Press "Enter" to skip to content

Mano ban synshar ïa ka ri

Ka elekshon ban jied ïa ki dkhot Member of Parliament (MP) hapoh ka ri kan jam noh sha kaba kut, hadien ba ka Election Commission of India (ECI), ka dep shwa ba kan pynlong ïa ki hynriew kylla (Sixth Phase) jong ka jingïathep vote ki paidbah ha baroh ki bynta ne ki jylla kiba don ha ka ri, kaba la ñiew ïa ka kum ka jingïashim bynta ba bun bha da ki paidbah nong shnong jong ka ri ha kane ka pyrthei.
Ha kiba bun hi ki khep, lah ban ong ba ka jingïathep vote ka long kaba ïaid beit lait noh tang ha ki katto katne ki jylla kiba kham ïa tan tyllai bha hapdeng ka seng BJP, ba sngewsih ba katta ka jingïashong shit ne ïashim bynta u paidbah ka da poi ruh shaduh u pud jong ka jingïa pynïap, hynrei salonsar hi ka elekshon kaba mynta ka dei kaba pynkmen bha ïa ka ECI ba kan lah ba kan pynlong ïa ka.
Hynrei wat lada ka jingthep vote ka ïaid beit, tangba ka jingpyndonkam ïa ki kor thep vote kum ka EVM ne ka VVPAT, la don pat ki jingthut ha ki kato katne ki eleshon, kaba ïai pynsyier bha ïa ka mynsiem jingshaniah ka jong u paidbah ïa kine ki kor kiba la pyndonkam. La ka long mo kaba tikna bad kaba kynsai tam ban kam ne ban ñiew bad shim ïa ka kum ka jingpyndonkam kaba pura ha kane ka ri ba ïar bha ka synshar paidbahha ka pyrthei.
Kumta ha shwa ba kane ka elekshon kaba mynta kan jam sha kaba kut noh artad ka jingïathep vote jong u paidbah, la sdang ïa bun kam pat ban ïa pynwandur ïa ki khana mano sha ban synshar ïa ka ri hadien ba la dep ban ñiew ïa ki vote, la ka BJP marwei kan ioh ba kan synshar khlem da donkam shuh ïa la ki paralok ba la dep ban kyrshan ïa ka ha ki san snem kiba la leit, hato ka Congress bad kita ki paralok ba bun tam eh ki jong ka ha ka ri kin ïalam ïa ka ri ha kine ki san snem kiban wan.
Kane ka mat mynta ka long kaba u paidbah nong shnong ha ka ri mynta u ïa pur ïalap khana ha man la ki jaka ba ïa lang bun briew, ki ïa kheiñ ïa diah, ki ïa thew bha ïa u sawar ban pynksan ïa la ki ñia ki jutang ki jong ki ban ïa kam nongkynti ba katta ka seng saiñ pyrthei ba ki la jied ïa ki kin long kita kiba khreh ban bat ïa ka jingsynshar ha ki san snem kiban sa wan.
Tangba kiei kiei baroh kin sa paw haba shit ba shai ha ka sngi ba la ñiew ïa ki vote, hangne yn sa iohi mano ban thaw ïa ka sorkar ha ka ri, namar kumba ka long imat ka BJP kan dang wan biang ha ka bor, kaba lehse ka jingjop kan kham duna lada ïa nujor na ki san snem kiba la leit noh, hynrei ma ka ryngkat bad ki paralok ba la ïatrei lang sa shisien kin dang wan biang ha ka bor naka bynta ban synshar ïa ka ri, hynrei kiwei pat ki seng saiñ pyrthei khamtam lei lei ka Congress bad ki paralok ki jong ka ha nongbah Delhi ba ha ki jylla kiba ka ïatrei lang, ki ruh kim duh jingkyrmen namar ki sngew skhem ba ha kane ka kynti hi kaba mynta, u paidbah un ai beit ïa ka rai ban weng noh ïa ka BJP sharud bad ailad ïa kiwei pat ki seng saiñ hima ban synshar ïa ka ri.
