Press "Enter" to skip to content

Jop ka Laban SC ïa ka Smit SC ha ka U-18 SPL ka SSA

Pynbna ka Nongrim Hills ïa ka kynhun ïalehkai

Shillong, Jymmang 14: ka Laban Sports Club ka la lah ba kan pynliem noh ïa ka Smit Sports Club da 2-1, ha ka lympung ïalehkai jong ka U-18 Shillong Premier League ba la long hynne ka sngi Hatmajai ha MFA Turf, Polo.
Haba phai sha ka jingïalehkai, ka Laban SC lyngba u Solomon Shulai ka la lah ba kan tam shakhmat da shi kol ha ka minit kaba 6.
Ka jingioh ban thep u Solomon ïa kane ka kol ka la shu jia ryngkhat hadien ba ki player ka Smit SC kim shym la poi pyrkhat ba ka bol kan sam lyngba ïa ka kut ïalehkai ka jong ki bad u Solomon ula lah ban tehlakam ïa ka bad ban khyrwit ïa ka sha lyndet ka kol.
Hynrei lada ïa nujor pat ïa ka rukom ïalehkai ha madan, u sawar ka nam ïalehkai ba itynnad u la noh bha sha ka kynhun ïalehkai ka Smit SC, namar man la uwei pa uwei u rang ïalehkai u jong ka, u don shisha katta ka sap ban lah ban tehlakam ïa ka bol bad ruh ban teh lakam ïa ka jingïakhun.
Tangba ka jingeh ïa ka kynhun ïalehkai ka Smit SC ka long ba ha ka khep ba dei pat ban thep ïa ki kol, ka bynta ka attacking third ka jong ka, ka luiñ bha bad bunsien la ieng ban khanglad noh ïa ki da ki rang ba ïalehkai shadien jong ka Laban SC.
Hynrei ka bok ka nusip ka la noh pat sha ka kynhun ïalehkai ka Laban SC hadien ba ka la ioh pat ïa ka kabu ba kan thep ïa ka kol kaba ar ha ka minit kaba 68 kaba la wan lyngba u Aiban Khongsngi.
Pynban ka Smit SC kam shym la duh mynsiem hynrei ka ïai bteng ba kan ïakhun tyngeh bad kane ka sur ïalehkai ka la pynurlong ïa ka ba kan da ioh ïa ka kabu ba kan thep ïa ka shi kol ka jong ka ha ka minit ba 74 lyngba u Shanborlang Warlarpih.
Marsien ioh ban thep ïa kane ka shi kol, ka kut ïalehkai ka Laban SC ka la khih win hi puk da ka jingñion bor bah ki player ka Smit SC, pynban hapdeng ka jingïakhun ka Smit ka la hap noh pat ba ka ïalehkai satang shiphew ki player ha madan hadien ka jingshah beh noh jong u R Warkhyllew ha ka minit kaba 82 ka, kaba da kylla ka la theh umpjah ïa kata ka mynsiem ïakhun ïa ka Smit bad ba khatduh ba kan da shah rem syndon ïalade ha kane ka kynti ïakhun kaba mynta.
Ha kawei pat ka khubor ka long ba ka Nongrim Hills Sports Club ka la wan shakhmat ban pynbna ïa ki kyrteng ki rang ïalehkai ban mihkhmat ïa ka kob ha kane ka lympung.
Ka jingïalehkai sdang ka Nongrim Hills SC kan dei mynta ka sngi Balang pyr-shah ïa ka Mawkhar Sports Club ha ka por 3:45 PM.
Ki kyrteng ki player ka Nongrim Hills SC ki long u Donryngkat Nongkhlaw, Wilson Langstieh, Niwan-O Bareh, Shanmeiaki Warlarpih, Bestparland Nongrang, Dondorlang L. Nonglait, Brilliant Thabah, Banshem-phang Kurbah, Shanbha Nongrum, Phibankhrawbok Nongkhlaw, Wankitborlang Lyngdoh, Gadiel Lhouvvum, Franklyn Surong, Wanbantei Lyngkhoi, Stiffgleford Lyngdoh bad Adarsh.