Press "Enter" to skip to content

Bitar ki Contractor ba kwah kamai spah jubor ka KHADC na ka Labour Licence

Suba don ka bamsap ba shyrkhei ha ka UDA
Shillong, Jymang 14: Ki Contractor ba trei ïa ki kam bapher bapher, kila pynpaw ïa ka jingbitar shla ïa ka Khasi Hills Autonomous District Council (KHADC) haba kynnoh ba ka Council kala shu kwah kamai spah jubor na ka Labour Licence, kaba treikam na ka bynta ki Nongbylla Bar Jylla.
Kane ka jingkynnoh kala mih namar ka jingpynkiew rhah jong ka Council ïa ka bai Labour Licence, kaba la kiew haduh lai shah na kaba ju lum baroh shikatta. Ki ong ba kane ka jingkiew ka dang sdang mynta
u snem kaba long haduh T700 shibnai na ka T. 200 ïa uwei u Nongbylla Bar Jylla.
Kine ki Contractor (bym kwah pynpaw kyrteng) kila kynnoh ba jingkiew jong ka bai Labour Licence ka dei namar ka jingaiwai sha ki riew shimet kiba la shimkabu ban kamai spah na ka umsyep jong kiwei. Ki ong, kane ka jingpynkiew kala jia naduh ba thaw Executive Committee da ka kynhun synrop United Democratic Alliance (UDA) ba ïalam da u Bah Teinwell Dkhar kum u CEM.
Lah ban kdew hangne ba ka KHADC kala aiwai ia ka jingai Labour Licence sha u riew shimet ha ka dor wai ba T. 12 lak shisnem. Kat kum ka jingtip ba la iohlum, la iathuh ba ka KHADC kala buh dor ba ka bai licence ia ki Nongbylla Jylla kiba hap ha ka kyrdan Unskilled ka long T. 100, Semi Skilled T. 150 bad ki Skilled Labour ka long T. 200.
“Ngi la wad jingtip bha napoh KHADC bad ngi shem ba ka bai Licence ba ka Council ka buh ka dei tang T. 200 ïa uwei u nongbylla. Hynrei kumno u Nongshimwai (Contractor) u lum haduh T. 700 shikhlieh” buh jingkylli ki Contractor haba bynrap “Ngi kum ki Nongaikam ngi hap ban siew ïa ka bai Licence hynrei ngi sa khate pat na ki Nongbylla”.
Ki Contractor ki ong “Ngim pyrshah satia ïa ka Labour Licence ne ka dor ba ka KHADC ka buh. Ki Nongbylla bar Jylla ki dei ban don ïa ka Licence bad ki dei ruh ban siew ïa ka bai Licence kumba la buhdor da ka Council hynrei ban shu khrong palat pud hi, ngim sngew iahap satia”.
Ha kajuh ka por, kine ki Contractor kila pynpaw ïa ka jingsuba kaba jur ba kane ka jingpynkiew bai licence ka lah ban don ka jingïasngewthuh jingmut ba sop sop hapdeng u Nongshimwai bad ki Dkhot ka Executive Committee.
“Ngi suba jur ruh ba ka lah ban don ka jingbamsap ba shyrkhei na ka jingai Labour Licence namar kumno u Nongshimwai u nud ban pynheh ïa ka dor bai licence haduh lai shah (T.700 na ka T.200) khlem ka jingiatiplang jong u CEM ne ka Executive Committee” kila ong.
Ki Contractor kila kyntu ïa u CEM, ka Executive Committee bad ki Dkhot ka Liang Pyrshah ba kin tuklar lang ïa kane ka jing khrong khajna palat pud kaba long be-aiñ.
Ha ka dorbar mang tyngka ba la dep, ki Dkhot ka Liang Pyrshah kila pyrshah bha ia ka rai jong ka Executive Committee ban ai wai ia ka Labour Licence sha ki riew shimet halor ka nongrim ba ka Labour Licence kam dei na ka bynta ka jingiohlum khajna. Kila dawa ruh ba ka Council ka dei ban shimti biang halade ban pyniaid ia ka Licence.
Kat kum ka jubab na u Executive Member i/c Labout Bah Teibor Pathaw, ula iathuh ba ka Council ha u snem 2018-2019 kala ai haduh 5712 tylli ki Labour Licence sha ki Nongbylla Bar Jylla.