Press "Enter" to skip to content

Kyrpad ka KSU ban khynra ïa ki dukan bar jylla ha Nongmensong

Shillong, Jymmang 14 : Ka KSU Nongmensong Unit ha ka sngi Nyngkong ki la kyntu ïa u Executive Member ba dei peit ïa ka tnad Trade ha KHADC, Bah Paul Lyngdoh ba u dei ban phah khynra mardor ïa ki dukan jong ki bar jylla kiba khaii be-aiñ ha Nongmensong.
Haba kren bad ki lad pathai khubor, u Bah R Kharjana, President ka KSU Nongmensong Unit u la ong ba lyngba ka RTI na KHADC ki la ïohi ba don tang 5 tylli ki dukan jong ki bar jylla kiba ïoh ïa ka laisen khaii hynrei ha ka jingshisha pat ki don palat spah tylli ki dukan ba khaii ha katei ka thaiñ.
Da kaba pynpaw ïa ka jingsngewkhia kaba jur halor ka jingroi ki bar jylla kiba khaii be-aiñ ha Nongmensong khlem da don ïa ki kot ki sla kiba biang, utei u heh KSU u la ong ha ka por ba ka seng ka leit ban khynra bad ka khang khyrdep ïa ki dukan ki bym don ïa ki kot ki sla hyrnei tang hadien shi sngi ne ar sngi kitei ki bar jylla kila plié biang ïa ki dukan jong ki.
“Kumta, ngi la dawa na u EM uba khmih ïa ka tnad khaii pateng, Bah Paul Lyngdoh ba ka Council ka dei ban phah khynra ha katei ka thaiñ bad ban khang khyrdep ïa ki dukan jong ki bar jylla kiba khaii be-aiñ,” bynrap shuh shuh u President. La ïathuh ruh ba na ka liang u Bah Paul ruh u la kular ban shimkhia halor kane ka jingdawa bad ba ka Council kan sa khmih bniah shwa ïa ki kot ki sla khnang ba yn ïoh ban khang khyrdep shi syndon ïa kitei ki dukan kiba khaii be-aiñ.
Na ka lang ki nongïalam ka KSU kila pynpaw ïa ka jingsngewkhia halor ka jingïoh jong ki bar jylla ban khaïi laitlan khlem ka laisen khaïi bad kane kala kylla long pynban ka jingknieh ïa ka jingkamai jakpoh jong ki samla trai ri trai muluk khamtam haba ki samla ha kane ka juk kaba mynta ki mad ïa ka jingkyrduh kam kyrduh jam.