Press "Enter" to skip to content

Tyrwa u MLA ban mang skim pynitynnad ïa ka Them-metor

Shillong, Jymmang 14 : U MLA ka Shillong North, Bah Adelbert Nongrum u la pynpaw ba u kloi ban bhah lang ïa ka skim ba u ïoh kum u MLA na ka bynta ban pynitynnad ïa ka Them-metor hadien ba ka sorkar ka la dep ban pynkynriah noh sha kawei pat ka jaka ïa kito kiba sah hangtei mynta.
Haba pynpaw ïa kane ha ki lad pathai khubor hadien ka jingwan jurip ïa ka Motphran, Bimola bad ki jaka ba marjan ha ka sngi Nyngkong, u Bah Adelbert u la ong ba ka sorkar kam dei shuh ban pynslem ban pynkynriah noh ïa kito kiba sah ha Them-metor sha ka jaka ba la pynkhreh. “Ym don jingeh ïa ka sorkar ban leh namar kadei ba ki pynkynriah ym ba ki beh ïa ki na katei ka jaka,” u la ong.
Shuh shuh u la bynrap da kaba ong, “Donkam ban pynkylluid bad bad pynheh ïa ka surok ha katei ka jaka nalor ka multi complex ban tei hangtei. Kumta namar ba katei ka jaka ka dang hap ha constituency jongnga, lada donkam na ka skim MLA nga kloi ban ïarap lang ïa ka sorkar.”
Shwa kane, u Bah Adelbert u la pynpaw ka jinglyngoh halor ka jingslem jong ka sorkar ban pynkynriah noh ïa kitei ki nongsah na katei ka jaka. “Kane ka pynpaw ba ka sorkar ka tlot,” u la ong da kaba bynrap ba ki paidbah ki donkam ïa katei ka jaka ban pynkylluid bad ruh ban pynitynnad.
Nalorkata u buh jingkylli ruh ïa ka sorkar halor ka jingbym plie shuh ïa ka surok ha Them-metor.
Kumban shu pynkynmaw, ka jingïalang jong ka High Level Committee ba khlieh da u Bah Prestone Tynsong, Symbud Myntri Rangbah kum u Chairman dang shen ka la bthah biang ïa ka Shillong Municipal Board ba kan pynlong biang ïa ka jinglum khanasamari ïa ka jingdon ki nongsah ha Them Metor ha ka rukom ba shu pyntip paidbah.
Ka HLC ka la ai por ruh shibnai ïa ka Board ba kan pyndep ïa katei ka kam ba la bynshet.