Press "Enter" to skip to content

Bteng ka jingjurip ki MLA ha Balakhawa, dang shah set phatok u Bah Michael

Nongpoh/Shillong: Ki Myntri sorkar, ki MLA, u CEM, ki EM ki Sengbhalang ki la nang ïai tuid ban leit jurip ïa ka jingshah thombor ka ïing u Bah Michael Warjri, Secretary ka Hima Nongspung ha Balakhawa, hynrei shi taïew ka la ïaid, une u riew tymmen ba la 78 snem ka rta u dang sahkut sah ha Phatok ha Guwahati.
Lah ban kdew hangne ba ha kine ki sngi baladep, u CEM bad ki EM bad MDC ka KHADC ki la hiar sha Balakhawa ban leit jurip ïa ka ïing ba la shah pynjulor jong u bah Michael Warjri, hadien kane la bud sa ki MLA ka Seng Congress, kynthup ïa u Myntri Rangbah ba mynsnuwa, u Dr. Mukul Sangma. Nalor ki nongïalam saiñpyrthei, ki Sengbhalan bapher bapher ruh ki la leit jurip ha kine ki sngi baladep.
Ha ka sngi ba ar, sa san ngut ki MLA, kynthup ïa arngut ki myntri ka sorkar MDA, u Bah Hamlet Dohling Myntri ka tnad pynroi sor, bad u Bah AL Hek Myntri ka tnad ka koit ka khiah lem bad 3 ngut ki MLA ba kynthup ïa u Bah Sosthenes Sohtun MLA ka Jirang , Bah Macmilan Byrsat MLA ka Nongstoiñ bad u Bah Renikton Lyngdoh Tongkhar MLA ka Makyrwat mynta ka sngi kila leit ban hiar sha ka shnong Balakhawa ban jurip hi dala ki jong ki khmat halor ka jingshah thombor ka iing jong u Bah Michael Warjri Secretary  ka Hima Nongspung haka jingdon lang ki magistrate bad pulit ka Ri Bhoi.
Shuh shuh ha katei ka jingleit jurip na ka liang kitei ki Myntri kila phah ruh ïa ki bor district ban pynkloi ïa ka kaiphod halor katei ka jingjia khnang ba ka sorkar kan lah ban pynkloi bad shimkhia ban leh ïa kabadonkam halor katei ka jingjia.
Haba kren sha ki nongthoh khubor, u Bah Hamlet Dohling Myntri ka tnad pynroi sor ka sorkar jylla u ong ba hadien ka jingioh jingtip halor katei ka jingjia bad iohi dala ki jong ki khmat mynta ka sngi, u la pynpaw ka jingsngewkhia kaba jur halor katei ka jingjia kaba da ki phew ngut ki paidbah ki leit ban thombor ïa u Bah Michael Warjri marwei bad ka iing ka sem ki jingdon jingem baroh bad ki jingthung jingtep baroh, kaba kane ka jingleh jong ki riew shim kabu ka dei ka bym lah ban pdiang haka imlang ka sahlang bad pynrem jur halor katei ka jingjia.
U la ong ruh hadien katei ka jingleit jurip na ka jong ki kila pynkhreh ruh ban phah kaiphod sha u Myntri Rangbah ka jylla ba pynsngew ïa baroh ki jingjia ha katei ka jaka, bad ba u Myntri Rangbah un leh eiei halor ka jingdonkam ki paidbah kiba shong ba sah haka thaiñ khappud kumba u MLA ka Jirang u la pynsngew ba la dei ban buh noh ka Police Outpost ha katei ka jaka na ka bynta ban ïada ïaki paidbah bad u pud u sam.
“Ka Police Outpost kala dei kaba donkam bad kongsan ha katei ka jaka, na ka bynta ban wanrah ka suk ka saiñ bad khamtam ban ïada na ka jingkyntur pud ka Assam, ka ban long kum u paia ba skhem ban iada ïa u pud u sam” la ong u Bah Hamlet da kaba bynrap ruh ba ka sorkar kan ïaleh katba lah ban shimkhia ban pynbeit noh ïa u pud u sam, bad ha u bnai jylliew kan sa don ruh ka jingïalan bad kynduh hapdeng ka sorkar Meghalaya bad Assam na ka bynta ban ïakren bad pynbeit halor u pud u sam bad ki kynrum kynram haki thaiñ khappud.
Na ka liang u Bah Sosthenes Sohtun MLA ka Jirang ha katei ka sngi u la ban jur ba ka police outpost la dei ban buh noh ha katei ka thaiñ na ka bynta ka shongsuk shong saiñ ki paidbah, bad ba ki jingjia ba sngewsih kin nym jia shuh nangne shakhmat kumba ka police Station kaba hajan eh ka dei shaduh Khanapara ba ka long ka jingeh kaba khraw ïa ki paidbah, bad ba ka Assam kan nym iohlad shuh ban dang kyntur pud nangne shakhmat.
Na ka liang kitei ki myntri ki ong ruh ba ïa ka kaiphod baroh yn sa rah sha u Myntri Rangbah na ka bynta ban pynurlong ïa ki jingdonkam ki paidbah bad ban wanrah ïa ka shong00Wat bam tang ban kdang.