Press "Enter" to skip to content

Buh thong ka SOS ban sumar sukher ïa 2 klur ki khynnah khunswet ha India

Pynbna ka SOS da ka jingïalap ‘NoChildAlone’
Shillong, Jymmang, 15: Ha ka jingrakhe ïa ka sngi burom jong ki longiing longsem (International Day of Families) kaba la long mynta ka sngi balang, ka SOS Children’s Villages of India, ka seng trei mon sngewbha kaba ri bad kaba sumar sukher ïa ki khynnah khunswet ka la pynbna ïa ka jingïalap “NoChildAlone” da kaba buh thong ban lum haduh 2 klur ngut ki khynnah khunswet ki bym don shuh ïa ki kmie ki kpa ha ka ri India baroh kawei.
Katkum ka jingpyntip jong ka SOS Children’s Villages of India, ki don haduh 2 klur ngut ki khynnah ki bym don shuh kiba ri bad sumar kaba biang namarba ki la duhnoh ïa la ki kmie ki kpa lane ba ki la shah iehnoh ha ki kmie ki kpa ne ki bahaing hasem kim kot bor ban
sumar sukher ïa ki. Kane ka seng treimon sngewbha ka pynpaw ba lada ym lah ban shimkhia kumba pynkhlaiñ ïa ki longiing longsem, ne ban ri bad sumar ïa ki khynnah rit ba khlem kmie khlem kpa ha ka rukom kaba dei, ki khynnah khunswet kin nang kharoi sha ka 2.4 klur ha kaba kut jong u snem 2021.
Ka United Nations Convention on the Rights of the Child, ha ka ‘tien lamphrang ka kdew shai ïa ki hok ki sot halor ka hok jong ki khynnah, kum ka longiing longsem kaba dei ka sawdong sawkun kaba kyrpang tam ban pynheh pynsan ïa ki khynnah, ki lad jingïada ïa ki khynnah, ki jingmyntoi ba ki khynnah ki dei ban ïoh bad kiwei kiwei.
Ka Secretary General jong ka SOS Children’s Villages of India, ka Anuja Bansal ka la ong, “ka SOS India ka la shim ïa ka sienjam ban pynbna paidbah ïa ka #NoChildAlone, ha ka jingrakhe ïa ka ‘International Day of Families,’ kaba ïatakhuh ruh bad ka sngi rakhe ïa ka ‘SOS Family Day.’ Kane ka dei ka kam kaba kyrkieh bad kaba donkam ruh ïa ka jingïatreilang na baroh bad nalor ka jingkyrshan ba ka Sorkar ka ai.”
Kino kino kiba don jingmut ki lah ban peit na ka website ww.nochildalone.org ne da kaba telephone ha u nombar 858 699 6699.
Haba kdew ïa ka jingtreikam jong ka SOS Children’s Villages’ kaba ri bad sumar sukher ïa ki khynnah ki bym don shuh ïa ki kmie ki kpa bad ki bahaing hasem, ka Bansal ka la ong, “ka SOS Shillong ïa mynta ka don 127 tylli ki rympei iing kaba kdup bad sumar sukher ïa 439 spah ngut ki khynnah bad ha baroh ki projek ngi don 440 tylli ki longiing hapoh kawei ka shatri jong ka SOS bad ngi sumar sukher ïa 26,000 phew hajar ngut ki khynnah lyngba ki ar tylli ki flagship programmes, kata, ka
Family Based Care Programme (FBC) bad ka Family Strengthening Programme (FSP).”
“Ka thong jong ka SOS India ka long ban tei ïa ki longiing na ka bynta ki khynnah rit khnang ba kin dup lah ban heh bad san da ka jingïoh jingieid, ka akor ka burom bad ka jingïada. Ïa kine ki prokram la pyntyllun ha ki saw tylli ki dong ba kynthup ha ka shnong Mynsaiñ, Pynthor, Mawlyndep bad Umktieh Pyllun,” ka la ong shuh shuh.
Ka SOS Children’s Village, Shillong mynta ka sngi ka la rakhe ïa ka sngi burom ha kaba la ïadonlang ruh u MDC ka Umroi Constituency u Bah Rangkysai Kharbuki uba la kren halor ka phang “Families and Climate Action.”
I Kong Jurimon Nongkharai na ka dong Pynthor i la batai bniah bha halor Family Strengthening Programme (FSP) ne ka jingpynskhem ïa ki rishot jong ka longing longsem bad ka kynhun na Mynsaiñ ka la pyni ruh ïa ka jingïalehkai skit halor ka jingseng ïa ka longiing longsem.