Press "Enter" to skip to content

Batai ka tnat Income Tax ïa jingoh khajna na ki riewlum

Shillong, Jymmang 15: Ha kaba ïadei bad ka jingjurip halor ki jingthep pisa ha ka por ba pynduh ïa ki lut tyngka (demonetization), ka tnad Income Tax ha Shillong ka la pynlong ïa ka jingïalang bad ki sengbhalang jong kane ka nongbah ha ka sngi baar mynta ka taiew ha Aayakar Bhawan.
Ha kane ka jingïalang ba la pynïaid da u Chief Commissioner jong Income Tax, Shillong, u RS Upadhyay la wan ïashim bynta da ki nongmihkhmat na ka Synjuk ki Rangbah Shnong, ka Khasi Students’ Union (KSU) bad ka Federation of Khasi, Jaiñtia and Garo Peoples (FKJGP).
Ha ka jingbatai ba u la ai halor ka jingdonkam ban pynlong ïa kane ka jingïalang, u Chief Commissioner (OSD) Ronmoy Das u la ong ba ka la wan ka por ba ka tnad kan pyndep noh ïa la ka jingjurip halor ki jingthep pisa ha ka por ba pynduh lut tyngka (demonetization). Namar kane, la phah ïa ki jingpyntip (notice) sha katto katne ki nongthep pisa ba kin batai halor ka jingthep pisa jong ki. Kum kine ki shithi ki la poi sha katto katne ki trai shnong bad ïathuh ruh ba ki paid riewlum (tribals) kim da tip bha halor kane ka kam namar ba kim ju mlien ban siew khajana. U la ong ba ka duna bha ka jing jubab halor kane namar ba ki paidriewlum ki don ka jinglyngngoh balei ki ïoh kum kine ki shithi bad kumno ban leh mynta.
Halor kane, u Chief Commissioner u la pynshai ba ka jinglait jong ki briew ka thaiñ Shatei Lam Mihngi ban siew khajna ka wan bad katto katne ki kyndon kiba dei ban pynshisha ha kaba ïadei bad ka jingthep pisa kaba lah bun ha ka por pynduh lut tyngka. Kane ka long ban pynshisha ïa kine ki jingthep pisa bad ban pynthikna ba kim dei ki kam “Benami” ne ki jingthep pisa thok. Namar kane, ki nongthep pisa ki dei tang ban pynshisha ba ki la thep ïa kane ka pisa bad ki dei ban pynshisha ruh ïa ka jinglong ki paid riewlum jong ki. Ki dei ban batai naei ki ïoh ïa kane ka pisa, ki jingtrei jong ki bad ka jingpynshisha ba ïa kane la kamai ha ki jaka rilum. Ha kine ki shithi, la don ka rukom (format) kaba lah ban pyndap da kaba suk khnang ba ki briew kin ym shem jingeh eiei haba jubab.
U la ong ruh ba ka jingbym kohnguh jong ki briew ïa kane ka lah ban wanrah ki jingkulmar bad ki lah ban hap siew ïa ka khajna na ka jingïoh kamai kaba ka tnad kam kwah ban leh. Lada ki briew kim leh ïa kaba donkam, ka tnad kan ym don lad shuh bad kan hap ban shim khajna halor kine ki jingthep pisa.
Namar kane, u Chief Commissioner u la kyrpad ïa ki sengbhalang ba kin ïatrei lang bad ka tnad bad ban pynsaphriang ïa kane ka khubor sha ki briew baroh khnang ba ki nongthep pisa kin sngewthuh ïa ki kyndon katkum ka ain kiba ïadei bad kane ka kam.
U President ka Synjuk ki Nongsynshar Shnong ka Bri u Hynñiewtrep (SNSBH), u Dr. W. Kharshiing u la buh jingkylli halor ki jingkynshew pisa ha ki Non-Scheduled Area da ki riewlum. Halor kane, u Chief Commissioner (OSD) Ronmoy Das u la pynshai ba ha kum kane, ym donkam ban siew khajna halor ki jingkamai ba la ïoh hapoh ki Scheduled Area, hynrei ïa ki jingkamai ba wan lyngba ka jingaiwai ne ka jingdie ban ïohnong ha ki Non-Scheduled Area hap ban siew khajna.
U General Secretary ka SNSBH, u Bah RL Blah u la kren halor ka TDS halor ka sut kaba mih na ki jingkynshew pisa ba thep Fixed Deposit bad u Chief Commissioner (OSD) u la batai bniah halor kane.
U Pynkmen Sanmiet, u dkhot ka KSU u la buh jingkylli hato don neem ki Dorbar Shnong kiba la bthah da ka tnad ban siew khajna bad halor kane, la pyntip ba ym don kum kane.
U Chief Organiser ka FKJGP u Bah Kitboklang Nongphlang u la ong ba ka seng kan ïaleh ban pynsaphriang jingtip halor kine baroh bad ban batai ïa ki briew ba ki dei ban shimkhia halor ki shithi ba la phah da ka tnad haba ïadei bad kane ka kam. Ïa kane la mynjur lang ruh da ka SNSBH bad ka KSU.
Ha kaba pynkut ïa kane ka jingïalang, u Chief Commissioner of Income Tax, Shillong, RS Upadhyay u la ïa jingkren halor katto katne ki phang ba ïadei bad ka kam lum bad siew khajna kiba ïadei bad ki paid riew lum ha Meghalaya.