Press "Enter" to skip to content

Dawa u MLA barim ka Rambrai ban pynsangeh ïa ka Project bording ka Assam

Nongstoiñ, Jymmang 14: U Bah K.P.Pangniang MLA/MDC barim ka Rambrai Jyrngam, u ba bat mynta kum u Co Chairman jong ka Meghalaya State Dev Reforms Commission jong ka sorkar jylla, u la hiar sha ka shnong Kyrshai ban ïakynduh ïa ki nongsynshar shnong bad ki paidbah jong katei ka thaiñ, halor ka jingeh ba ki paidbah jong ki 25 tylli ki shnong ha katei ka thaiñ ki ïakynduh na ka daw jong ka jingthmu jong ka sorkar Assam ban den ïa ka wah Khri na ka bynta ka projek pynmih brding.
Ha ka jingïakynduh lang kaba la pynlong ha Kyrshai Guest House, la wan ban ïadon ryngkat da ki longkmie bad ruh ki samla jong ki shnong baroh kiba don ha katei ka thaiñ. Ha ka jingïatai ki rangbah, ki longkmie bad ki samla ki la pynpaw ïa ka jingpyrshah kaba jur ha kaba ki la ong ba kin ym ai lad da lei lei ïa ka sorkar Assam ba kan pynurlong ïa katei ka jingthmu namar ba kan ktah ïa ki paidbah jong ki 25 tylli ki shnong kiba don ha katei ka thaiñ.
Ha ka jingïalang da kawei ka jingmut ki la rai ban phah da ka dorkhas sha ka sorkar MDA lyngba u Myntri ba dei peit ïa ki kam bording ha ka jylla, ban tuklar mardor ïa katei ka kam ban ban pynsangeh noh shi syndon khnang ba ki paidbah kin ym don jingartatien shuh. Ha ka dorkhas kaba la soi lang da u Bah K.P.Pangniang ryngkat ki rangbah shnong jong katei ka thaiñ, yn sa pyn poi ha u Myntri kam bording ka jylla ha kine ki sngi ban wan.
Kum ban pynkynmaw ba ka jingtei ïa katei ka project da ka sorkar Assam lyngba ka Bramaputra Board, kan ktah haduh kumba palat 25 shnong ei ei ba kynthup ïa kiba na Meghalaya bad Assam namar ka um kan tap lut na ka jingkynjang jong ka um ka ban long haduh kumba 60 mitar. Kumjuh ruh, ka jingthmu jong ka sorkar Jylla ban shna ïa ka surok na Nongstoiñ-Rambrai shaduh Kyrshai bad Chaygaon, kan kut noh lada shna ïa kane ka project bording jong ka Assam.