Press "Enter" to skip to content

Duhnong ki Trai Jylla ba khlem treikam ka bhah thungkam ha ki Ophis Sorkar Pdeng

Shillong, Jymmang 14: Ki Nongshongshnong trai muluk jong ka Jylla Meghalaya, la slem bah kila shu shah pynduh ei ïa ka hok ban ïohkam ïohjam ha ki Ophis jong ki Tnad , ki Bank bad ki karkhana ba khmih da ka Sorkar, ba don ha Jylla namar ka jingbym pyntreikam hok ïa ka bhah thung kam ba la mang sha ki paid riewlum.
Ki Nongshong shnong ka Jylla la slem bah, la pynngeit ïa ki ba ki don hok ban ïoh ïa ka bhah thungkam ba tang 7.05% ha ki kam jong ka kyrdan “c’bad “D’ ha baroh ki Ophis jong ki Tnad, ki Bank bad ki karkhana ba khmih da ka Sorkar Pdeng ba don ha Jylla.
Hynrei ka Sorkar Pdeng lyngba ka Ministry of Personnel, Public Grievanace and Pension, khatduh khatwai kala pynshai ba ki Scheduled Tribe jong kaJylla Meghalaya ki don hok ban ïoh ïa ka bhah thungkam ba long haduh 44%.
Kane ka jingpynshai jong ka Ministry ka Sorkar Pdeng kala mih pyrthei lyngba ka RTI ba la pan da u Bah Arju Dkhar, u Nong shongshnong ka shnong Lummawbah, Upper Shillong, uba la pan jingtip ïa ka bhah ïohkam ba la mang ïa ki samla wadkam ka Jylla ha ki Tnad treikam bapher bapher jong ka Sorkar Pdeng ba don ha Jylla.
Kat kum ka jubab ïa ka RTI ba wan na u Raju Saraswat, Under Secretary ka Ministry of Personnel, Public Grievances and Pension, la kren shai ba kat kum ka Office Memorandur jong ka Ministry ba pynmih ha ka 5 tarik Naitung, 2005, ki Scheduled Tribe jong ka Jylla Meghalaya ki don hok ban ïoh ïa ka bhah thungkam ba 44 % ha ka kam Groud ‘C’ bad Group ‘D’ ha baroh ki Ophis jong ka Sorkar Pdeng.
Une u Heh ka Ministry ula pyntip ba ka bhah ïa ki Scheduled Caste ka long tang 1% bad ïa kiwei ki jaidbynriew ba dang sahdien ka long 5%. Ula pyntip ruh ba kane ka bhah thungkam ka dei kaba la pynshong nongrim kat kum ka khana samari jong u snem 2001.
Halor kane ka jubab na ka Ministry, u Bah Arju Dkhar ula phah jingthoh sha u Chief Secretary ka Jylla Bah P.S Thangkhiew bad dawa ban shimkhia ha kaban lah pyntreikam noh ïa ka bhah thungkam kat kum ka Office Memorandum jong ka Ministry.
U Bah Arju ula kyntu ruh ïa u Chief Secretary ka Jylla ba un pynmih ïa ka hukum (official order) sha baroh ki Tnad ka Sorkar Pdeng ba don ha Jylla ba ki dei ban pyntreikam ïa kane ka bhah bad ban thungkam noh ïa ki samla trai riewlum ka Jylla ha baroh ki kam ba ki dei hok ban ïoh kat kum ka jinglaitkam ba sdang naduh u bnai Naitung 2005 haduh kine ki sngi ba mynta.