmat, u la bynrap.