Press "Enter" to skip to content

Ailad ka Assam ban shna surok ki paidbah ba ïehshrah ka Meghalaya ha Lapangap

Jowai, Jymmang 15: Haka sien kaba nyngkong eh ka sorkar Assam kala long jai jai bad ailad ïa u paidbah nongshong shnong ka Lapangap ban shna ïaka surok shnong kaba la iehshrah da ka sorkar Meghalaya da ka phew snem da ka jingsngew para briew namar ba kala jot rathai palat ka surok khnang ban suk ka iaid ka ieng u paidbah bad ki kali haka aiom slap.
Ki paidbah ka shnong Lapangap kila mih paidbah ban shna ïaka surok kaba iehshrah ka sorkar Jylla kaba jngai kumba 12 KM na Khanduli shaduh Lapangap. Kane ka surok ka dei kaba pynïasoh ruh ïaka shnong Barato, Chebnai, Pdeintaloo kaba la ot khyndew naduh ki snem 90.
Hynnin ka sngi ki paidbah ka shnong Lapangap kila hap ban sangeh ban trei ïa kane ka surok hadien ka jing shah pynsangeh ha ki pulit jong ka sorkar Assam namar ba ki khlem shim jingbit na kino kino ki bor ban shna ne trei ïa katei surok.
Ki paidbah ka shnong Lapangap wat hadien ba kila shah pynsangeh haka sngi Balang ula mih shakhmat ban trei paidbah ïaka surok shnong bad pyndap khyndew iaki thliew ki syar kiba shitom ki kali ban iaid haka por slap ban kit ki mar rep bad kiwei kiwei ki mar ba pynmih na katei ka shnong.
Mynta ka sngi ruh ki briew ka sorkar Assam hadien ba kila ïoh jingtip ban trei paidbah biang ïa katei ka surok da ka shnong Lapangap, la wan hiar syndon da u Border Magistrate West Karbi Anglong u Robert Tualar ryngkat bad Dy. SP Hamren, Chairman ka Border Committee ka KAAC u Augustine Hanse bad ka kynhun pulit kiba la pynkhreh bha ryngkat ki tiar iasiat, tiar pynsat khmat da ka jingthmu ban pynsangeh mardor ïa katei ka jingshna surok.
Hynrei u paidbah ha ryngkat ka jingïadonlang ki ar ngut ki MDC ka JHADC u ma Aiborlang Shadap bad u Dawan Lyngdoh ryngkat ki u Waheh Shnong ka Lapangap Deimonmi Lyngdoh kila ïania bad ïasaid ba kim ju hap ban pynbor nangno nangno ban shna ïa katei surok, kaba ki ju leh manla ka snem ha shuwa ban poi ka aiom slap ban suk ka iaid ka ieng jong ki.
U Border Magistrate ka Assam Robert Tualar ula khot ïa u Waheh Shnong ka Lapangap bad U Goanbura ka Langkeroi u Sarsing Ingti ban ïakren namar ba ka don ka jingujor na ka shnong Langkeroi, kaba iasam pud bad ka Assam bad Meghalaya bad la kynnoh ba yn siang rong ïa kane ka surok.
Dei halor kane u Border Magistrate ka Assam ula hiar sha katei ka jaka bad ha kaba nyngkong ka sorkar Assam ka ieng beit haka nongrim ban pynsangeh ïa kane jingtrei paidbah ïaka surok shnong ka Lapangap.
Hynrei ka jingshlur jong u paidbah ban ïasaid kila lah ban pyngkohnguh ïa u tei u officer ka sorkar Assam bad haka jingsngew parabriew wat hadpeng ka jingiakhajia pud ula ailad ban bteng ïaka jingtrei bad maramot ïa katei ka surok khlaw hadien ba u la bishar bin pa bin ïaka jingïathuh jong u paidbah ba ki hap ban im syrtok da ki phew snem ba sniew tasam kane ka surok, khamtam haka aiom slap.
“Ngi ailad ba ki nongshong shnong ka Lapangap kin trei ïa kane ka surok namar ba ka dei ka jingtrei mon sngewbha u paidbah, hynrei lada dei ki skim sorkar ki bor district lane ki sorkar arliang mamla kin hap ban ïapyntip mar kylliang namar ba kane ka jaka ka dang hap haka jingiakhajia pud,”la ong u Border Magistrate ka West Karbi Anglong, Assam u Robert Tualar.
Haba phai sha ki sahep Khasi jong ka West Jaiñtia Hills District wat la ki don ka jingtip halor kane ka jingwan u briew ka sorkar Assam, hynrei kaba lyngngoh wat tang uwei magistrate Khasi ruh ym shym la hiar sha katei ka jaka bad la shu iehnoh tang ha ki Pulit ka Saitsama bad ka Nartiang kiba donbor eiei bad ki bym ïaryngkat kyrdan bad ki heh District na ka West Karbi Anglong Assam ban iakren kam.