Press "Enter" to skip to content

Dawa ka Sorkar MDA ban thung ka Sorkar Pdeng da ka jingtohkit halor ka NEIGRIHMS

Shillong, Jymmang 15: Ka Sorkar Meghalaya Democratic Alliance (MDA) kala rai ban dawa ïa ka Sorkar Pdeng ba kan thung da ka jingtohkit jong High Level Committee halor ka kynrum kynram jong ka North Eastern Indira Gandhi Regional Institute of Health & Medical Sciences (NEIGRIHMS).
“Ngin sa thoh noh mar mar sha ka Sorkar Pdeng ba kan thung noh da ka Committee ban tohkit hapoh kane ka taiew” ong u Bah A.L.Hek Myntri ka koit ka khiah ka Jylla haba ïakren bad ki nongthoh khubor ha ka sngi ba-ar. U ong ba ka jingtohkit pyrshah ïa u Director ka NEIGRIHMS Dr DM Thapa bad ïa ka Tnad Cardiology ka long kaba donkam.
Ha ka Lah Sngi U Blei , ki Dkhot ka KSU ki la leit ban khang tala ïa ka Ophis treikam jong u Director kum ka dak ban pyrshah ïa ka huri hura kaba mih hapoh ka Institute, kaba la wanrah ruh ïa ka jingïap jong iwei i Longkmie ba pang klongsnam. Ka KSU kala dawa ruh ba dei ban weng kam mardor ïa u Director Dr D.M.thapa.
Haba kylli, u Myntri ka koit ka khiah ula ïathuh ba ma u bad u Myntri Rangbah ka Jylla Conrad Kongkal Sangma, ki la kyrpad mynta la phra bnai ei ei na u Myntri ka Ministry of Health & Family Welfare u JP Nadda ba un weng noh ïa u Dr DM Thapa na NEIGRIHMS. Ïa kane ka jingkyrpad la buh hakhmat u Myntri ha ka jingïalang ba long ha New Delhi.
“Ha kane ka juh ka sngi, u Myntri ula ai ka jingbthah ïa u Secretary jong ka Ministry ban bthah ïa u Dr DM Thapa ba un shim da ka shuti ba bun bun bnai” ong u Bah Hek haba bynrap, ïa ka jingkyrpad la buh hadien ka jingiohi ïa ka jingmih ki kynrum kynram naduh ba u Dr Thapa ula shimti ïa ka kam hapoh ka Institute.
Hynrei u Bah Hek ula ong ba une u Director u dang ïai bteng ban trei ha kane ka kam namar u ioh ïa ka jingiada na ka National Commission for Scheduled Caste (NCSC). Ula ong “Ula bteng beit ïa ka kam namar ula leit sha ka Commission bad namar ba u dei u Scheduled Caste ula shah pynneh bad ïoh jingiada na ka Commission”.
Haba kylli la ka Sorkar ka pynkit ïa ka jingbahkhlieh ha u Director shimet halor ka kynrum kynram hapoh NEIGRIHMS, u Bah Hek ula ong ‘tad haduh ba ngi ïoh ïa ka kaiphod jong ka jingtohkit, ngim lah ban ong ïa kane bad kam long ruh kaba dei namar hap ban pynshong nongrim kat kum ki jingshisha…Hynrei, hooid ngi dang ïai buddien ïa ka jingwengnoh ïa u bad ka rai hi kan shong ha ka Sorkar Pdeng”.
“Namar kane ngi khmih lynti ban don da ka Committee ban tohkit naduh tynrai ïa kane ka kam. Ngim lah ban don ïa ka jingtohkit ba tang shiliang, ngi hap ban pynthikna ba ka jingtohkit kan long ymtang ïa u Director hynrei ïa ka Tnad Cardiology ruh kumjuh” ong u Bah Hek.
Halor ka jingïap jong iwei i nongpang, u Bah Hek u pyntip ba ka Sorkar ka dang pan ïa ka kaiphid bad ka khmih lynti ban sa ïoh pdiang ïa ka hapoh kane ka taiew ba mynta.
Haba kynthoh ïa ka jingkynnoh ba ka Sorkar ka ïap ïohthiah lyngngai halor kane ka kam, u Bah Hek ula ong “Nga la ïathuh ha phi ba phra bnai mynshuwa ngi la leit tynruh ïa kane ka kam shaduh sha Delhi. Ka long kaba bakla shibun ïa kito kiba ong ba ka Sorkar ka ïohthiah lyngngai”. Ula ong ba ka Sorkar Jylla kan nym ailad ruh ïa ka Institute ban leh Politics halor ka ïap ka im jong ki paid Nongpang.
Kat kum ka kaiphod ba la aiti da u Secretary ka Tnad Health ka Jylla u Pravin Bakshi hynnin ka sngi nyngkong, ula ai jingmut ba ka Ministry of Health & Family Welfare ka lah ban thung ïa ka jingtohkit jong ka High Level Commttee halor ka jingïap jong iwei i nongpang. U ong ba kane ka Commitee kan dei jong ki stad Cardiology na ki Institute ba pawnam kiba dei na shabar ka Jylla hapoh ka jingïalam jong ki heh na ka Ministry.