Press "Enter" to skip to content

7 snem ha along ryngkat ka kuna, ngat u nongleh beijot

Nongstoiñ, Jymmang 14: U runar u ba la leh beijot ïa ka khynnah 16 snem karta, kata u Aboriginal Byrsat 44 snem karta u la shah rai pynrem ha ka Ïingbishar ba don burom da kaba un hap ban shong ha along haduh hynñiew snem ryngkat ka kuna kaba long 20 hajar tyngka.
Kane ka rai jong ka Ïingbishar ba don burom jong ka Court jong u Session Judge West Khasi Hills District, kaba la pynmih ha ka 6 tarik mynta u bnai ka la rai pynrem ïa utei u briew hadien ba ka la dep ban bishar bniah nadong shadong.
Lah ban pynkynmaw ba katei ka jingjia shah batbor ïa katei ka khynnah samla kaba dang 16 snem, ka la jia naduh naduh 11 snem mynshwa kata ha ka 2 tarik u Risaw jong u snem 2008. La ong ba utei u runar u la rahbor ïa katei ka khynnah samla da ka jeep ka jong u hi bad kit sha kawei ka jaka kaba la tip kum ka Phodkynthei. Ha katei ka jaka u la leh ïa katei ka kam runar pyrshah ïa katei ka kynthei. Hadien ki jingujor, la ïoh kem bad la register ruh katkum ka Nongstoiñ PS Case Number 91(10) 2008 bad la pyngat kyndon ruh ïa u hapoh ka kyndon 376/363.
La ong ruh ba ha ka jingïakhun ïa ka mukotduma, na ka liang jong utei u rangbah ruh u la buh ïa la ki jong ki nongïasaid aiñ ban ïasaid na ka bynta jong u. Hadien ki jingbishar kiba bniah bha kiba la ïaid ruh haduh 11 tylli ki snem, na ka liang jong ka ïingbishar ka la lap ba u la leh shisha ïa katei ka kam runar ka jong u. Kumta na ka liang jong ka ïingbishar ka la rai pynrem noh shi syndon da kaba rai ban phah set phatok bad ba un hap ban siew ruh ïa ka kuna.
Ka rai ba la pynmih da ka Court jong u Session Judge ka WKHD, ka pyni sha ki paidbah ba wat lada ka jingbishar (trial) ka slem katno katno ruh, hynrei ka ïingbishar ka don ban ai ïa ka jingbishar kaba hok ïa ki lanot bad ban rai pynrem ïa ki nongleh kam sniew. Lyngba kiba kum kitei ki jingrai pynrem jong ka ïingbishar, kan pynsmiej ïa ki nongleh kam sniew khnang ba kin pyrkhat ruh ba ka aiñ kam long satia kaba synjor, hynrei long kaba khlaiñ bor bha.