Press "Enter" to skip to content

Ha ka ‘Komishon ki Riewlum’ ujor ki ADC ba long mawjynthut ka Para 12 A

Shillong: Ki 3 tylli ki Autonomous District Council jong ka Meghalaya, ki la ujor hakhmat ka National Commission for Scheduled Tribe lane ka Komishon ba peit ïa ka bha ka miat ki paid Riewlum, halor ka jingthut ka jingtreikam na ka daw ka jingdon ka Para 12 A. Ka Para 12 A, ka ong ba lada don ki aiñ jong ki District Council kiba ïatakhuh bad ki aiñ ka sorkar jylla, ki aiñ ka District Council ki ïap noh.
Ki nongmihkhmat na kine ki lai tylli ki ADC, kata ka KHADC, ka JHADC bad GHADC, ki la iakynduh ia ki dkhot ka Commission ha ka sngi ba ar ha Pinewood Hotel ha kaba ki la pynpaw ia ki jingsngew jong ki lyngba ka memorandum ba la ai sha u Chairman ka Commission, u Nandkumar Sai, uba la wan ryngkat bad kiwei de ki dkhot ka Commission.
Haba iakren bad u Bah Teinwell Dkhar, CEM bad kumjuh ruh u Bah PN Syiem, Chairman ka KHADC, kiba la ioh iakynduh nyngkong ia ka Commission, ki la iathuh ba ki la rah shibun ki mat hakhmat ka Commission bad kawei na kine kadei ka jingtreikam ka Para 12 A, kaba la long ka jingkhanglad ia ki District Council khamtam eh ha kaba pyntreikam ia ki ain. Nalorkata ki la iakren ruh halor ka jingslem palat ki bill kiba la mynjur da ka District Council ban ioh jingmynjur pat na ka sorkar jylla ba ka KHADC ka kwah ban ai bor beit ia u Lat ka jylla ban ai ia ka jingmynjur. Kiwei pat ki mat ki long halor ka jingpyntreikam ia ka pisa lyngba ka Finance Commission, ha kaba kane ka pisa ka hap iaid lyngba ka sorkar jylla ba kan sa poi sha ki District Council. “Ngi la ïakren ruh halor ka Article 280 kaba ïadei bad ka jingïoh pisa beit na ka sorkar pdeng lyngba ka Finance Commission”, la ong u Bah Pynshngaiñ.
Kawei pat ka mat ba la ïakren bad ka National Commission, ka long halor ka jingaiti biang ïa ka bor ban ai ïa ki Scheduled Tribe Certificate, kaba la knieh noh da ka sorkar jylla 1987. Nangta halor ka mat ba ïadei bad ki marpoh khyndew kiba kham duna dor.
Na ka liang ka JHADC pat ka la iakynduh hapoh ka jingialam u Bah Thombor Shiwat, CEM ryngkat kiwei kiwei de ki MDC. Ka JHADC ruh ka la pynpaw ia kajuh ka jingeh kata ka long ka jingtreikam ka Para 12 A, kaba la long kum ka dieng pyngkiang ia ka jingtreikam ki District Council, Na ka liang jong ki, ki la pynpaw ruh ka jingeh halor ka jingwan ka pisa, nangta ka jingduna pisa na ka daw ka jingkhang tih dewiong bad kiwei kiwei.
U Chairman ka High Power Committee jong ka GHADC, u Augustine Marak, u la ïathuh ba ka na ka liang jong ki, ruh ki la jong ki ruh ki la rah hakhmat ka Commission halor ka Para 12 A bad ka jingïoh jingïarap pisa lyngba ka Finance Commission.
Haba iakren bad u Chairman ka Commission, u la ong ba ka jingwan ka Commission sha kane ka jylla ka long ban ioh jingtip kaba kham bniah halor ka jingtreikam ki District Council. U la iathuh ba ki District Council ha ka jingiakynduh bad ka Commission, ki la pynpaw ia kiba bun ki jingeh jong ki.
“Ngi la bthah ïa ki ba kin pyndonkam ruh ïa ka pisa na ka bynta ban pynneh pynsah ïa ki Kolshor tynrai bad kumjuh ruh ba kin pyndonkam bha ïa ka pisa na ka bynta ban pynneh pynsah ïa ka mariang”, la ong u Nandkumar.
Halor ka jingdawa ban ïoh rung ka Ktien Khasi ha ka Khyrnit kaba phra, u Chairman ka Commission, u la ong ba na ka liang ka Commission kan ïaleh katba lah ban peit na ka bynta ka bha ka miat jong ki Riewlum bad ka jingneh jingsah jong ka Ktien ruh kan long kawei na kine ki mat. Ha kaba ïadei bad ka Ktien Khasi u la ong ba dang donkam ban da pynbiang bha ïa ki jingdonkam katkum ka jingtreikam ka Riti Synshar jong ka ri India.
Ha kaba ïadei bad ki jingeh ba la pynpaw da ki District Council, u la ïathuh ba na ka liang ka Commission kan sa rah ïa kine ki mat sha ka sorkar pdeng.