Press "Enter" to skip to content

Kam ka HNLC ba siat ïap ïa u Bah Romeo, kynnoh ba dei u Nongsyntiat ki Pulit

Shillong, Jymmang 14: ka kynhun kiengatiar Hynñiewtrep National Liberation Council (HNLC) kala kam ba ka siat ïap ïa u Bah Romeo Lyngdoh myn ha ka miet sngi U Blei ha Lapalang bad kynnoh ba une u rangbah u dei u Nongsyntiat (Informer) jong ki Pulit.
“Ki shipai jong ngi kila donkti ha ka jingïap jong u Bah Romeo Lyngdoh, uba la shah rai pynïap naamr ka jingleh ïa ki kam ba pyrshah ïa ka HNLC bad ka Jaidbynriew” ong u Bah Saiñkupar Nongtraw, General Secretary cum-Publicity Secretary ka HNLC ha ka kyrwoh ba phah hynne ka sngi ba-ar.
U Bah Romeo Lyngdoh ula shah siat ïap haduh 3 kuli ha ki arngut ki briew ba kieng suloi AK-47 myn ha ka miet sngi U Blei, ha ka por kumba 10:30 eiei. Ïa u Bah Romeo la siat hapoh ka Ïingsah jong u, ha Lapalang kaba jngai kumba 12 Km na Pynursla.
Haba pyntip ba ka HNLC kala thwet ban pynïap ïa u Bah Romeo naduh u snem 2008, u Bah Sainkupar ula ong “U dei u Agent ba treikam kum u Nongsyntiat ki Pulit, ula ïoh ruh ïa ka jingsiew kaba heh bad u dei ruh uba ju iarap ban thung Nongsyntiat na ka bynta ki Pulit ka Jylla la ka dei kiba na Jylla ne kiba na Bangladesh.
Ka HNLC kala kynnoh ruh ïa u Bah Romeo halor ka jingshah kem jong ki ehrang ka kynhun bad u bomb IED na Pynursla, kaba la jia ha u snem 2016.
Lah ban kdew ba ha u snem 2016, ki Pulit kila ïoh kurup ïa bun bah u bomb IED na ki laingut ki ehrang ka HNLC bad ka United Liberation front of Asom (ULFA) na kawei ka kali ba ki shong ha ka shnong Mawlieh,kaba don marjan ka Langkyrdem.
“U dei ma u (Romeo) uba la ai jingtip sha ki Pulit haba ïadei bad kine ki ehrang namar ba kila shim wai ïa ka kali jong u khlem da tip ba u dei u Nongsyntiat ki Pulit. Ki Pulit kila pyndonkam ïa u la slem bad u da ïoh ruh da ka jingsiew” ong u Bah Sainkupar.
Une u Nongïalam ka HNLC ula ong ba ka Seng ka kwah ban pyntip ïa ki paradoh parasnam kiba trei bad ka Tnad Pulit bad ruh ka Tnad Syntiat, ba kim dei satia ban sngew sarong ïa kaei kaba ki leh pyrshah ïa ka Jaidbynriew. U ong, “Ki dei ban sngewthuh ba ka HNLC ka ieng ïakhun halor ka daw hynrei ki pat kila iatreilang bad ki briew kiba kwah ban pynlong ïa ngi kum ki mraw”.
“Ki dei ki Nongshetkylla bad da kaba leh kumno, kim ïapher satia bad ki Nong India kiba la shakri ïa ki shipai Bilat pyrshah ïa ka Ri India” ula ong bad bynrap “Bah shi katta kila shu kheiñ troiñ ïa ngi hynrei mynta ngi la pynshisha ba ngi lah ruh ban pyni da ki kam”. Ka HNLC kala kyrpad ïa ki paradoh parasnam ban ieid ïala ka Ri bad ban ieng iada ïala ka jinglong ba kyrpang bad ong “Kan dei lyngba ki paradoh parasnam bad ka jingkyrshan jong ki ba ngin lah ban pyntyllun shakhmat ïa ka jingïakhih jong ngi”
Kat kum ka jingong jong u “Ka Seng kala kut jingmut ban pynduh jait ïa ki kruin (virus) kiba long ka daw bah ka jingïap jong kiba bun ki dkhot ka kynhun”haba bynrap “Nangne shakhmat, ngin nym pynpaw pyrthei shuh ïa ka kyrteng jong ki briew kiba ngi la buh ‘Hitlist’ hynrei ngin pynïap shuwa bad ngin sa kam pat ïa ka jingdonkti jong ngi hadien”.
Haba kynthoh ba ka jingshimia ka lynti iaumsnam ban pynkut ïa ka jingiaumsnam kan nym dei satia ka lynti ban weng ïa kino kino ki jingeh, u Bah Sainkupar ula ong “Katba ka Sorkar ka dang pyndonkam ïa ka lynti iaumsnam, ngin nang ïoh beit ïa ki jingia umsnam. Lada ka Sorkar ka sngew ba ka lynti iaumsnam ka lah ban weng ïa baroh ki jingeh, “pyrshah ïa ngi’, ki shynpriah kti jong ngi kila long ba khreh ban khem ïa u jingsiat (trigger) bad ai ba ki kuli kin ksam ïa ki dohnud jong ki nongshun”.