Hynrei ka jingeh kaba la ap lypa ïa ka ri ka long lada jia ba ka jingsyshar ha ka ri, ka dei kaba ïa synrop lang da bun bun ki seng saiñ pyrthei, ka shuki jong ka sorkar kaban synshar ïa ka ri, da lei lei kan nym long kaba skhem, ha kano ma kano ka por kan don beit ka jingïapher jingmut, nangta sa ka ïaknieh ïa ki shuki myntri, ka jingbym lah ban bhah kam bhah jam khamtam lei lei lad dei ki khep ba ïano keiñ ban ïa mon lang ban jied ïa ka kam shuki Myntri Rangbahduh.
Kumta u paidbah ïa mynta un long uba pynkhreh ban sakhi ba hadien bala dep ban ñiew ïa ki vote, u kwah nyngkong ban shem bad iohi ba ka ri kan ioh ïa ka synshar kaba skhem, kaba ar ba kano ma kano ka kynhun seng saiñ pyrthei haba ka ioh ba kan bat ïa ka jingshynshar ka donkam ban wanrah ïa ki mat treikam ban long ki jingmyntoi ba kiban ïarap shisha ha kaban kyntiew ïa ka ri ha baroh ki liang, shuh shuh donkam ban ioh ruh ïa ka sorkar kaba skhem khnang ba kan nym mih satia ka kynrum kynram ha ka liang ka saiñ hima sima ha ka ri ha ki san snem kiban wan, namar lada ka sorkar kam skhem, kan ktah bha ïa ka ioh ka kot bad ïa ka roi ka par jong ka ri hi baroh kawei.
Nalor katta ka don ruh ka jingeh kaba kum u paidbah u la dep ba un mad na ki jingkylla ha kiba bun ki rukom pyntreikam jong ka seng BJP ha ki san snem kiba la dep, ha kaba kawei na ki jingkylla kaba la ktah bha ïa ka pla tyngka u paidbah ka dei ka GST kaba ha shwa jong kane dei shwa ka Demonitisation, kaba haduh mynta mynne, u paidbah uba bun balang um pat lah ban iohi ïa uta u soh jong kine ki artylli ki jingkylla kiba ka sorkar NDA kaba dang synshar mynta ha ka ri kan kam ba kine ki artylli ki mat ki la lah shisha ha kaban kyntiew ïa ka ri.
Sa kawei kaba u paidbah u ap khmih lynti ka long ba kano ma kano ka sorkar kaba synshar ïa ka ri, ka dei kaba lait ha ka shrip jong ka bamsap, kaba haduh mynta mynne kane ka kam, ka la dei shisha u kruiñ bah uba la bam naduh tyllong ïa ka ri, kaba kat shaba phai mynta la paw pen ryngkew ki dak ki jong ki, shuh shuh kaba kham ktah eh ïa ka ri ka dei katta ka khurai kaba sdang ban ïar bha katta hi ka long ba uba riewspah u la nang kiew shakhmat hynrei uba duk une u ïai im sah ha ka jingkyrduh bad ban mad ïa ki jingeh suda kat shaba u phai.
Nalor katta kaei kaba u paidbah ka ri u kwah eh na ka sorkar ban wan ban synshar ka dei ka jinglah ka jong ka ban tehsong biang sa shisien ïa ka ri, kampher lad dei hapdeng ki para bynriew ba im ha kino ma kino ki jait niam jait rukom, ka jinglah ban tehsong ïa ka ri khlem da ñiew beiñ ñiew tang ïa ka ktien ka thylliej, ka jingsngew pher jait ne kynja bad kaba kham kongsan leilei ka long ba kum u paidbah u kwah ka long ban ailad ïa ka jingmane ba laitluid khlem da don kino kino ki jingban beiñ ne leh shilliang khmat ïano ïano ruh.
Dei halor kine kiei kiei baroh ba ka 23 tarik u Jymmang 2019, kan dei ka sngi ba u paidbah ka ri u ap khmih lynti ïa ki sorkar ban ïalam ïa ka ri halor ka nongrim ba la saiñ la tiah janai bha ïa ka kat kum ka riti synshar jong ka ri, ba kita ki nongsaiñ dur ki la dep ban iohi lypa ïa kum kane ka sngi kaba mynta ba lymda tehsong ïa la ka jong ka ri, shisien ka sngi ka ri kan jot kan pait kan pra bad khlem da lah shuh ban wanrah biang ïa ka jingïatylli hapoh jong ka.