Press "Enter" to skip to content

Byrngem ka FKJGP bad HNYF ban hiar pynpra ïa ka surok PMGSY ba Assam ha Balakhawa

Shillong, Jymmang 15: Ka seng Federation of Khasi Jaiñtia & Garo People (FKJGP) bad ka Hynñiewtrep National Youth Front (HNYF) kila byrngem ban hiar pynpra hi ïa ka surok PMGSY jong ka Sorkar Assam ha New Balakhawa-Balakhawa lada ka Sorkar Assam ka dang bteng ban pyntrei jubor ïa ka.
Kine ki artylli ki Seng kila dawa ruh ïa ka Sorkar Jylla ba kan thung da ka Magisterial Inquiry bad ban kem ïa ki briew kiba don kti ban pynpra ïa ka surok bala shna lyngba ka skhim NREGS jong ka Jylla Meghalaya bad kumjuh ruh ïa kiba pynjulor ïa ka Nong kynti jongu Secretary ka Hima Nongspung.
“Ka FKJGP bad ka HNYF kala dep ïapynbeit bad lada ka Sorkar Assam ka dang bteng ban shna ïa ka surok PMGSY ha New Balakhawa bad Balakhawa, ngin sa phah ïa ki Dkhot ba kin hiar pynpra ïa kane ka surok” ong u Bah Wellbirth Rani, President ka FKJGP haba ïakren bad ki nongthoh khubor hadien ka jingpdiang burom ïa u Secretary ka Hima Nongspung Bah Micheal Warjri hynne ka janmiet ha Ophis treikam ka seng ha Mawlai.
Shuwa kane, u Bah Micheal Warjri ula pyntip ba ka Sorkar Assam kala shu shna be-aiñ ïa kane ka surok PMGSY da kaba pyn shongnongrim ïa ka jingiateh kular bad u Symbud Myntri Rangbah ka Jylla Bah Prestone Tynsong, ha ka jingïalang ba ki ïakynduh dang shen ha Guwahati, kaba ong ba ka Sorkar Assam ka lah ban pyntrei ïa ki kam pynroi ha ki jaka khappud ka Meghalaya da ka jingïoh jingbit.
Kat kum ka jingong jong une u Rangbah, kane ka surok PMGSY kala don mynta ha ka jingbishar jong ka Ïingkashari Megha-laya High Court hadien ba ula ujor da ka mukotduma pyrshah ïa ka Assam ba kala pyntrei ïa ka surok khlem da ïoh jingbit.
U Bah Wellbirth u ong “Ngi dawa ïa ka Sorkar Jylla ba kan pynsangeh noh mardor ïa ka Assam ba kan pyntrei ïa kane ka surok. Lada ka dang bteng ngin hiar ban pynpra bad lada mih ka huri hura ba pynthut ïa ka shongsuk shongsaiñ, ka Sorkar Jylla kan hap ban bahkhlieh” haba bynrap “Ngim lah shuh ban shu peit ba uwei-arngut kin shah pynlong langknia ha ka Sorkar Assam”.
Kat kum ka jingong jong u, ka New Balakhawa bad ka Balakhawa kim dei satia ki jaka ba don ha ka jingïakajia pud bad ka Assam bad kine ki Shnong ki dang dei hapoh u pud u sam ka Jylla Meghalaya. U ong “Lada kine ki Shnong ki hap ha ka jaka ïakajia, ngi ruh ngim burom ïa ka Status Quo hynrei namar ki dei jong ka Jylla, ngi hi ngim lah ban shu shah bad ailad ïa ka Assam ba kan kyntur bad theh ïa ki kam pynroi..Ka dei ka kamram jong ka Sorkar Jylla ban ai ïa ki kam pynroi ha u pud u sam lajong”.
Haba kynthoh ba ka Sorkar Jylla Meghalaya kala shu shah jem pat ha ka Assam wat ha ka jingpyntreikam ïa ka soskular Status Quo bala iateh na ka bynta ki jaka ba don ha ka jingïakajia, u Bah Wellbirth ula ong “Ka Assam haduh mynta kam shym la burom satia ïa ka Status Quo bad ka Sorkar Meghalaya kala shu shah jem shaba palat liam. Ngi pynrem jur ïa ka jinglong jong ka Sorkar Meghalaya bad tang ma ki hi kiba tip ïa ka daw balei ba ki shah jem haduh katne”.
“Ngi la ïohi ïa kaei kaba jia ha Langpih kumno ki briew jong ka MeECL kiba leit tan bording, kila shah kem pynban ha ka Assam..kumjuh ruh ha Malangkona bad mynta pat sa ha New Balakhawa bad Balakhawa, hynrei ka Sorkar Jylla kala sngap jar jar” ula ong bad bynrap “Kane kala pynlong ïa ngi ban duh jingshaniah ha ka Sorkar ba kam nud ban leh eiei. Kaba ngi kwah mynta ka long ba ka Sorkar ka dei ban sdang pyni bor lang noh kumba long kiwei kiwei”.
Haba sngewnguh ïa ki MLA, ki Myntri Sorkar, ki MDC kiba la shimkhia ban leit jurip ïa ka jinglong jingman ha Balakhawa, une u Nongïalam ka FKJGP ula ong pat “Ban shu leit peit hi kam da don jingmut satia lada kim nud ban kren pyrshah ne ieng pyrshah ïa ka jingleh jong ka Assam”.
Halor ka jingkynthoh u Myntri kam pohïing ba ki Pulit ka Assam kila kem ïa u Bah Micheal namar ka case ba pyrshang ban pyn ïap briew, u Bah Wellbirth ula pynpaw ïa ka jinglyngngoh bad ong “Ka jingkren u Myntri ka pyni ba um tip eiei shaphang ka jing shah kem bad ka dei kaba shu kren lait synhaw…kam don satia kata ka case pyrshah pynïap briew bala pynngat ïa u Bah Micheal. Kane ka jingkren ka dei tang namar ka jingslia ïa ka jingbym lah ban leh eiei”.
Haba ïadei pat bad ka jingong u Myntri kam pynroi sor Bah Hamletson Dohling ba ka Shnong Balakhawa ka dei ban pdiang ïa ka jingwan ki kam pynroi na baroh artylli ki Jylla, u Bah Wellbirth ula ong “Kane ka jingkren ka dei tang ka jingkren khynnah bad ngim lah ruh ban pdiang namar ka Balakhawa ka dei ka jaka jong ka Jylla ym kaba don ha ka jingïakajia pud kaba treikam ka Status Quo”.
“Ha ka jingshisha ki nongïalam kim dei ban kren ïa kum kine ki jingkren namar ka nang ai bor ai mynsiem shuh shuh ïa ka Sorkar Assam ba kan ïaid kyntur pud, ban rung bad tam pud sha ki Jylla jong ngi” ong u Bah Wellbith.
Haba kylli, u Bah Wellbirth u pyntip ba ka seng FKJGP bad ka HNYF kala dawa ruh ïa ka Sorkar Jylla ba kan pynbor ïa ka Sorkar Assam ba kan aiti bad pynkynriah noh ïa baroh ki case ba ïaid pyrshah ïa u Bah Micheal sha ka Jylla.
Kat kum ka jingong jongu, ki Pulit ka Assam kila pynngat ïa u Bah Micheal ha ka Arms Act bad ka case dawa pisa. U ong ba ka Assam kam don hok ban tuklar ïa kine ki case kiba dang hap hapoh u pud u sam jong ka Jylla Meghalaya.